Skip to content
BibleKenya

Ombo Traduction

Mlk 16

Ntondwa ya Yesu

(Mat 28.1-8; Luk 24.1-12; Yoa 20.1-10)

Ango asili Sabato*, Maliya ana Magadala la Salɔmɛ la Maliya nyɛŋɛnde la Yakɔbɔ basɔmbi bauta ba limbala aliko la nchwa nsuula e bionge be yesu. Luina la iinga mpendu, baiyisa e jombo eepaselo e yaani. E mboka baiki batalɔnjana bako amɛlɛ: «Nani atopaseya lingo libwɛ o lɔkukɛ la joombo?» Kinaki balɛndi baɛni libwɛ pa mpashema e lɔkukɛ, la jako liiki nde linɛnɛ.

Bango bainto, baingɛli o jombo, baɛni bompojo ɔmɔɔ, alɔti esenda yɛɛlɔ pɛɛ atayale boleka ba loome, ango ba wɛɛni bako bake ndawa. Kinaki ongo bomponjo aasimeli nte: «Kolawake nyo! Mbweya nte ataone nyo Yesu a Nasalɛti, ɔnɛ ajaki bako waalemba. Ombo sila ntondwa, achiki anɛ. Ndaka kaama kaiki bako bambo o laja. Kinaki, chwaka nyo lokosimele baeki bande la Pɛtɛlɛ nte Yesu ombo kotangolela nyo e Galilaya. Akondo wɛɛna nyo engo, ŋango akosimeli nyo ndako.» Kako nkango bango bainto bapasi ango e jombo lɔango baiki bata sɔkɛ la nsebalala. La koo nsimela bonto lalikuli ekambwa, aliko baiki la bɔɔma.

Yesu ombo pasela Maliya ana Magadala

(Mat 28.9-10; Yoa 20.11-18)

[Ango Yesu atondwe luina la iinga mpendu, aiɛnyisa obi ele Maliya ana Magadala. Ɔnɛ Yesu aopasisha basombo esamba ele. Ongo Maliya achwe nsimela baeki ba Yesu bango baolingitaki, bango baiki* elotoko batalele. Kinaki, ango aoki bako Maliya ana Magadala ombo asimela nte ɔwɛɛni Yesu la olende e luiko! Koo mbo wiimeya.

Yesu ombopasela baeki bande ba phee

(Luk 24.13-35)

Pa ango, Yesu apaseli Baeki* bande ba phee baiki batachu weebeli, aiki oke la inkinɛ yiima. Bango baeki bachwaki nde weebeli. Bango baeki baphee bautoli nchwa nsimela baina labɔ besako. Kinaki bango baina labɔ koo mimeya.

Yesu ombotoma Baeki joomu la ɔmɔɔ

(Mat 28.16-20; Luk 24.36-49; Yoa 20.19-23; Bsb 1.6-8)

Lonkinɛ, Yesu ombwiɛnya e baeki bande joomu la ɔmɔɔ, ango baiki bako batale. Ombwaaphangwela la mbwasimela: «Aliko laanke koo limimeya nyo la koo linanga nyo! Aliko laanke koo mimeya banɛ ba mɛni o luiko»?

E kantunda, Yesu aasimeli: «Chwaka nyo e wooni lalikuli, ataekya nyo besako be Kanamombe waanto lalikuli. Ɔnɛ aimɛya la mbatisama, ongo akondo kakolama. Kinaki ɔnɛ ole phaimɛya, ongo akondo chwa batande.

«La bango baimeyaka, bakondo kɛɛka bintɔmpɔ e bokuchu ba Kanamombe: bakondo itaka basombo babe la bakondo lɔndaka nsɔmwa ya kasende, bakondo kemela ndwa laakasa baɔ, la iya banywake lɔlɛngo, phayaakɛɛ ekambwa. Bakondo aphya bakasa eliko la bakɔnu la bakonu ba kondo ika».

Yesu ombuulela e loola

(Luk 24.50-53; Bsb 1.9-11)

Laango Yesu asili nɔnda la baeki bande bengo besao, ombo sakolama e loola, la ombo chwa njala o loome la Kanamombe. Bango baeki bande bachwe bataekya kaama lalikuli besako be Kanamombe. Yesu akambaki kaama kamɔɔ la bako la mbɔba ɔya bokuchu ba nkɛɛka bintɔmpɔ ike, o mɛnya nte besao beekyaki bako banto belende sɔlɔ].

Ombo Traduction. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.