Edwɛndolɛ 87

Ayɛlɛyelɛ Edwɛne mɔɔ bɛfa bɛye Gyɛlusalɛm (Zayɔn) ayɛlɛ la

1Nyamenle maanle ne mɔɔ ɔkyekyele la wɔ Boka Nwuanzanwuanza ne azo. 2Nana Nyamenle kulo anlenkɛ ne mɔɔ kɔ Zayɔn la tɛla aako biala mɔɔ wɔ Gyekɔbo sua zo la.

3Anyunlunyia edwɛkɛ ngome yɛɛ bɛka ye wɔ ɛ nwo a. O Nana Nyamenle sua mɔɔ yekyekye la. 4Wɔ bɛdabɛ mɔɔ bɛze me la avinli, Yigyibiti ɔ nee Babelɔn yɛɛ mekakye bɛ a. Nea Filisitia, ɔ nee Taya ɔ nee Yiteɔpea, bɛka kɛ: “Sonla ɛhye, bɛwole ye wɔ ɛke.” 5Na bɛbaha ɛhye noko wɔ Zayɔn anwo kɛ: “Ɛhye ɔ nee ɛhye, bɛwole bɛ wɔ ye nu.” Ɔluakɛ Anwuma Nyamenle Bedevinli mumua ne bakyekye sua ne. 6Nana Nyamenle bahakye wɔ mekɛ mɔɔ ɔbadia menli ne mɔ la kɛ: “Ɛhye, bɛwole ye wɔ ɛke.” 7Edwɛndovoma ɔ nee agolesivoma bɔ nuhua ka kɛ: “Yɛ muala kpokpoti yɛ bo vi Zayɔn.”