Biblica® Open Nzema Word of Life Gospels & Psalms 1984
Edwɛndolɛ 47
Belemgbunli ne mɔɔ ɛdu ɛhɔ anwuma la ye Edwɛndolɛ
Bɛ muala bɛbɔ bɛ sa nu! Bɛva fɛlɛkolilɛ bɛdeɛdea nu bɛdo edwɛne bɛmaa Nana Nyamenle! Ɔluakɛ Nyamenle Bedevinli ne mɔɔ wɔ anwuma la anwo yɛ ɛzulolɛ, aleɛabo amuala bɛ belemgbunli ɔ. Ɔbɛlɛ menli muala aze, na ɔfa maanle maanle muala ɔwula yɛ gyakɛ abo. Yemɔ a ɔsie agya ɔmaa yɛ a; yemɔ mɔɔ ɔvale Gyekɔbo ɔdule ɔ nwo na eza ɔhulole ye la.
Nana Nyamenle ɛva anyelielɛ ɛvo ɛhɔ anwuma; bɛva aweɛne ɛnelɛ bɛ nee Awulae ɛhɔ. Bɛdo ayɛlɛyelɛ edwɛne bɛmaa Nyamenle, bɛdo ayɛlɛyelɛ edwɛne! Bɛdo ayɛlɛyelɛ edwɛne bɛmaa yɛ Belemgbunli ne. Bɛdo ayɛlɛyelɛ edwɛne! Ɔluakɛ Nana Nyamenle le ewiade amuala kpokpoti belemgbunli; bɛdo ayɛlɛyelɛ edwɛne bɛye ye ayɛlɛ! Nana Nyamenle di aleɛabo amuala belemgbunli; Nana Nyamenle de ye belemgbunli ebia nwuanzanwuanza ne azo. Arelemgbunli mra mrenyia ɛhuohua bɛ nloa kɛ Ebileham ye Nyamenle menli la. Ɔluakɛ ewiade anu konle wowandeɛ kpokpoti le Nana Nyamenle deɛ; yemɔ yɛɛ bɛkpogya ye zo anwuma anwuma a.
Biblica® Open Nzema Word of Life Gospels & Psalms 1984. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.