Edwɛndolɛ 60

Yizilayɛ ye Ɛpepɛlielɛ Nzɛlɛlɛ

1O Awulae Nana Nyamenle, wɔkpo yɛ, wɔbubu yɛ bɔkɔbɔkɔ; wɔva yɛ nwo ɛya. O akee kakyi ɛ nye nea yɛ. 2Wɔmaa azɛlɛ ɛwozo, na wɔmaa yegyigya; siezie bɛ fofolɛ, ɔluakɛ bɛhyeɛhyea. 3Wɔmaa wɔ menli ɛnwu bɛ nyunlu somaa; wɔmaa yɛnlo nza ɛmaa yedinda yɛ.

4Wɔbɔ bɛdabɛ mɔɔ bɛsulo wɔ la kɔkɔ ɛsesebɛ ɛsesebɛ; amaa bɛanriandi bɛavi ndɛnebualɛ ne anu. 5Tie yɛ nzɛlɛlɛ, na fa wɔ tumi ne die yɛ; die wɔ kulovolɛma. 6Nyamenle ɛdendɛ ɛvi ye tɛnlabelɛ nwuanzanwuanza ne anu kɛ: “Wɔ anyelielɛ nu yɛɛ mebahye Hyikɛm azɛlɛ ne, ɔ nee Sɛko Bɔnza ne anu meamaa me menli a. 7Geleade le me deɛ; Manasɛ le me deɛ; Yifelaem le me ti dansɛne kyɛlɛ; yɛɛ Dwuda le me belemgbunlililɛ kpɔma. 8Mebava Mowabe meayɛ kyɛnze mɔɔ menrinzi me sa wɔ nu a; na meavuandi me mgbɔlaboa meagua Yidɔm anwo zo, meava meahile kɛ medame a melɛ ye a. Wɔ konimlilɛ nu, yɛɛ mebadea nu meagua Filisitiama anwo zo a.”

9Nwane a kɛhola kɛva me kɛhɔ sua ne mɔɔ bɛlie nwolɛ bane la azo a? Nwane a kɛli me nyunlu kɛhɔ Yidɔm sua zo a? 10O Nana Nyamenle, amgba ala ɛtɛkpole yɛ ɔ? Ɛnrɛli yɛ nyunlu ɛ nee yɛ ɛnrɛhɔ ɛnrɛhɔho ɛnrɛtia yɛ kpɔvolɛma ɔ, O Nana Nyamenle? 11O maa yɛ moalɛ maa yɛho yɛtia yɛ kpɔvolɛma; ɔluakɛ sonla dasanli ye moalɛ le gyɛne!

12Sumunli kenle ala mɔɔ Nyamenle wɔ yɛ afoa la, yɛbaho kɛ mrenyia; na yemɔ Nyamenle, yɛɛ ɔbatietia yɛ kpɔvolɛma anwo zo a.