Zabuuriiwwan 147

Zabuurii Allaah Waan Hunda Dandaʼuuf Faarfatame

1Haalleluuyaa.

Zabuuriidhaan Allaah galateeffachuun akkam gaarii dha;

isa galateeffachuun akkam gammachiisaa fi kan maluu dha!

2Rabbii Allaahan Yerusaalemin ni ijaara;

Israaʼeloota boojiʼamanis walitti qaba.

3Warra garaan cabe ni fayyisa;

madaa isaaniis walitti hodha.

4Inni baayʼina urjiiwwanii ni beeka;

tokkoo tokkoo isaaniis maqaa maqaadhaan waama.

5Gooftaan keenya guddaa dha; humni isaas jabaa dha;

hubannaan isaas dhuma hin qabu.

6Rabbii Allaahan warra gad qabaman ni jiraachisa;

hamoota garuu lafatti darbata.

7Galata galchaa Rabbii Allaah faarfadhaa;

baganaadhaanis Allaah keenyaaf weeddisaa.

8Inni shamaayʼuniiwwani duumessaan haguuga;

lafaafis bokkaa kenna;

tulluuwwan irrattis marga biqilcha.

9Horiidhaaf waan isaan dheedan,

yommuu ilmaan arraagessaa iyyanitti // nyaata isaaniif ni kenna.

10Inni jabina fardaatti hin gammadu;

yookaan miilli namaa isa hin gammachiisu;

11Rabbii Allaahan warra isa sodaatanitti,

warra araara isaa abdatanitti ni gammada.

12Yaa Yerusaalem, Rabbii Allaah galateeffadhu;

Yaa Xiyoon Allaah kee galateeffadhu.

13Inni danqaraa karra keetii ni jabeessaatii;

ijoollee kees si keessatti eebbisa.

14Daarii keetiif nagaa kenna;

qamadii qulqulluudhaanis si quubsa.

15Inni ajaja isaa gara lafaatti ni erga;

dubbiin isaas ni ariifata.

16Inni cabbii akkuma suufiitti diriirsa;

qorras akkuma daaraatti bittinneessa.

17Dhagaa cabbii akkuma cirrachaa gad darbata.

Dhaamocha isaa dura eenyutu dhaabachuu dandaʼa?

18Inni dubbii isaa ergee isaan baqsa;

bubbee isaa ni kaasa; bishaanonnis ni yaaʼu.

19Inni dubbii isaa Yaaʼikuubitti,

seeraa fi sirna isaa immoo Israaʼelitti mulʼiseera.

20Waan kana saba biraa tokkoof iyyuu hin goone;

isaan seera isaa hin beekan.

Haalleluuyaa.