Pacoh Bible Literal Text
Ya-cơ 3
Ơi em ai na cư, lớiq bôn a-ưi ti-cuôi táq thới, khán he lớiq táq veng dyơ top he lư ráp tôt ntáng hơn. Co top he táq luaih a-ưi. Khán ti-cuôi mmo lớiq táq luaih tớq par-nai taq-ntêr, ngki la ti-cuôi ti-nớng ŏ, co ti-cuôi ngki rap bán ŏ nhéq cháq bôm. Khán top he ính ca-cháq nhem tớq ng-cang a-séh dŏq dyôn a-séh ính veng top he, iki top he têq dông a-séh nhéq máh na he. Mu chứng cóq me máh tuôc pưt lư a-lứng bôn cu-yiêl clúh hớp, ma cứp allám tuôc ính pôq tu-mo co bôn pil par-vih lư két dŏq tớq ntúq ndon ma co ti-cuôi a-vih tuôc ính. Mu chứng a-rớq ngki, ntaq la tháng két ma têq án a-sớr cháq máh ar-náq pưt. I-nha me bôn mui lám cúc car-hông két ma têq táq ng-cat tiah pưt. Ntaq la mu chứng a-rớq pallô uih, tớq pang ndô a-ưi táq luaih. Ntaq dŏq át tớq cháq top he, táq saq nhéq tớq cháq a-lứng táq rúng díh pang ndô, ma to án têq táq ng-cat cơt uih chéh. Cứp nốh pan-nán a-lứng a-chếq, cu-sánh a-lứng cứp nốh át tớq dơq ving ca-vang co ti-cuôi khoiq bán a-lứng khoiq cứp náq ti-cuôi khoiq bán. Ma lớiq nnáu rap bán ntaq bôm, ntaq báq taq-ntêr níc par-nai saq, iki ntaq he la a-rớq pih cu-sánh têq ca-chet máh ti-cuôi. A-lứng co ntaq, top he báq cứh ayô Yang a-lứng A-ám, mu chứng co bôn ntaq, top he báq a-craiq ti-cuôi hơ, co án khoiq teng ti-cuôi a-rớq mu chứng na Yang Arbang Pilŏ́ng. Callong ayô nha callong a-craiq ngốh te mui hóng ng-cang. Ơi em ai na cư, máh ar-náq ngki lớiq crái táq iki. Bôn mui par-lôiq a-bóc dơq tớq te búl ma bôn dơq ngốh iam a-lứng bôn dơq ndon lớiq iam. Ơi em ai na cư, a-long ta-rúng lớiq têq cơt cu-lái ô-li-vê, lớiq la a-long nho ngốh cu-lái ta-rúng? Dơq lớiq iam lớiq têq ngốh dơq iam.
Ti-cuôi mmo tu-báiq a-lứng chom te top i-nha? Ti-cuôi ngki cóq a-páh ar-náq án táq na án co ti-cuôi ngki át khun táq ar-náq ŏ ma án lớiq ính ngai ayô án ti-cuôi can-nŏ́h chom án lư tu-báiq. Ma khán i-nha mu náq i-ôiq na mu náq lớiq la mu náq ính pưt hơn te mu náq a-lứng ính bôn tớq mít can-nính bôm, êq par-ngíh i-nha la tu-báiq a-lứng i-nha tông pi-con ada callong lư. Ndô lớiq bôn la callong tu-báiq siar te pilŏ́ng, ma tớq te pang ndô, a-lứng te, yang saq. Co callong i-ôiq ca-míq a-lứng ính bôn niêng ta-niêng tớq mmo, ngki callong tar-luaih a-lứng cứp ar-náq saq át tớq ngki. Vít ngki, callong tu-báiq tớq te pilŏ́ng nsuôi lư la cóq práh ŏ, dyơ ngki lớiq táq luaih yớu, bôn mít khun, ial mít can-nính yớu, bôn mít a-moih ti-cuôi can-nŏ́h a-lứng táq ar-náq ŏ níc, lớiq bôn bar mít, lớiq taq-ntêr a-uai. Te callong ti-nớng ŏ ngki nhéq náq bôn át iên ŏ co máh ti-cuôi mu náq át ŏ ada mu náq.
Pacoh Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.