Runyankore - Rukiga Bible 1964
Yeremia 20
Pashuri okuta Yeremia omu kihome
Kandi Pashuri omunyamurwa, mwene Imeri owaabaire ari omutegyeki mukuru omu nju ya MUKAMA, yaahurira Yeremia naahanuura ebigambo ebyo. 2 Pashuri ogwo yaateera nabi Yeremia, yaamuta omu nkomo ezaabaire ziri omu Irembo rya Benyamiini ery'eruguru ery'enju ya MUKAMA. Ku bwaseesire, Pashuri yaiha Yeremia omu nkomo; Yeremia nikwo kumugira ati: MUKAMA tarikukweta Pashuri, kureka Magori-misabiibu, amakuru ngu “Ebirikutiinisa embaju zoona.” 3 Ahabw'okuba oku nikwo MUKAMA arikugamba naagira ati: Reeba, ndyakugira ekirikutiinisa ahariiwe n'ahari bagyenzi baawe boona. Baryaitwa rurara y'omugabe wa Babulooni, abatware Babulooni bari enkwatwa, abaite na rurara. 4 Kandi obutungi bwona obw'orururembo, amagoba gaarwo goona, ebintu byarwo byona eby'obuguzi bwingi, n'eitungo ryona ery'abagabe ba Yuda, ndyabihayo omu mikono y'abazigu baabo, babanyagye, babakwate, babatware Babulooni. 5 Kandi naiwe Pashuri n'abatuura omu nju yaawe boona, muryagyenda muri enkwatwa, oze Babulooni; okwo niyo origwa, kandi niyo oriziikwa, iwe na bagyenzi baawe boona abu ohanuurira ebishuba.
Yeremia okwetomboitera MUKAMA
Ai MUKAMA, okambeiha, naabiikiriza;
Nonkiza amaani, kandi osingwire.
Mpindukire eky'okushekyererwa eizooba ryona,
Buri muntu nanteerera enaku. 7
Ahakuba buri murundi gwona ogu ngamba, ntaka,
Ningira nti, Obubisha n'okucwekyereza!
Ahabw'okuba ekigambo kya MUKAMA kimpindukiire
Ekijumo n'ekigaaniizo eizooba ryona. 8
Ku ndikugira nti: Ka ndekye kumugambaho,
N'obu kwakuba okugaruka kugamba omu iziina rye,
Omu mutima gwangye oshusha oti harimu omuriro
Ogurikubuguma oguri omu magufa gangye;
Okufa mamigye nikundusya,
Kandi tindikukubaasa. 9
Ahakuba nimpurira baingi nibahwihwitsa.
Okutiinisa kuri embaju zoona!
Banywani bangye ab'ah'amara
Abategyereize okugwa kwangye, nibagira bati:
Muregye, naitwe nitwija kumurega,
Shana akaabeihwabeihwa,
Tubone kumusingura, tumuhoora. 10
Kwonka MUKAMA ari hamwe naanye nk'omurwani orikutiinisa;
N'ahabw'ekyo abarikumpiiga baryateera entsibo,
Tibarinsingura.
Baryakwatirwa kimwe enshoni,
Ahabw'okuba tibaribaasa.
Okuhemuka kwabo okw'ebiro n'ebiro tikuryeba. 11
Ai MUKAMA ow'amahe, ogyeza abahikiriire,
Kandi oreeba eby'omu mutima n'ebiteekateeko;
Ka ndeebe oku oraabahoore,
Ahabw'okuba niiwe nyegyekyereire ebyangye. 12
Mweshongorere MUKAMA, mumuhimbise,
Ahabw'okuba ajunire amagara g'abakyene,
Yaagaiha omu mikono y'enkozi z'ebibi. 13
Eizooba eri naazaariirweho nirikakyeenwe!
Ekiro eki maawe yanzaariireho nikikabure omugisha! 14
N'omuntu owaagambiire tata ati:
Waazaara omwana w'omwojo, naamushemeza,
Nawe naakakyeenwe! 15
Nkahenwa ki ogwo mushaija aba nk'endembo
Ezi MUKAMA yaacwekyereize ataine saasi,
Ahurira okucura omu kasheeshe,
N'enduuru omu ihangwe; 16
Ahabw'okuba taraanyitiire mu nda,
Maawe akaba ekituuro kyangye,
N'enda ye ekaguma eri nyarwegye.
Mbwenu nkaba naarugira ki omunda,
Kufa kubi n'okureeba enaku,
N'okumara ebiro byangye nyine enshoni?
Source notes (16)
- Cross-reference Ezr 2:37, 38.
- Cross-reference Yer 29:26; 37:13; 2 Bus 16:10; Byak 16:24.
- Cross-reference Yer 6:25.
- Cross-reference 2 Bag 20:17; 24:13; 25:13-17.
- Cross-reference Yer 14:14.
- Cross-reference Zab 119:51; Tonz 3:14.
- Cross-reference Yer 6:7, 10, 11; Zab 79:4.
- Cross-reference Yob 32:18, 19; Zab 39:3.
- Cross-reference Yer 9:4; Zab 31:13; 35:15; 41:9; 56:6.
- Cross-reference Yer 1:8, 19; 17:18; 23:40.
- Cross-reference Yer 11:20.
- Cross-reference Zab 35:9, 10; 109:30, 31.
- Cross-reference Yer 15:10; Yob 3:3.
- Cross-reference Yoh 16:21.
- Cross-reference Yer 18:22; Kut 19:25; Isa 13:19.
- Cross-reference Yob 3:10, 11, 20; Tonz 3:1, 2.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.