Edwɛndolɛ 24

Anyunlunyia Belemgbunli ne Edwɛndolɛ

1Aleɛabo nee ninyɛne mɔɔ wɔ nu la kpokpoti le Nana Nyamenle deɛ; ewiade ye nee nuhua menli kpokpoti le ye deɛ. 2Yemɔ a bɔle anwomanyunlu, mɔɔ zinze azɛlɛ ye azo azumgbole ne mɔ anye, na ɔdole ɔ bo wɔ nyevile mgbole ne mɔ azo a.

3Nwane a fɛta Nana Nyamenle anyunlu ɛhɔlɛ a? Nwane a lɛ adenle kɛ ɔkɛhɔ ye Asɔne Sua Kpole nwuanzanwuanza ne anu a? 4Mɔɔ ye ahonle nu nee ye nyɛleɛ nwo te saanwu; na ɔ ti akunlu le fufule, mɔɔ ɛnzonle awozonle, anzɛɛ ɛnli amonle, na ɔnga ndane mgbane mgbane la, 5yemɔ a banyia nyilalɛ yeavi Awulae ɛkɛ a; yemɔ a Nana Nyamenle Ngoanedievolɛ ne babua ye benle ndɛne a. 6Zɛhae menli ye a lɛ adenle kɔ Awulae anyunlu a; zɛhae menli ye a ta Gyekɔbo Nyamenle ne anyunlu ɛhɔle a.

7Bɛbukebuke, O nlenkɛ mgbole! Bɛbukebuke wowanaanwo, O bɛmɛ tete nlenkɛ! Na bɛmaa anyunlunyia Belemgbunli ne ɛrɛla nu. 8Nwane a le anyunlunyia Belemgbunli ɛhye? Yemɔ a le Awulae bedevinli, anwosesebevolɛ ne, Nana Nyamenle, konle nu katakyie konimdivolɛ ne. 9Bɛbukebuke, O nlenkɛ mgbole! Bɛbukebuke wowanaanwo, O bɛmɛ tete nlenkɛ! Na bɛmaa anyunlunyia Belemgbunli ne ɛrɛla nu.

10Ɛnee nwane bɔbɔ a le anyunlunyia Belemgbunli ɛhye? Konimdivolɛ, Safohyenle Nana Nyamenle ne ɔ; yemɔ a le Anyunlunyia Belemgbunli ne a!