Yoonaas 2

Kadhannaa Yoonaas

1Yoonaas garaa qurxummii keessaa Waaqayyoon Waaqa isaa kadhate. 2Innis akkana jedhe:

“Ani rakkina koo keessatti Waaqayyoon waammadhe;

innis deebii naaf kenne.

Ani gargaarsa barbaacha garaa siiʼool keessaa nan iyye;

atis iyya koo naaf dhageesse.

3Ati tuujubatti,

garaa galaanaatti gad na darbatte;

lolaanis na marse;

dambalii fi dhaʼaan kee

hundinuu narra garagalan.

4Anis, ‘Kunoo ani fuula kee duraa balleeffameera;

taʼus ani deebiʼee gara mana qulqullummaa keetii

qulqulluu sanaan ilaala’ nan jedhe.

5Bishaanonni na haguugan;

tuujubni immoo na marse;

aramaan galaanaas mataatti na marame.

6Ani gara hundee tulluuwwaniittin gad liqimfame;

balballi lafa jalaas bara baraan natti cufame.

Yaa Waaqayyo Waaqa ko,

ati garuu lubbuu koo boolla keessaa ol baafte.

7“Yaa Waaqayyo, yeroo lubbuun koo dadhabdetti

ani sin yaadadhe;

kadhannaan koos gara kee

gara mana qulqullummaa kee qulqullichaatti ol baʼe.

8“Warri waaqota tolfamoo faayidaa hin qabnetti cichan

araara Waaqaa irraa garagalu.

9Ani garuu faarfannaa galataatiin

aarsaa siif nan dhiʼeessa.

Ani wareegan wareege sanas nan baasa.

Anis, ‘Fayyinni Waaqayyo biraa dhufa’ ” nan jedha.

10Waaqayyos qurxummii sana ajaje; qurxummiin sunis lafa gogaa irratti Yoonaasin tufe.