Zabuuriiwwan 9

Murtii Allaaha

Dura buʼaa faarfattootaatiif; Yeedaloo, “Duʼa ilmaa” jedhamu. Zabuurii Daawud.

1Rabbii Allaah, ani garaa koo guutuudhaan sin galateeffadha;

waaʼee dinqii kee hundumaas nan odeessa.

2Ani sittin gammada; nan ililchas;

yaa Allaah Waan Hundaa Olii, faarfannaadhaan maqaa kee nan jajadha.

3Diinonni koo dugda duubatti ni deebiʼu;

ni gufatu; fuula kee duraas ni badu.

4Mirga koo fi dhimma koo qabatteerta;

atis murtii qajeelaa kennaa teessoo kee irra teesseerta.

5Saboota ifattee hamootas balleessiteerta;

maqaa isaaniis baraa hamma bara baraatti haqxeerta.

6Diinonni badiisa bara baraatiin balleeffamu;

ati magaalaawwan isaanii bubuqqifteerta;

seenaan isaaniis barbadeeffameera.

7Rabbii Allaahan garuu bara baraan ni moʼa;

teessoo isaas murtiidhaaf dhaabbateera.

8Inni qajeelummaadhaan addunyaadhaaf murtii ni kenna;

sabootas murtii qajeelaadhaan bulcha.

9Rabbii Allaahan warra cunqurfamaniif irkoo dha;

yeroo rakkinaattis daʼoo dha.

10Warri maqaa kee beekan si amanatu;

yaa Rabbii Allaah, ati warra si barbaadan gattee hin beektuutii.

11Rabbii Allaah isa Xiyoon irra jiraatu faarfannaadhaan jajadhaa;

hojii isaa illee saboota keessatti labsaa.

12Inni haaloo dhiigaa baasu sunis isaan yaadataatii;

iyya warra dhiphataniis hin irraanfatu.

13Rabbii Allaah, hammam akka diinonni koo na ariʼatan ilaali!

Naaf araaramiitii afaan boolla duʼaa keessaa na baasi;

14kunis ani karra Intala Xiyoon irratti

akka galata kee labsuu fi fayyisuu keettis

baayʼisee gammaduuf.

15Saboonni boolla qotan keessa buʼan;

miilli isaaniis kiyyoodhuma isaan dhoksaniin qabame.

16Rabbii Allaahan murtii qajeelaa kennuudhaan beekama;

hamoonni garuu hojii harka isaaniitiin kiyyoo seenu.

17Namoonni hamoon,

warri Allaah irraanfatan hundinuus siiʼoolitti gad buʼu.

18Rakkattoonni garuu yoom iyyuu hin irraanfataman;

abdiin hiyyeeyyiis bara baraan hin badu.

19Rabbii Allaah kaʼi; jabinni namaa hin mulʼatin;

fuula kee duratti sabootatti haa muramu.

20Rabbii Allaah, sodaa isaanitti buusi;

saboonnis akka namuma taʼan haa beekan.