Biblica® Open Nzema Word of Life Gospels & Psalms 1984
Edwɛndolɛ 99
Anyunlunyia Belemgbunli ne mɔɔ bɛkpogya ye zo la ye Ayɛlɛyelɛ
Nana Nyamenle di belemgbunli; bɛmaa maanle maanle muala ɛzulo. Ɔde ye belemgbunli ebia ne azo, ɔde abɔndeɛ kpokpoti mɔɔ lɛ ndɛbalɛ la anwo zo; bɛmaa azɛlɛ ɛkpusu.
Nana Nyamenle le bedevinli wɔ Zayɔn; bɛkpogya ye zo wɔ maanle maanle muala anwo zo. Awie biala ɛye ye kpoleyɛlɛ ne ɔ nee ye anyunlunyia duma ne ayɛlɛ! Ɔle Nwuanzanwuanza!
Belemgbunli katakyie, wɔmɔ mɔɔ ɛkulo pɛpɛlilɛ a; wɔmaa nɔhalɛlilɛ ɛzɔ ndinli; wɔbua nɔhalɛ ɔ nee tenlene ndɛne wɔ Yizilayɛ maanle nu. Bɛkpogya Nana Nyamenle, yɛ Nyamenle ne zo; bɛbutu ɔ gyakɛ abo bɛzonle ye! Ɔle Nwuanzanwuanza!
Mosisi nee Aalɔn anrɛɛ boka ye azɛlɛvolɛ ne mɔ anwo, Samoɛle noko bokale bɛdabɛ mɔɔ ɛnee bɛbɔ ye duma la anwo. Bɛzunle bɛvɛlɛle Nana Nyamenle, na ɔdaye noko ɔdiele bɛ. Ɔluale amungu totohyia ne anu ɔdendɛle ɔhilele bɛ; na bɛlile ye mɛla ne mɔ ɔ nee ye ngyehyɛlɛ ne mɔ mɔɔ ɔvale ɔmaanle bɛ la azo. O Awulae, yɛ Nyamenle, wɔmɔ ɛyɛle ɛnzolɛ ɛmaanle wɔ menli. Bɔbɔ ɛdeanle bɛ wɔ bɛ ɛtane ne mɔ anwo ɛdeɛ, noko akee ɛhilele bɛ kɛ, ɛle Nyamenle mɔɔ ɛfa ɛtane ɛkyɛ a.
Bɛkpogya Nana Nyamenle, yɛ Nyamenle ne zo, na bɛzonle ye wɔ ye Boka Nwuanzanwuanza ne azo! Ɔluakɛ Awulae, yɛ Nyamenle ne le Nwuanzanwuanza.
Biblica® Open Nzema Word of Life Gospels & Psalms 1984. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.