EBYAKOZIRWE 3

Petero na Yohaana okutambira ekirema

1Petero na Yohaana bakaba nibainamuka omuri hekalu omu shaaha ey'okushaba, niyo ya mwenda. 2Kandi hakaba hariho omuntu owaazairwe aremaire ebigyere; ebiro byona bakaba bamuheeka, bamubyamya aha irembo rya hekalu eririkwetwa Erirungi, okushabiriza abarikutaaha omuri hekalu. 3Ku yaareebire Petero na Yohaana nibataaha omuri hekalu, yaabashaba empiiha. 41 Petero yaamutaho amaisho, hamwe na Yohaana, yaamugira ati: Tuteho amaisho! 5Onu yaagabataho, aine amatsiko ngu baza kugira eki baamuha. 6Petero yaagira ati: Efeeza n'ezaabu tinziine; kwonka eki nyine, nikyo ndikukuha. Omu iziina rya Yesu Kristo owa Nazareesi, imuka ogyende. 7Yaamukwata omukono gwa buryo, yaamwimutsya; ahonaaho ebigyere bye n'obugomba-mburi bwe byatunga amaani. 8Yaabandatuka, yaayemerera, yaatandika kugyenda; yaataaha nabo omuri hekalu, naagyenda, naaguruka, naahimbisa Ruhanga. 9Abantu boona baamureeba naagyenda naahimbisa Ruhanga; 10bamanya ku ari ogwo owaabaire atuura aha irembo erirungi rya hekalu, naashabiriza; baashoberwa munonga, batangaarira ekyo ekyamubaho. 11Ku yaabaire akwaitse Petero na Yohaana, abantu boona bairukira ahu baabaire bari omu kisasi ekirikwetwa ekya Sulemaani, nibatangaara munonga.

Petero okubuurira abantu

12Petero ku yaabareebire, yaabagambira ati: Imwe bashaija ba Israeli 'mwe, ahabw'enki nimutangaarira omushaija ogu? Nari nimutushamaaririra ki nk'abarikuteekateeka ngu amaani gaitu nari shi okutiina Ruhanga kwaitu nibyo byagyendesa omushaija ogu? 132 Ruhanga owa Abrahamu, owa Isaaka, kandi owa Yakobo, niwe yaahaisize ekitiinisa omuheereza we Yesu, ou mwahaireyo mukeehakanira omu maisho ga Pilaato, obu yaabaire amaririire kumurekura. 14Kwonka imwe mwayehakana Orikwera kandi Ohikiriire, mwashaba kuheebwa omwitsi; 15kandi Mukama w'amagara mwamwita; kwonka Ruhanga yaamuzoora omu bafu; naitwe turi baakareebi ab'okukihamya. 16Kandi omushaija ogu, ou murikureeba, kandi ou murikumanya, ahabw'okwikiriza eiziina rya Yesu, eiziina eryo niryo ryamuha amaani; kandi okwikiriza oku Yesu aha nikwo kwamukiriza kimwe omu maisho gaanyu mwena. 173 Mbwenu, B'eishe-emwe, nimmanya ngu mukakikora omu butamanya, kandi n'abategyeki baanyu nikwo baakozire. 184 Kwonka Ruhanga, ebi yaaraguriire omu kanwa ka baanabi boona, ngu Kristo we aryabonabonesibwa, nikwo yaakihikiriize atyo. 195 N'ahabw'ekyo mweteise, muhindukye, ebibi byanyu biragazibwe, ebiro eby'okugaruka obusya bibone kwija okuruga ahari Mukama; 20atume Kristo owaabateereirweho, niwe Yesu, 21ou eiguru rishemereire kwakiira, okuhitsya obunaku bw'okugaruramu ebintu byona obusya, obu Ruhanga yaabaire agambira omu kanwa ka baanabi be abarikwera abaabire bariho okuruga aha kuhangwa kw'ensi. 226 Buzima kwo Musa akagira ati: Mukama Ruhanga aryabaimukiza nabi nkaanye okuruga omuri beene waanyu; ogwo ebi aribagambira byona, mubyorobere. 237 Nabi ogwo, ku ariija, omuntu weena otarimworobera aryahwerekyerezibwa, aihwe omu bantu. 24Kandi na baanabi boona abaaragwire okuruga ahari Samueli n'abaamukuratiire, nabo nikwo baagambire aha biro ebi. 258 Imwe muri batabani ba baanabi, kandi ab'endagaano ei Ruhanga yaaraganiise baashwenkuriimwe, obu yaagambira Abrahamu ati: Kandi omuri 9mwijukuru waawe nimwo enganda zoona ez'ensi ziriheerwa omugisha. 26Niimwe Ruhanga yaabandize kutumaho Omugaragwa we, aherize kumuzoora, ngu abahe omugisha naabahindura, omuntu weena omuriimwe arugye omu bibi bye.