Biblica® Open Nzema Word of Life Gospels & Psalms 1984
Edwɛndolɛ 54
Nyamenle ne mɔɔ boa Nyanenwuvolɛma la
Dua wɔ duma ne anu die me, O Nana Nyamenle; na fa wɔ tumi ne di me edwɛkɛ maa me. Tie me nzɛlɛlɛ, O Nana Nyamenle, na yɛ ɛnzolɛ maa me. Ɔluakɛ mgbanyizonleyɛvoma ɛdwazo ɛtia me, bɛkpondɛ bɛazɛkye me; bɛmbu Nana Nyamenle bie hweledede.
Nea, Nana Nyamenle a le me Boavolɛ a; Awulae yɛɛ me ngoane wɔ ɔ sa nu a. Ɔbamaa me kpɔvolɛma bɛ munzule abɔ bɛ ti zo; wɔ wɔ nɔhalɛlilɛ ne anu, minli me kpɔvolɛma abo zo bɔkɔɔ. Mebayeye me ahonle nu wienyi meabɔ azu meamaa wɔ. Mebava moyɛlɛ meaye wɔ duma ayɛlɛ, O Nana Nyamenle, ɔluakɛ ɔfɛta.
Wɔye me wɔvi ngyegyelɛ muala anu, na wɔmaa menwu me konimlilɛ wɔ me kpɔvolɛma anwo zo.
Biblica® Open Nzema Word of Life Gospels & Psalms 1984. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.