Hê-brơ 7

1Co Mel-chi-sa-déc ndô, puô na Sa-lem thới teng rit sang na Yang Arbang Pilŏ́ng Sút Pưt Lư, án khoiq tar-múh A-pra-ham mbơiq chón te tar-chíl rap máh puô, a-lứng khoiq tông callong bún ada án, 2ndon A-pra-ham lư khoiq dŏq mmar mui phê mu chít te cứp nốh dyôn ada puô ngki; nsuôi lư, Mel-chi-sa-déc bôn par-long liêh la “puô ti-nớng tu-pứng,” ma tông ndái loi la lư puô na Sa-lem, ngki la “puô iên ŏ,” 3ớq a-ám, ớq a-i, ớq tŏ́ng toiq, lư ớq bôn máh i-ngái mbơiq car-nian lớiq la tớq i-ngái cu-chet, ma bôn cơt a-rớq A-cái Yang Arbang Pilŏ́ng, puô ngki yôl la thới teng rit sang ti-ngôi díh sút pang.

4Ma cóq ti-tuaiq me puô ngki sút pưt i-mo, ndon a-chúc a-chiac A-pra-ham khoiq mŏp dyôn phê mu chít te máh crơng tar-píh te ntúq tar-chíl. 5Ma máh ti-cuôi te tŏ́ng toiq Lê-vi, ndóng ráp chức thới teng rit sang, ngki bôn pa-táp dŏq ial te phê mu chít te máh ti-cuôi veng rit rŏng, ngki la tớq em ai i-nha, ntro lư callong khoiq ngốh te tŏ́ng toiq A-pra-ham. 6Ma, ndóng ớq bôn ntêr tớq tŏ́ng toiq ngốh te nha-án, puô ndô khoiq ial phê mu chít te A-pra-ham, a-lứng khoiq tông bún ada ti-cuôi bôn máh par-nai par-ưq. 7Ma, lớiq bôn lớng callong tar-miên mmo ndóng ti-cuôi bôn chức két hơn bôn ráp bún te ti-cuôi bôn chức pưt hơn. 8A-lứng tớq ar-náq ndô, máh ti-cuôi chón ính cu-chet ráp ial phê mu chít, ma tớq ar-náq ngki, puô ngki bôn taq-ntêr la yôl tu-mống. 9Têq taq-ntêr mui callong iki, Lê-vi, ti-cuôi ial máh phê mu chít, la khoiq bôn ial phê mu chít na A-pra-ham, 10co án yôl át tớq cháq na a-chúc a-chiac án ndóng Mel-chi-sa-déc tar-múh A-pra-ham.

11Iki, khán cứp nhéq la co rit sang na ti-cuôi Lê-vi (co te ar-náq ngki, máh ti-cuôi prái khoiq bôn phep rit), ma i-mo cóq mu náq loi thới teng rit sang can-nŏ́h veng chức Mel-chi-sa-déc ma lớiq bôn ntêr veng chức A-rôn? 12Co ndóng chức teng rit sang khoiq ngai piên, ngki co táh pa-tot, callong tar-piên te phep rit ngki cóq cơt. 13Co Yê-su, Án ndon máh callong ndô ngki ntêr liêh, ưlla mui tŏ́ng toiq can-nŏ́h, ma tớq te tŏ́ng toiq ngki i-yốh bôn nnáu cơi teng rit tớq pa-rông sang. 14Co ar-lớih lư idô Yang top he tớq te Yu-da, ma ada tŏ́ng toiq ngki, Môi-se khoiq lớiq ntêr callong a-mớh te chức máh thới teng rit sang. 15Callong ndô tar-lúh a-cán lư ar-lớih tháng khán mu náq thới teng rit sang can-nŏ́h tớq mu chứng a-rớq ar-maiq na Mel-chi-sa-déc, 16la Án cơt thới teng rit sang lớiq veng phep rit khoiq a-nát te sac sáiq, ma veng chức sút na callong tu-mống nic-níc. 17Co Án khoiq taq-ntêr idô:

“A-cái la thới teng rit sang sút pang veng chức Mel-chi-sa-déc.”

18Co iki, ar-náq khoiq táh callong pa-táp ndóng nsuôi khoiq cơt co rit ngki lớiq sit a-lứng lớiq tar-náp nnáng 19(ngki co phep rit lớiq táq dyôn crái piaiq nốh a-mớh), a-lứng la ar-náq dông a-tớq callong ng-cong ŏ hơn, ma te ngki top he át tar-mán Yang Arbang Pilŏ́ng. 20A-lứng lớiq bôn nhéq máh nốh ngki ma ớq bôn par-nai can-tŏ́h, — ntro lư máh ti-cuôi ntíh ớq bôn par-nai can-tŏ́h ngki khoiq cơt máh thới teng rit sang, 21ma Yê-su khoiq cơt na par-nai can-tŏ́h, co Yang tông ada Án:

“Yang khoiq can-tŏ́h a-lứng lư lớiq tar-piên:

‘A-cái la thới teng rit sang ti-ngôi díh sút pang.’” —

22iki veng ngê lư piaiq ngki, Yang Yê-su khoiq cơt Án lư ar-lớih na mui callong car-hŏt ŏ lư. 23A-lứng ntro máh ti-cuôi báq cơt thới teng rit sang la clứng lư, tớq te callong cu-chet lớiq têq dŏq táq dưnh, 24ma, Án cơt ti-cuôi teng rit sang lớiq têq tar-piên, co Án tu-mống níc ti-ngôi díh sút pang, 25ma co te ngki, Án lư bôn chức sút dŏq choi ta-mống cứp pang máh ti-cuôi tớq tar-mán Yang Arbang Pilŏ́ng na Yê-su, la Án tu-mống níc dŏq cớu seq tang dyôn nha-án. 26Co mu náq thới teng rit sang a-rớq ngki lư piaiq la dyôn ada top he: Yang práh ŏ, lớiq táq pla, lớiq táq luaih, dŏq mmar te máh ti-cuôi bôn luaih, a-lứng khoiq cơt a-yống hơn máh lưp pilŏ́ng; 27la Án ớq bôn par-ngíh cứp i-ngái a-rớq máh thới teng rit sang can-nŏ́h, cóq mŏp crơng kiac sang, nsuôi lư la tang dyôn luaih na án dyơ ngki la luaih na máh ti-cuôi clứng, co Án khoiq táq cua ar-náq ngki vít dyơ mŏp cháq án mu chư cứp nhéq. 28Co phep rit dyôn máh ti-cuôi bôn callong luaih cơt thới teng rit sang, ma par-nai can-tŏ́h, la ar-náq tớq ta-tun phep rit, ngki dyôn A-cái, la Án khoiq táq cua nhéq cứp ar-náq ti-ngôi díh sút pang.