Edwɛndolɛ 140

Sonla ye Kpɔvolɛma asa anu ɛvilɛ

1O Nana Nyamenle, pepɛ die me fi ɛtanevolɛma asa anu; na fa me sie fi amumuyɛvoma asa anu. 2Alehyenlɛ muala bɛdwenle adwenle ɛtane wɔ bɛ ahonle nu, na bɛfa butule nee konle bɛba dahuu. 3Bɛ tafinlima yɛ nla kɛ tenkɛ; na bɛ nloa edwɛkɛ yɛ ɛnwonle kɛ ayidane. 4O Nana Nyamenle, bɔ me nwo bane fi kpɔvolɛma tumi nu; fa me sie fi nzakatovoma asa anu, bɛmɛ mɔɔ bɛfa me azedɔlɛ nwo akpame la. 5Mgbanyizonleyɛvoma ɛzua me ɛhane; bɛtoto bɛ adwenle nzuzulɛ ɛtane ne mɔ boɛ bɛwie, na wɔ adenle ne foa nee foa, bɛdɛlɛdɛlɛ bɛ asawu ne mɔ anu kɛ bɛfa bɛahye me.

6Mese Nana Nyamenle kɛ, “Wɔmɔ yɛɛ ɛle me Nyamenle a.” Yɛ ɛnzolɛ maa me ne nee me nzɛlɛlɛ, O Awulae! 7O Nana Nyamenle, me Nyamenle, me sinzavolɛ anwosesebɛvolɛ. Wɔmɔ a ɛhedale me ti zo wɔ konle nu a. 8O Nana Nyamenle, mmamaa atisesebɛvoma asa ka bɛ ngyianlɛndeɛ, mmamaa bɛ akpame ɛtane ne mɔ di munli. 9Me kpɔvolɛma ɛmemaa bɛ ti zo; noko akee maa bɛ ɛnwunlonwunlanlɛ ne mɔ ɛzia ɛrɛla bɛdabɛ bɛ nwo zo. 10Maa samɛnlakɛ gɔhyee ɛdudu ɛgua bɛ nwo zo; na maa bɛzuhu bɛ bɛgua ewule kuma nu mɔɔ bɛndwazo bieko la.

11Mmamaa bɛdabɛ mɔɔ bɛtende bɛ sa wɔ awie mɔ anwo zo adalɛ nu ala la nyia ngɔzo; maa ɛtane ɛva amumuyɛvoma aze na ɔbɔ bɛ bo zo bɔkɔɔ. 12O Nana Nyamenle, meze kɛ ɛdi ɛboa menli mɔɔ wɔ nyane nu la, na ɛbua ndɛne tenlene ɛmaa ehyiavolɛma. 13Nɔhalɛ nu, Nyamezulolɛma bava moyɛlɛ amaa wɔ duma ne; na tenlenema noko akpondɛ tɛnlabelɛ wɔ wɔ nu.