Biblica® Open New Oromo Contemporary Version Latin 2022
Faarfannaa 120
Farra Nagaa
Faarfannaa Ol baʼuu.
Ani rakkina koo keessatti Waaqayyotti nan iyyadha;
innis deebii naa kenna.
Yaa Waaqayyo, afaan sobuu fi
arraba nama gowwoomsu jalaa na baasi.
Yaa arraba gowwoomsituu nana, maaltu siif kennama?
Kana caalaas maal godhamta?
Inni xiyya loltootaa kan qarameen,
barbadaa ibiddaa qacamaatiin si adaba.
Ani waanan Meshek keessa taaʼee
dunkaanota Qeedaar gidduu jiraadhuuf, anaaf wayyoo!
Warra nagaa jibban gidduu,
ani yeroo dheeraa jiraadheera.
Ani nama nagaa barbaadu dha;
isaan garuu yeroo ani dubbadhu lolaaf kakaʼan.
Biblica® Open New Oromo Contemporary Version Latin 2022. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.