Biblica® Open Nzema Word of Life Gospels & Psalms 1984
Edwɛndolɛ 149
Yizilayɛ Konimdivolɛ ne ye Edwɛne
Bɛye Nana Nyamenle ayɛlɛ! Bɛdo edwɛne fofolɛ bɛmaa Awulae; bɛye ye ayɛlɛ wɔ ye menli nɔhavoma ayiaku ne anu!
Bɛmaa Yizilayɛ anye ɛlie, wɔ ye Bɔvolɛ ne anu; bɛmaa Zayɔn amra ɛli fɛlɛko wɔ bɛ belemgbunli ne anu! Bɛmaa bɛva agolezilɛ bɛye ye duma ne ayɛlɛ; bɛmaa bɛbɔ ahenle ɔ nee sanwunle bɛva bɛye ye ayɛlɛ!
Ɔluakɛ Awulae lɛ fɛlɛkolilɛ wɔ ye menli nu; na ɔfa konimlilɛ wɔ enililɛ nu ala ɔbɛlɛ anwoazehanlɛma. Bɛmaa tenlenema ɛmaa bɛ nwo ɛzande bɛ wɔ anyunlunyia nu; bɛmaa bɛdo fɛlɛkolilɛ edwɛne wɔ nɔe ne amuala wɔ bɛ nwɔhoalilɛleka ne mɔ.
Bɛmaa Nana Nyamenle ye ayɛlɛyelɛ mgbole mgbole ne mɔ ɛwa bɛ kominza abo na bɛva bɛ atwɛ ati-nwiɔ ne mɔ bɛdedɛ bɛ sa nu; kɛ bɛfa bɛahomo maanle maanle ne mɔ anwo zo, na bɛahwi menli ne mɔ anyunlu; kɛ bɛfa nwɔnzɔnwɔnzɔ bɛagua bɛ arelemgbunli ne mɔ, na bɛagua bɛ mgbanyima ne mɔ mɔɔ gyigyi bɛ ti la bulalɛ nwɔnzɔnwɔnwɔ; na bɛadea maanle maanle ne mɔ kɛmɔ Nana Nyamenle ɔdaye yehyehyɛ la!
Ɛhye a le Nana Nyamenle ye tenlenema ne mɔ bɛ konimlilɛ nee anyunlunyia a.
Bɛye Awulae Ayɛlɛ!
Biblica® Open Nzema Word of Life Gospels & Psalms 1984. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.