Edwɛndolɛ 65

Nana Nyamenle ye Tumi nee ye Atiakunlukɛnlɛmayɛlɛ ne

1O Zayɔn Nyamenle, wɔmɔ yɛɛ ayɛlɛyelɛ le wɔ deɛ a; wɔmɔ yɛɛ bɛbɔ wɔ ɛwɔkɛ a, ɔwɔ kɛ bɛdi zo a. 2O wɔmɔ mɔɔ ɛtie nzɛlɛlɛ a! Ewiade amra kpokpoti bara wɔ ɛkɛ. 3Ɔlua ɛtaneyɛlɛ ti, saa yɛ ɛtane bo yɛ nwo zo a, wɔmɔ ɛfa ɛkyɛ yɛ. 4Nyilalɛ ɛha ahenle ne mɔɔ wɔmɔ wɔye ye kɛ ɔrɛla ɛ nwo, na ɔradɛnla wɔ belemgbunli aako ne anu la! Yɛ kunlu badwo wɔ kpalɛyɛlɛ nwo wɔ wɔ aako, wɔ Asɔne Sua Kpole nwuanzanwuanza ne anu! 5Wɔmɔ yɛɛ ɛlua nwanwanendeɛ zo ɛdie yɛ ngoane a, O yɛ pepɛdievolɛ Nyamenle. Wɔmɔ yɛɛ ɛle azɛlɛ ye azo ɔ nee nyevile nzi moamoa nehane amra bɛ anyelazo a.

6Wɔmɔ ɛlua wɔ anwosesebɛ zo wɔsisi awoka, na wɔva tumi wɔhye ɛ bo. 7Wɔmɔ yɛɛ ɛmaa nyevile da dii, na ɛmaa ye azɛlɛkye yɛ ngungoonwu, na ɛka menli begyebegyeyɛlɛ aze a. 8Zɔhane ati bɛdabɛ mɔɔ bɛde azɛlɛ ne ako abo nehane la, nwu ɛ sa anloa sɛkɛlɛndeɛ ne mɔ, na ɛzulolɛ ka bɛ. Ɛmaa alehyenlɛ nee aledwolɛ fa fɛlɛko teɛdea nu, wɔ bɛ ɛhɔlɛ nee bɛ ɛrale nu. 9Ɛtɔ nzule ɛgua azɛlɛ ye azo, na ɛmaa ɔkye aleɛ; ɛmaa azundenle muala yiyi na ɛmaa aleɛ ba; ɔluakɛ kɛ wɔ ngyehyɛleɛ ne de la ɛne. 10Ɛmaa ezuzeane kpokpoti yiyi, na ehinlima ne mɔ azo yeye bɛ nwo ali; ɛfa kyɛngyɛ nzule ɛdo azɛlɛ ne, na ɛmaa mbaka kpokpoti so ma. 11Ɛmaa aleɛ bu wɔ ɛvolɛ ne anu; na ɛleka biala mɔɔ ɛkɛva la le aleɛ ngome. 12Ndile muala yɛ amunli, na awoka nye anwo amuala yɛ anyelielɛ. 13Nyɛmoa kpolane fa azɛlɛ ne kpokpoti azo; mbɔnza ne mɔ amuala wula aleɛ kɛ asɛɛ bɛhedɛheda ndanlɛ la. Bɛ muala bɛbɔ nu, bɛteɛdea nu, bɛto edwɛne wɔ fɛlɛkolilɛ nu.