Biblica® Open Oromo Contemporary Scriptures 2024
Zabuuriiwwan 20
Duʼaa Mootiif Kadhatame
Dura Buʼaa Faarfattootaatiif. Zabuurii Daawud.
Guyyaa rakkinaatti Rabbii Allaahan deebii siif haa kennu;
maqaan Allaah Yaaʼikuubis si haa eegu.
Inni iddoo qulqulluudhaa gargaarsa siif haa ergu;
Xiyoon irraas jabina siif haa kennu.
Aarsaa kee hunda siif haa yaadatu;
qalma kee kan gubamus siif haa fudhatu.
Hawwii garaa keetii siif haa kennu;
karoora kee hundas fiixaan siif haa baasu.
Yommuu ati moʼattutti ililchinee
maqaa Allaah keenyaatiin faajjii keenya ol fudhanna.
Rabbii Allaahan waan ati kadhattu hundumaa siif haa kennu.
Ani akka Rabbii Allaahan dibamaa isaa fayyisu amma beeka;
Allaahan humna nama fayyisu kan harka isaa mirgaa keessa jiru sanaan
shamaayʼun isaa qulqulluu keessaa deebii ni kennaaf.
Namoonni tokko tokko gaariiwwan amanatu; kaan immoo fardeen amanatu;
nu garuu maqaa Rabbii Allaah keenyaa amananna.
Isaan gufatanii kufu; nu garuu ol kaana;
jabaannees ni dhaabanna.
Rabbii Allaah, ati mootiidhaaf moʼannaa kenni!
Yommuu nu si waammannuttis deebii nuu kenni!
Biblica® Open Oromo Contemporary Scriptures 2024. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.