Edwɛndolɛ 28:7

Devidi ye Nzɛlɛlɛ mɔɔ ɔvale ɔzɛlɛle ɛpepɛlielɛ

1Wɔmɔ a mesu mefɛlɛ wɔ a, O Nana Nyamenle, me bodane! Tie me modolɛ; saa wɔambua me a, mebawu meaminli me ɛkɛla. 2Saa mesu mefɛlɛ wɔ a, mekɛ mɔɔ menwɔmaa me sa zo menwɔhile wɔ nwuanzanwuanzaleka ne la, tie me ne.

3Mmafa me ɛfonla atiakunlutanevolɛma nee amumuyɛvoma, mɔɔ anzondwolɛ nwo adwelielilɛ la bɛ nloa dahuu, noko akee ɛtane nee maanzonlehwenlɛ ɛyi bɛ ahonle nu tɛkɛɛ la anwo ɛtea bɛ. 4Twe bɛ nzo! Twe bɛ nzo wɔ bɛ nyɛleɛ evinli evinli mɔɔ bɛyɛ la anwo. Tua bɛ nyɛleɛ nwo kakɛ; tua bɛ kakɛ kɛmɔ ɔfɛta la! 5Ɔluakɛ bɛmbu Nana Nyamenle bie, na bɛabu ɔ sa anloa gyima la ati, ɔbadwulu bɛ yeagua, mɔɔ bɛnzi bɛ bieko a.

Devidi ye Konimlilɛ edwɛne wɔ Awulae moalɛ nwo

6Nyilalɛ ɛha Nana Nyamenle; ɔboalekɛ yedie me nzɛlɛlɛ. 7Nana Nyamenle le me sinzavolɛ nee me wowavolɛ; melɛ diedi wɔ ye nu. Ɔboa me na ɔmaa me nye die. Ɛhye ati mebava fɛlɛkolilɛ meado edwɛne meahanvo ye. 8Nana Nyamenle wula ye menli anwosesebɛ; ɔko ɔdie ye belemgbunli ne mɔɔ yezie ye la, na ɔdie ye ngoane.

9Die wɔ menli ngoane, O Awulae, na yileyila wɔ agyapadeɛ. Yɛ bɛ mboaneneavolɛ, na nea bɛ nwo zo wɔ melɛ mɔɔ ɔnlɛ awieleɛ.