Edwɛndolɛ 52

Menli mɔɔ fa ninyɛmunliyɛlɛ tu bɛ nwo la bɛ awieleɛ

1Duzu ati a ɛtu ɛ nwo a, sonla kakanyinli, wɔ amumuyɛ mɔɔ wɔyɛ wɔtia Nyamenle mra la anwo ɛ? Alehyenlɛ ne amuala, ɛdwenle bɛ ɛzɛkyelɛ nwo. 2Ɛ tafinlima pɛ kɛ dadeɛ dɛma, wɔmɔ deɛsɛkyevolɛ. 3Ɛkulo ɛtaneyɛlɛ ɛtɛla kpalɛyɛlɛ; yɛɛ adalɛbɔlɛ ɛtɛla nɔhalɛlilɛ. 4Adalɛ nabalabanli! Wɔmɔ azafule a dahuu ɛkulo kɛ ɛkɛwɔ menli a.

5Zɔhane ati Nyamenle babubu wɔ nu dwɔkɔdwɔkɔ; ɔbayɛ wɔ ɛkɛ ne yeatete wɔ nu yeavi wɔ aako nu; ɔbadu ɛ bo twi kɛ bɛtu ndile la yeavi azɛlɛ ye azo. 6Tenlenema banwu ye, na bɛazulo ye; bɛbazɛlɛ ye bɛaha kɛ, 7“Bɛnlea sonla ne mɔɔ ɔnva Nyamenle ɔnyɛ ɛhwee, na emomu ɔvale ɔ rɛle ɔwulale ye agyapandeɛ molozo ne anu, na ɔvale ye anwonyia ne ɔbɔle ɔ nwo bane la!”

8Na mame, mele kɛ ɔlivi baka dokodoko mɔɔ ɛlɛnyi wɔ Nyamenle aako nu la. Mefa me rɛle mewula Nana Nyamenle ye ɛhulolɛ kpundii ne mɔɔ ɔnlɛ awieleɛ la anu. 9Mebayɛ wɔ mo dahuu, kɛmɔ dahuu ɛyɛ ɛmaa me la. Mebava me anyelazo meawula wɔ duma ne anu, duma ne mɔɔ kpalɛyɛlɛ ngome ɛyi ye tɛkɛɛ wɔ wɔ kulovolɛma anyunlu la.