Zabuuriiwwan 145

Allaahan Mootichaaf Galata Galchuu

Zabuurii Daawud.

1Yaa Allaah koo Mooticha, ani sin leellisa;

bara baraa hamma bara baraattis maqaa kee nan galateeffadha.

2Ani guyyuma guyyaan sin galateeffadha;

bara baraa hamma bara baraattis maqaa kee nan leellisa.

3Rabbii Allaahan guddaa dha; galateeffamuunis baayʼee malaaf;

guddina isaa qoratanii itti baʼuun hin dandaʼamu.

4Dhaloonni tokko dhaloota biraatti hojii kee ni hima;

hojiiwwan kee jajjaboos ni labsa.

5Isaanis waaʼee miidhagina ulfina qabeessa // surraa kee sanaa ni dubbatu;

anis waaʼee hojii kee dinqisiisaa sanaa irra deddeebiʼee // itti nan yaada.

6Isaan waaʼee hojii kee sodaachisaa sanaa ni odeessu;

anis guddina kee nan labsa.

7Isaan yaadannoo gaarummaa keetii baayʼisanii odeessu;

waaʼee qajeelummaa keetiis ililchanii faarfatu.

8Rabbii Allaahan arjaa fi gara laafessa;

inni aaruuf hin ariifatu; jaalalli isaas baayʼee dha.

9Rabbii Allaahan, nama hundaaf gaarii dha;

inni waan uume hundaaf garaa ni laafa.

10Rabbii Allaah, hojiin kee hundinuu si galateeffata;

qulqulloonni kees si leellisu.

11Isaan waaʼee ulfina mootummaa keetii ni odeessu;

waaʼee humna keetiis ni dubbatu;

12kunis akka namoonni hundi hojii kee humna qabeessa,

surraa ulfina qabeessa mootummaa kee sanaas beekaniif.

13Mootummaan kee mootummaa bara baraa ti;

bulchiinsi kees dhalootaa gara dhalootaatti darba.

Rabbii Allaahan dubbii isaa hundaan amanamaa dha;

hojii isaa hundaanis arjaa dha.

14Rabbii Allaahan warra kufan hunda ol qaba;

warra gad qabaman hundas ni kaasa.

15Iji nama hundaa si eeggata;

atis yeroo barbaachisutti nyaata isaaniif ni kennita.

16Ati harka kee balʼiftee

fedhii warra lubbuu qaban hundaa ni guutta.

17Rabbii Allaahan karaa isaa hundaan qajeelaa dha;

hojii isaa hundaanis arjaa dha.

18Rabbii Allaahan warra isa waammatan hundatti,

warra dhugaadhaan isa waammatan hundatti dhiʼoo dha.

19Inni fedhii warra isa sodaatanii ni guuta;

duʼaa isaanis dhagaʼee isaan oolcha.

20Rabbii Allaahan warra isa jaallatan hunda ni eega;

jalʼoota hunda garuu ni balleessa.

21Afaan koo Rabbii Allaah galateeffachuudhaan ni dubbata.

Uumamni hundinuu maqaa isaa qulqulluu sana

bara baraa hamma bara baraatti haa eebbisu.