Edwɛndolɛ 142

Devidi ye Nzɛlɛlɛ wɔ Adulam Bolɛ tokule ne anu

1Mefa me ne mesu mefɛlɛ Awulae moalɛ; me ne yɛɛ mefa mesɛlɛ memaa Nana Nyamenle a. 2Mefa me ngyianlɛdwɛkɛ muala meto ɔ nyunlu; meka me anwongyelelɛ kpokpoti mekile ye. 3Saa me ɛkɛla ne anye zo bulu ye a ɔdaye ɔze deɛ mɔɔ ɔwɔ kɛ meyɛ a. Wɔ adenle kpolomgbolo ne mɔɔ melua nu la anu, me kpɔvolɛma ɛzuozua me ngane ɛveɛvea nu. 4Saa meto me nye wɔ me sa fema zo a mennwu boavolɛ biala; awie biala ɛnle ɛkɛ ne mɔɔ bazinza me a. Awie biala ɛmbu me nwo mgbonda bɔbɔ. 5O Nana Nyamenle, mesu mefɛlɛ wɔ; wɔmɔ Awulae yɛɛ ɛle me sinzavolɛ a. Wɔmɔ yɛɛ ɛle me anyelazo mɔɔ mekpondɛ ye wɔ ewiade anu a.

6Yɛ ɛnzolɛ tie me ɛzunlɛ, ɔluakɛ me nye ɛdudu ɛgua zolɛ! Die me ngoane fi me kpɔvolɛma asa anu, ɔluakɛ bɛ anwosesebɛ bo me nwo zo somaa! 7Ye me fi nyanelilɛ nu; amaa meava moyɛlɛ meamaa wɔ duma ne wɔ wɔ menli ayiaku ne anu! Tenlenema babɔ me nwo mgbɔlɛka ayia, ɔlua wɔ atiakunlukpalɛ ne mɔɔ wɔ me nwo zo la ati.