Kille Caaqo
2 Qoronttoosa 3
Kille caaqo oochanchchuntsana
Nuunii mahi nuna nashshonene? Woy melle as gaar, galata dabddaabiza yinttis dakkodes woy yinttappa ekkodes nuna koshshanene? Asi ubba yinttana erode fanan nabbabode fana yin nu wozintte yeze dabddaabbe. Yin qalamera maaqqikaayzin de7o Xoozze Ayyaanara, shuchchalla afa maaqqikaayzin as wozina xaafinttiduntsanan nuura maadinttide Kiristtoosa dabddaabbe maaqqizanno beezida.1
Nu yinno gaydanna, Kiristtoosa baggara Xoozze gidda ammano nuus yeze gisho. Nu yinno oochchodes dandda7idanna Xoozze wolqqara fattin nuunii nu wolqqara akkon oochchodes dandda7oos. Nu kille caaqos kiitinttizuntsana maaqqade fana nuna yiizida. Yinna kille caaqita Geeshi Ayyaanara benttida fattin xaafinttide higge gidda baaya. Higge wodhane, yezin Geeshi Ayyaana de7o inggane.2
Shuchchalla afa xaafinttide higgita ingginttide wode Xoozze bonchchita qonccida. Muse sintte yeze bonchchita dhabiter hyanggizebaz maaqqikon, Isra7eele asuntsi E sintto dakkii be7ades un dandda7ikaaya. Yikke, hyayqo ki7ize higge yinnii gaar bonchchora qoncciko,3 yeezin, Geeshi Ayyaanara oochinttize oocha bonchchita wayzi aadhooso? Asalla afa firdda ki7ize higge bonchcho maaqqiko yeezin, asi xillize kille oge wayzi aadhii bonchchinttosa? Zaga bonchcho maaqqidanno hyatte aadhize bonchchora yeltsi be7ize wode zaganna bonchcho baayze baz maaqqida. Eerats wodes benttii suubappa dhabidanna hyannii fana bonchchinttiko, medhina yezanna wayzi aadhii bonchchinttoso?
Nuus hyannii gaar ufayssi yeze gisho yeellidhikaayzara ohine. Nuunii, Isra7eele asuntsi dhabiter hyanggize bonchchiti folito ba7aame gaar fa sintto goozide Muse fana baaya.4 Yezin un wozintta doccida. Hyayno yellodes un gal77a caaqo nabbabize wode un wozintta yinna goozite goozinttii yene. Yinna goozita Kiristtoosar xalaala gaarinttane. Yezin hyayno yellodes un Muse maxaafe nabbabize wode ubba yinna goozita un wozintto goozane. Yezin ooden Laatstsago maaqqize wode ayden yinna goozita gaarinttane.5 Laatstsii Ayyaana; Laatstse Ayyaana yeze besite wallotitsi yene. Nuunii ubbuntsi goozinttikaayze sinora Laatstse bonchchito be7ada.6 Nuunii Ayyaana maaqqide Laatstse bishshito aazodes bonchchoppa bonchcho laaminttoda.
Source notes (6)
- Cross-reference Keze 24:12; Er. 31:33; Hiz. 11:19; 36:26
- Cross-reference Er. 31:31
- Cross-reference Keze 34:29
- Cross-reference Keze 34:33
- Cross-reference Keze 34:34
- Footnote Be7ada: Masttoote fana mahi beessada ga7i bilinttodes dandda7ane.
Kille Caaqo. Copyright © 2025 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.