Runyankore - Rukiga Bible 1964
Zekaria 7
Zekaria okubagambira eby'okwesiibyakwo okw'oburyarya
Omu mwaka gwa kana ogw'omu busingye bw'omugabe Dario, ekigambo kya MUKAMA kikaija ahari Zekaria aha kiro kya kana ky'okwezi kwa mwenda okurikwetwa Kisileevi. 1 Omu biro ebyo aba Beseeli bakaba batumire Sharezeeri na Regyemu-meleki n'abashaija baabo kweshengyereza MUKAMA kubagirira embabazi, 2 n'okubuuza abanyamurwa b'enju ya MUKAMA ow'amahe na baanabi, bati: Tushemereire kuza omu magyenyi n'okwesiibyakwo omu kwezi kwa kataano, nk'oku tubaire nitugira omu myaka egi yoona? Bwanyima ekigambo kya MUKAMA ow'amahe kyanyijaho nikigira kiti: 3 Gambira abantu b'omuri egi nsi boona n'abanyamurwa oti: Obu mwabaire mwesiibyakwo, mukaza omu magyenyi omu kwezi kwa kataano n'okwa mushanju omuri egyo myaka makumi mushanju, obwo niinye mwabaire mwesiibizakwo? 4 Kandi ku murya, mwanywa, timweriira mukeenywera? 5 Ebyo tibyo MUKAMA yaagambire naaraba omuri baanabi aba ira, obu Yerusaalemu yaabaire ekitwirwemu, ekigogyeire kandi ekyehinguririziibwe endembo zaayo, n'ensi y'obukiizi-bwa-buryo bikitwirwemu?
Ekigambo kya MUKAMA kyagaruka kyaija ahari Zekaria nikigira kiti: 6 Oku nikwo MUKAMA ow'amahe arikugamba naagira ati: Mucwe emanja z'oburyo, buri muntu agirire mwene waabo embabazi n'esaasi. Murekye kuhata abafaakazi, efuuzi, abashuuhuuki n'abooro; kandi harekye kugira n'omwe omuriimwe owaagirira omwene waabo enaama mbi omu mutima gwe. 7 Kwonka baayanga kuhurira, baatunika amabega, baayereebera kuriya, amatu baagahenderamu ebiti, ngu batampurira. 8 Baagangaaza emitima yaabo nk'amabaare, ngu batahurira ebiragiro bya MUKAMA ow'amahe, n'ebigambo ebi yaabatumireho Omwoyo we, naaraba omuri baanabi aba ira. Nikyo ekiniga kingi kyarugiire ahari MUKAMA ow'amahe. 9 MUKAMA naagira ati: Nk'oku naabeetsire, bakanga kuhurira, nikwo nabo baanyetsire, nkanga kubahurira, 10 nkabataataanisisa omuyaga gw'akasooroora omu mahanga goona, agu batakamanyaga. Okwo nikwo ensi ei baatsigireho yaahindukire eihamba, ekabura owaagirabamu naagyenda nari naagaruka; etyo egyo nsi erikukundwa yaahinduka eihamba.
Source notes (10)
- Cross-reference 1 Sam 13:12; Mal 1:9.
- Cross-reference 2 Bag 25:8; Zek 12:12.
- Cross-reference 2 Bag 25:25; Isa 58:4, 5; Zek 1:12.
- Cross-reference 1 Kor 11:20, 21.
- Cross-reference Yer 17:26.
- Cross-reference Kur 22:21, 22; Enf 22:22; Yer 5:28; 21:12; Mik 6:8; Mat 23:23.
- Cross-reference Neh 9:29.
- Cross-reference 2 Bus 36:16; Neh 9:30; Ezk 11:19.
- Cross-reference Enf 1:24-28; Yer 11:11.
- Cross-reference Ezk 12:15, 19; Zef 3:6.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.