1 ቆሮንቶሳ 12

ጌሽ አያና እሞት

1ታ እሹን፥ ጌሽ አያና እሞትባዝ ይን ኤሮደ ፋና ታ ኮያነ። 2ይን ጾዝ አማኖሰ ዎደ ዶና ባይዘ ኤቁንጎ ጎችንቲ፥ ይን ኤሮሰ ኦገ Ꮉንግዳኖ ይን ኤራነ። 3ጾዘ አያና ካልዘ አስ ኦደን፥ «የሱሳ ባድንቶ» ያጋኦስ። ማህ ጌሽ አያና ካልካይዝን፥ ኦደን፥ «የሱሳ ላ» ጋኦደስ ዳንዳኦሳኖ ይን ኤሮደ ፋና ኮያነ።

4ዱማ ዱማ አያና እሞት የነ፥ የዝን እሞትቶ እንግዘ አያንዘ ፈቶ።1 5ኑ ላስ ዱማ ዱማ ኦቻ የነ፥ የዝን ላ ፈቶ። 6ኑ ላስ ኦችዘ ዱማ ዱማ ኦገ የነ፥ የዝን ይና ኦግተ አስ ኡባራ ኦችዘ ጾዘ ፈቶ። 7የዝን ፈተስ ፈተስ እንግንትደ እሞትቶ መሉንና ማዶደ ፋና ጌሽ አያና ቆንጫነ።

8ጌሽ አያና ፈተስ ጭንጫት ኩምደ ቃላ እንጋነ፤ ማህ ፈተስ ኤራት ኩምደ ቃላ እንጋነ። 9የ ጌሽ አያንዘ ፈተስ አማኖ፥ Ꮉንካይስ ማህ ፋዘ እሞ እንጋነ። 10ጌሽ አያና ፈተስ ክለ ባዝ ኦችዘ እሞ፥ ፈተስ ትንቢተ ኦህዘ እሞ እንጋነ። ፈተስ አያናፓ አያና ሻኪ ኤርዘ ዎልቃ፥ ፈተስ ዱማ ዱማ ዶናራ ኦህዘ እሞ፥ ማህ ፈተስ ዱማ ዱማ ዶናራ ኦህንትዳኖ ብልዘ እሞ እንጋነ። 11ይኒ ግሾ Ꮉኖ ኡባ ኦችዘ የ ፈቲ ጌሽ አያንዛ። ኤ ኮይደ ፋና ፈተስ ፈተስ ዱማ ዱማ እሞ እንጋነ።

ፈቲ ጋላ ዱማ ዱማ ብልተ

12ፈቲ ጋልተ ጋማ ብልተ የነ፥ የዝን ይና ዱማ ዱማ ብልቱን ፈቲ ጋላ። ይኒ ፋና፥ ክርስቶሳ ዱማ ዱማ ብልቱን የዘ ፈቲ ጋላ ፋና።2 13ኑኒ አይሁደ ማቅን ግርኬ ማቅን አሮ ማቅን ዋሎ አስ ማቅን፥ ኡቡን ፈቲ ጋላ ማቃደስ ጌሽ አያናራ ጻማቅንትዳ። ማህ ኑ ኡቡን ፈቲ ጌሽ አያና ኡዥዳ።

14ኑ ጋልተ ዱማ ዱማ ብልተ የነ ፋትን ፈቲ ጋላ ብልተ ባያ። 15ቶሄ፥ «ታኒ ኩሸ ማቆሰ ግሾ ብልተ ባያ» ጋይኮ፥ ኤ ይኖ ጋይደ ግሾ ብልተ ማቅዛና አቶዳነ? 16Ꮉየ፥ «ታኒ ኣፈ ማቆሰ ግሾ ጋላ ብልተ ባያ» ጋይኮ፥ ኤ ይኖ ጋይደ ግሾ ጋላፓ ፈቲ ብልተ ማቅዛና አቶዳነ? 17ጋላ ኡባ ኣፈ ጻላላ ማቅዛኮ፥ ኑ አኮራ ስኦደ? ማህ ጋላ ኡባ Ꮉየ ጻላላ ማቅዛኮ ኑ አኮራ ስንጎደ?

18የዝን ጾዚ ፋ ኮይዳን ጋራ፥ ጋላ ግዳ ዱማ ዱማ ብልቱንና ጋድዳ። 19ኡቡን ፈቲ ብልተ ማቅዛኮ ጋላ ዋይዝ የሳደ? 20የዝን ብልቱን ጋማ ማቅኮን፥ ጋላ ፈቶ።

21ኣፈ ኩሸጎ፥ «ነ ታስ ኮሾስ» ጋኦደስ ዳንዳኦስ። ዎይ ኦማ ቶሄጎ፥ «ነ ታስ ኮሾስ» ጋኦደስ ዳንዳኦስ። 22የዝን ቦዛ አዝዘ ጋላ ብልቱን ኑስ አ ኮሻነ። 23ቦንቾ ኮሾስ ጋእ ኑ ቆፕዘ ብልቱንፓ ባጉንና ጋማ ቦንቻነ። ማህ ኑ ቦርስዘ ኑ ጋላ ብልቱንና አ ቦንቺ ናጋነ። 24በአደራ ቦርሶሰ ጋላ ብልቱንስ ቦንቾ ኮሾስ። የዝን ጾዚ ኑ ጋላ ብልቱንና ዎል የል ቦርስዘ ብልቱንስ አዘ ቦንቾ እንግዳ። 25ጋላ ብልቱን ፈተ ፈተራ ሻኮ መካይዛራ ዎልስ ቆፖደ ጋር ማህ መዳ። 26ጋላ ብልቱንፓ ፈተ Ꮉርግንትኮ ብልቱን ኡባ ኤራ Ꮉርግንታነ። ጋላ ብልቱንፓ ፈተ ቦንችንትኮ ብልቱን ኡባ ኤራ ኡፋይታነ።

27ይን ኡቡን ክርስቶሳ ጋላ፤ ማህ ይን ፈተ ፈተ ኤ ብልተ። 28ዎሳ ኬተ ጾዚ፥ ቲኖ ሐዋሩንና፥ ላምእን ናቡንና፥ Ꮉይን አስታማሩንና፥ ማህ ክለ ባዝ ኦችዙንና፥ ፋዙንና፥ መሉንና ማድዙንና፥ ዎሳ ኬ አህዙንና፥ ዱማ ዱማ ዶናራ ኦህዙንና ዶርዳ።3

29ኡቡን ሐዋረ? ኡቡን ናበ? ኡቡን አስታማረ? ኡቡን ክለ ባዝ ኦቻነ? 30ኡቡንስ ፋዘ እሞ የነ? ኡቡን ዱማ ዱማ ዶናራ ኦህንታነ? ኡቡን ዱማ ዱማ ዶናራ ኦህዛኖ ብላነ? 31ይኒ ግሾ ኡባፓ አዘ እሞት ምን ኮዮተ።

ማህ ኡባፓ አዘ ኦግቶ ታ ይንታና ቤሳዳ።