Ti-mu-thê Bar 2

1Iki, a-cái cư ơi, mái cóq táq dyôn mái práih bánh tớq callong choi mat te Yang Choi Ta-mống Yê-su. 2Ma callong mái khoiq sáng te cư chứng mát ti-cuôi clứng, cóq mŏp callong ngki dyôn máh ti-cuôi lư ti-nớng ma nha-án ngki lư hôi dŏq ca to ti-cuôi can-nŏ́h. 3Cóq chiuq diêiq a-rức, a-rớq mu náq líng hôi na Yang Choi Ta-mống Yê-su. 4Ndóng cơt líng, ớq nnáu táq dyôn án par-ngíh nnáng máh ar-náq na pang tu-mống ti-cuôi prái, dŏq líng ngki têq táq bui mít ti-cuôi ndon khoiq rêh dyôn cơt líng án. 5Mu chứng ngki, ndóng ti-cuôi ndon ính ta-lúh tam-pring, ti-cuôi ngki lư lớiq têq bôn ráp cống khán lớiq táq veng rit dŏq a-nát. 6Ti-cuôi ndon mmín táq ar-náq piaiq lư ráp cống tar-náp nsuôi lư. 7Cóq par-ngíh callong cư chón tông, co Yang lư tốq dyôn mái chom ar-lớih tớq cứp ar-náq.

8Cóq ayư Yang Choi Ta-mống Yê-su, khoiq bôn tu-mống liêh te cu-chet, tớq tŏ́ng toiq Da-vit, mu chứng a-rớq Par-nai ŏ Yang na cư, 9co Par-nai ŏ Yang ngki, cư chiuq diêiq tar-lúh ngai chóq a-rớq mu náq ti-cuôi luaih. Ma, par-nai Yang Arbang Pilŏ́ng ngki lớiq têq chóq a-mớh. 10Co iki, cư chiuq cứp nốh co máh ti-cuôi ndon khoiq rêh, dŏq nha-án lư têq bôn callong choi tu-mống tớq Yang Choi Ta-mống Yê-su, a-lứng ang ưr díh sút pang.

11Par-nai ndô lư piaiq náp ial:

“Co khán top he khoiq cu-chet a-lớng Án, top he ngki lư tu-mống a-lớng Án.

12Khán top he rap chiuq ta-nhir, top he ngki lư cơt sút a-lớng Án.

Khán top he ca-lôih Án, Án ngki lư ca-lôih top he.

13Khán top he lớiq ti-nớng, Án lư ti-nớng,

co Án lớiq têq ngki ca-lôih bôm.”

14Cóq ca-tớih tông máh top tin te callong ngki, ndóng tông ca to nha-án chứng mát Yang Arbang Pilŏ́ng dŏq êq tar-miên te par-nai taq-ntêr, co lớiq tar-náp a-mớh, nưm táq dyôn cơt rúng ada ti-cuôi cam-máng. 15Cóq táq nhéq tar-ngứh tar-hơ dŏq a-páh lư nưm mái a-rớq ti-cuôi crái piaiq chứng mát Yang Arbang pilŏ́ng, mu náq ti-cuôi táq ar-náq lớiq sáng a-chiêt, ca to ti-nớng lư par-nai piaiq. 16Ma, cóq viar máh par-nai taq-ntêr ớq cơt callong, co par-nai ngki dông a-tớq nga ntúq lớiq dyám a-cán ta-niêng, 17a-lứng par-nai ntêr na máh ti-cuôi ngki lư cơt rứh a-rớq bác rơiq pơh lư, ma te top ngki la Hi-mê-nê nha Phi-lêt, 18máh ti-cuôi ndon pôq lớiq crái te callong piaiq, ndóng ntêr callong tu-mống liêh khoiq cơt dyơ, a-lứng nha-án chón ta-lóh callong tin na cứp náq ti-cuôi. 19Ma, a-rớq ta-nang dúng na Yang Arbang Pilŏ́ng khoiq khớm lư, ndóng bôn par-nai ta-ran ndô: “Yang chom máh ti-cuôi ưlla na Án” a-lứng “Ti-cuôi mmo cớu seq nốh Yang cóq viar yông te ar-náq saq.”

20Ma, tớq mui lám dúng pưt, lớiq nưm bôn yáng tớq dyeng lớiq la práq, ma bôn tớq a-long lớiq la cu-teq triêq, bôn nốh dŏq dyôn ar-náq tar-náp, bôn nốh can-nŏ́h ngki dyôn ar-náq lớiq tar-náp. 21Iki, khán nnáu táq dyôn práh án te máh ar-náq ngki, ti-cuôi ngki la a-rớq yáng dŏq dyôn ar-náq tar-náp, khoiq dŏq mmar dyơ, tar-náp ada Ưlla, khoiq ti-ráp dŏq dyôn cứp ar-náq ŏ.

22Cóq viar dyôn vít máh ar-náq saq báq táq na ti-cuôi bánh, ma tar-veng callong ti-nớng tu-pứng, callong tin, callong ar-moih, callong ar-toi a-lớng máh ti-cuôi cớu seq Yang na mít can-nính práh ŏ. 23Ma cóq ca-lôih máh par-nai lớiq tar-náp a-lứng a-chơ, co chom ar-lớih ar-náq ngki táq dyôn tar-luaih. 24Ti-cuôi sol na Yang cóq êq tar-luaih, ma cóq lam-bŏt ada cứp náq ti-cuôi, cóq hôi ca to, chiuq ta-nhir, 25ndóng ca to máh ti-cuôi ính chíl liêh án cóq bôn mít lam-mŏr, dáh lơ Yang Arbang Pilŏ́ng choi dyôn nha-án piên lêq mít tam-me dŏq têq chom a-púh callong piaiq, 26a-lứng nha-án têq viar vít te pang-cát na yang sáq, cua dyơ án cŏp dŏq táq veng can-nính án.