Biblica® Open Nzema Word of Life Gospels & Psalms 1984
Edwɛndolɛ 34:8
Verse 8 is marked below, with the whole chapter around it. Read from the start
Ayɛlɛyelɛ Edwɛne mɔɔ bɛfa bɛsɛlɛ Ɛpepɛlielɛ la
Mebahanvo Nana Nyamenle dahuu; mebahanvo ye anyunlunyia nee ye ɛlolɛ ne dahuu biala. Mebahanvo Nana Nyamenle wɔ mɔɔ yeyɛ yemaa me la anwo; amaa bɛdabɛ mɔɔ bɛlɛdi nyane la ade bie, na bɛ rɛle akyekye. Bɛmaa yɛbɔ nu yɛhanvo Nana Nyamenle ye bɛdevinliyɛlɛ ne; bɛmaa yɛyɛ ko yɛyeyɛ ye duma ne!
Ɔluakɛ menzunle menvɛlɛle Nana Nyamenle, na ɔdiele me; ɔliele me ɔvile me ɛzulolɛ muala anu. Bɛdabɛ mɔɔ bɛwɔ akɛlɛyɛlɛ bo la kpondɛ ɔ nzi adenle, na bɛdi fɛlɛko. Ɔnye bɛ rɛle ɔndo bɛ sa nu ɛlɛ. Ehyianli su fɛlɛ Nana Nyamenle, na ɔtie ye; ɔdie ye ɔfi ngyegyelɛ nu. Ye anwumabɔvolɛma sinza bɛdabɛ mɔɔ bɛtie ɔ ne la; na ɔpepɛ ɔdie bɛ ɔfi munzule nu.
O, bɛzɔ Nana Nyamenle atiakunlukpalɛyɛlɛ ne bɛnlea! Nyilalɛ ɛha bɛdabɛ mɔɔ bɛdie ye bɛdi la. O Nana Nyamenle anwodelɛma, bɛzulo Awulae; ɔluakɛ debie biala ɛngyia bɛdabɛ mɔɔ bɛsulo ye la. Ehyia nee ɛhɔne tɔ awenade kunlu; noko bɛdabɛ mɔɔ bɛsonle Awulae la ɛdeɛ, debie biala ɛngyia bɛ ɛlɛ.
Bɛrɛla, me mra; bɛradie me! Na mebahile bɛ kɛ ɔwɔ bɛsi bɛdi Awulae eni, na bɛsulo ye la. Bɛ nuhua ne boni yɛɛ ɛngulo ngoane tendenle a? Nwane a ɛngulo kɛ ɔkɛdɛnla aze ɔkɛhyɛ na ɔkɛli fɛlɛko a? Ɛnee noko bɛli bɛ tafinlima eni, na bɛgyakyi adalɛbɔlɛ. Bɛhwe bɛ nwo bɛvi ɛtaneyɛlɛ nwo, na bɛyɛ kpalɛ; bɛkpondɛ anzondwolɛ bo zo, na bɛli ɔ nzi.
Nana Nyamenle anye wɔ tenlenema anwo zo dahuu; ɔbuke ɔ nzo ɔtie bɛ ɛzunlɛ. Emomu ɔ nye sa ɛtanevolɛma; ɔminli bɛ bo zo bɔkɔɔ mɔɔ bɛngakye bɛ ɛlɛ a. Tenlenema su fɛlɛ Nana Nyamenle, na ɔdaye noko ɔtie bɛ; ɔpepɛ ɔdie bɛ wɔ bɛ ɛvɛlɛ muala anu.
Nana Nyamenle dahuu bikye bɛdabɛ mɔɔ bɛ rɛle ɛbɔ la; ɔdie bɛdabɛ mɔɔ bɛnlɛ anyelazo biala la ngoane. Tenlenenli biala anwo ɛmkpa anwongyelelɛ nu ɛlɛ; noko akee Nana Nyamenle ye ye fi ɔ muala anu. Ɔfa ye ɔsie kpalɛ, ammaa yeamkpɔlɔ; ɔmmaa ye mbowule ne mɔ anu ko bɔbɔ anwo ɛmbu ɛbonle.
Ɛtaneyɛlɛ bahu atiakunlunwonlema: na bɛdabɛ mɔɔ bɛkyi tenlenema la bɛmɛ bɛbabua bɛ ndɛne fɔlɛ. Nana Nyamenle balie ye menli ngoane; na bɛdabɛ mɔɔ bɛfa bɛ rɛle bɛwula ye nu la ɛdeɛ, bɛnrɛbua bɛ ndɛne fɔlɛ.
Biblica® Open Nzema Word of Life Gospels & Psalms 1984. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.