Zabuuriiwwan 29

Zabuurii Gooftaa Bubbeetiif Dhiʼaate

Zabuurii Daawud.

1Isin jajjabeeyyiin, Rabbii Allaahaf fidaa;

ulfinaa fi jabina Rabbii Allaahaf fidaa.

2Ulfina maqaa isaatiif malu Rabbii Allaahaf kennaa;

iddoo qulqullummaa isaatti Rabbii Allaah waaqeffadhaa.

3Sagaleen Rabbii Allaah bishaanota irra jira;

Allaahan ulfinaa ni qaqawweessaʼa;

Rabbii Allaahan bishaanota baayʼee irratti ni qaqawweessaʼa.

4Sagaleen Rabbii Allaah humna qaba;

sagaleen Rabbii Allaah surra qabeessa.

5Sagaleen Rabbii Allaah birbirsa ni cabsa;

Rabbii Allaahan birbirsa Libaanoon ni caccabsa.

6Inni Libaanoonin akka jabbiitti,

Siiriyoonin immoo akka dibicha gafarsaatti ni utaalchisa.

7Sagaleen Rabbii Allaah

balaqqeessa bakakkaatiin rukuta.

8Sagaleen Rabbii Allaah gammoojjii sochoosa;

Rabbii Allaahan Gammoojjii Qaadesh sochoosa.

9Sagaleen Rabbii Allaah qilxuu micciira;

bosonas qullaatti hambisa.

Hundinuus mana qulqullummaa isaa keessatti, “Ulfina!” jedhee iyya.

10Rabbii Allaahan lolaa badiisaatiin olitti teessoo isaa irra taaʼa;

Rabbii Allaahan Mootii taʼee bara baraan teessoo isaa irra taaʼa.

11Rabbii Allaahan saba isaatiif jabina kenna;

Rabbii Allaahan saba isaa nagaadhaan eebbisa.