Pacoh Bible Literal Text
Hê-brơ 5
Co cứp náq thới teng rit sang, khoiq bôn rêh te máh ti-cuôi clứng, khoiq dŏq a-nát tang mát dyôn ti-cuôi prái tớq máh ar-náq ndon crái nga Yang Arbang Pilŏ́ng, dŏq têq mŏp máh crơng a-lứng mŏp sang pan-nán tang callong luaih; ndóng têq chom sruiq-táq ada máh ti-cuôi a-ơu a-lứng ti-cuôi clu car-na, ma lư án ngki cơt callong luaih par-yông. Nhơ te ngki, ti-cuôi ngki cóq mŏp sang pan-nán tang luaih, mu chứng dyôn ti-cuôi i-mo, ngki mu chứng dyôn án bôm iki tưi. Lớiq bôn nnáu ráp ial ar-náq ndô dyôn án, ma nưm têq Yang Arbang Pilŏ́ng rêh arô, lư mu chứng a-rớq A-rôn. Mu chứng iki, Yang Choi Ta-mống lư khoiq lớiq bôn a-sớr cháq án bôm cơt thới teng rit sang. Ma lư la Yang Arbang Pilŏ́ng khoiq tông ada Án:
“Mái la A-cái Cư;
i-ngái ndô Cư khoiq car-nian Mái.”
A-rớq Yang Arbang Pilŏ́ng ngki lư khoiq tông tớq mui ntúq can-nŏ́h:
“A-cái la thới teng rit sang ti-ngôi díh sút pang,
mu chứng a-rớq Mel-chi-sa-déc.”
Nhéq máh i-ngái át tớq cháq án, Án khoiq mŏp díh par-nai cớu seq nha tár seq, a-lứng arô nhiêm yứng lư nha dơq mát dyôn Án bôn chức sút choi án te cu-chet, a-lứng Án khoiq bôn sáng co pang tu-mống dyám náp na án. Ntro la A-cái, Án khoiq rian chom callong náp peh te máh nốh ndon Án chiuq diêiq a-rức. A-lứng ndóng khoiq táq nhéq dyơ, Án cơt tôm callong choi ta-mống díh sút pang dyôn nhéq máh ti-cuôi cam-máng Án, tư dyơ bôn Yang Arbang Pilŏ́ng a-nát táq thới teng rit sang veng a-rớq Mel-chi-sa-déc, ma te ar-náq ndô ngki tông dyôn top he a-ưi lư, a-lứng diêiq taq-ntêr, co top i-nha khoiq lớiq ính te ar-náq cam-máng. Co tar-lúh díh hoi ndô, piaiq lư khoiq cơt la máh ti-cuôi thới, i-nha yôl bôn par-ngíh suô ti-cuôi ngki pa-soi i-nha máh nốh tôm lư na máh top tang ng-cang na Yang Arbang Pilŏ́ng, a-lứng i-nha khoiq cơt máh ti-cuôi yôl ính cha te dôi tar-nat, ma i-yốh têq cha dôi callám! Co ti-cuôi mmo nưm uq dơq tóh ngki i-yốh chom te par-nai ŏ ti-nớng tu-pứng, co ti-cuôi ngki yôl la ngai a-cái mbơiq car-nian. Ma dôi callám la dyôn ada máh ti-cuôi khoiq sa-sai, la máh ti-cuôi co khoiq cơi rian têq chom co a-cớl díh callong ŏ nha callong lớiq ŏ.
Pacoh Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.