Biblica® Open Nzema Word of Life Gospels & Psalms 1984
Edwɛndolɛ 128
Abusua nu Nyilalɛnyianlɛ Edwɛndolɛ
Nyilalɛ sonla a le ahenle ne mɔɔ sulo Nana Nyamenle, na ɔfa ye mɛla ne mɔ ɔbɔ ye ɛbɛla la.
Bɛbali ɛ sa anloa gyima ne abo ma ne bie; ɛbanyia ahomeka, na wɔahɔ ye boɛ. Ɛ ye bayɛ kɛ nwanye baka mɔɔ so ma la wɔ wɔ aako nu; yɛɛ ɛ mra bayɛ kɛ ɔlivi ndinli la, abɔ wɔ ɛkponle ne anwo ayia. Nɔhalɛ nu, sonla ne mɔɔ tie Nana Nyamenle ane la, yɛɛ nyilalɛ mɔɔ le kɛ ɛhye la bara ɔ nwo zo a.
Nana Nyamenle ɛyila wɔ ɛvi Zayɔn! Ɔmaa ɛnwu Gyɛlusalɛm ye ngɔzo, wɔ wɔ ngoane mekɛ ne amuala anu! Ɔmaa ɛdɛnla ngoane nu na ɛnwu ɛ ra akunlu ralɛ! Anzondwolɛ ɛha Yizilayɛ!
Biblica® Open Nzema Word of Life Gospels & Psalms 1984. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.