Skip to content
BibleKenya
RUNYANKO 2 Eby'omu Busingye 36 Verse

Runyankore - Rukiga Bible 1964

2 Eby'omu Busingye 36

Eby'omu busingye bw'abagabe ba Yuda abarikuhereeruka

1

Bwanyima abantu b'omu nsi egyo baatwara Yehoahazi mwene Yosia, baamwemeka omu mwanya gwa ishe omuri Yerusaalemu. Yehoahazi akaba aine emyaka makumi abiri n'eshatu, obu yaatandika kutegyeka; yaategyekyera Yerusaalemu ameezi ashatu. Bwanyima y'ago meezi ashatu omugabe wa Misri yaamwiha aha ngoma omuri Yerusaalemu, yaacwera ab'omuri egyo nsi etalanta z'efeeza igana n'etalanta emwe y'ezaabu. Bwanyima omugabe wa Misri ogwo Neeko yaayemeka Eliakimu mukuru we kuba omugabe wa Yuda na Yerusaalemu, yaahindura eiziina rye, yaamweta Yehoyakimu; kandi yaakwata Yehoahazi omurumuna, yaamutwara Misri. 2

Yehoyakimu akaba aine emyaka makumi abiri n'etaano obu yaatandika kutegyeka, yaategyekyera Yerusaalemu emyaka ikumi na gumwe. Yaakora ebirikwangwa MUKAMA Ruhanga we. 3 Bwanyima Nebukadeneeza omugabe wa Babulooni yainamuka, yaamuteera, yaamubohesa emihama kumutwara Babulooni. 4 Kandi Nebukadeneeza ogwo yaatwara Babulooni bimwe aha bintu by'enju ya MUKAMA, yaabita omu kikaari kye. 5 Endiijo mirimo ya Yehoyakimu, n'ebirikunugwa ebi yaakozire, n'ebyabaire bimureebwaho, bihandiikirwe omu kitabo ky'abagabe ba Israeli n'aba Yuda; bwanyima omutabani Yehoyakiini yaategyeka omu mwanya gwe. 6

Yehoyakiini akaba aine emyaka ikumi na munaana, obu yaatandika kutegyeka; yaategyekyera Yerusaalemu ameezi ashatu n'ebiro ikumi. Yaakora ebirikwangwa MUKAMA. 7 Aha kutandika kw'omwaka Nebukadeneeza yaatuma, baamutwara Babulooni n'ebintu by'obuguzi bwingi eby'enju ya MUKAMA, yaayemeka mukuru we Zedekia kuba omugabe wa Yuda na Yerusaalemu.8

Zedekia akaba aine emyaka makumi abiri na gumwe, obu yaatandika kutegyeka; yaategyekyera Yerusaalemu emyaka ikumi na gumwe. 9 Yaakora ebirikwangwa MUKAMA Ruhanga we; tiyaayecureeza mu maisho ga Yeremia nabi, owaabaire amugambira ebigambo bya MUKAMA. 10 Kandi yaagomera omugabe Nebukadeneeza owaamurahiize ahari Ruhanga; yaagaruka yaagangaaza ebitsya, yaagumya omutima gwe, yaayanga kuhindukira MUKAMA Ruhanga wa Israeli. Kandi abanyamurwa abakuru boona n'abantu nabo bakaba barengyesereize omu kucumura nibakuratira ebirikunugwa byona eby'abanyamahanga, baashiisha enju ya MUKAMA ei yaabaire ayereize Yerusaalemu. 11

MUKAMA Ruhanga wa baishenkurubo akaba atuura naabatumaho entumwa ze, ahabw'okugirira abantu be, n'obutaaho bwe, esaasi; 12 kwonka baaguma nibateerera enaku entumwa za Ruhanga, nibagaya ebigambo bye, nibashekyerera baanabi be, okuhitsya obu ekiniga kya MUKAMA kyaizire aha bantu be, bakabura oku baraakikire.

Abayuda okutwarwa Babulooni

13

N'ahabw'ekyo MUKAMA yaabateeza omugabe w'Abakaludaaya, yaitira abatsigazi baabo omu nju y'Obutaaho bwabo oburikwera na rurara, tiyaagirira muntu weena saasi, omutsigazi nari empangare, omugurusi nari owaahikire omu ngingo zaabukuru; yaabahayo boona omu mikono y'ogwo mugabe. 14 Kandi ebintu byona eby'enju ya MUKAMA, ebihango n'ebikye, n'eby'obutungi by'omuri egyo nju, n'eby'omugabe n'eby'abanyiginya be, ebyo byona yaabitwara Babulooni. 15 Bwanyima baayotsya enju ya Ruhanga, baasheenya orugo rw'amabaare rwa Yerusaalemu, baayotsya zaanyaruju zaayo zoona, baacwekyereza n'ebintu byayo ebirungi. 16 Abaahonokire ahari rurara Nebukadeneeza yaabatwara Babulooni, baaba abahuuku be n'ab'abatabani, okuhitsya aha kutandika kw'obugabe bwa Perisi, 17 okuhikiiriza ekigambo kya MUKAMA ekyagambirwe Yeremia, ngu ensi eryaguma etyo okuhitsya obu eriheza kushemerererwa sabato zaayo; ahabw'okuba ebiro ebi yaamazire eri omushaka byona, ekaba eijuka sabato okumara emyaka makumi mushanju.

Ebya Kuuro omugabe wa Perisi

18

Bwanyima omu mwaka gw'okubanza ogw'omu busingye bwa Kuuro omugabe wa Perisi, MUKAMA akaimutsya omutima gwa Kuuro, ngu ekigambo kye ekyagambirwe Yeremia kihikiirire, yaaragiira kuranga ebigambo ebi omu bugabe bwe bwona, kandi n'okubihandiika, naagira ati: Oku nikwo Kuuro omugabe wa Perisi arikugamba naagira ati: MUKAMA, Ruhanga w'eiguru, ampaire obugabe bwona obw'omu nsi, kandi anyehanangiriize kumwombekyera enju omuri Yerusaalemu ey'omuri Yuda. Mbwenu omuntu weena omuriimwe ow'omu bantu be, MUKAMA Ruhanga we agume nawe; kandi ainamukye.

Source notes (18)
  1. Cross-reference 2 Bag 23:30-34.
  2. Cross-reference 2 Bag 23:36, 37.
  3. Cross-reference 2 Bus 33:11; 2 Bag 24:1; Yer 22:18, 19; 36:30.
  4. Cross-reference 2 Bag 24:13; Ezr 1:7; Dan 1:1, 2; 5:2.
  5. Cross-reference 2 Bag 24:5, 6.
  6. Cross-reference 2 Bag 24:8-17.
  7. Cross-reference 2 Bag 24:18-20; Yer 52:1, 2.
  8. Cross-reference Yer 37:1.
  9. Cross-reference Yer 21:3-7; 27:12-22; 32:1-5; 37:6-10; 38:17-26.
  10. Cross-reference 2 Bus 30:8; Yer 52:3; Ezk 17:15-18.
  11. Cross-reference Yer 7:13, 25; 25:34; 26:5; 29:19; 35:15; 44:4.
  12. Cross-reference Enf 1:25, 30; Yer 5:12, 13.
  13. Cross-reference 2 Bag 25:1-7; Bir 28:49; Ezr 9:7.
  14. Cross-reference 2 Bag 25:13-15.
  15. Cross-reference 2 Bag 25:9.
  16. Cross-reference Yer 27:7.
  17. Cross-reference Lev 25:45; 26:34, 35, 43; Yer 25:9-12; Dan 9:2.
  18. Cross-reference Ezr 1:1-3; Isa 44:28; Yer 33:10-14.

Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · Public domain · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.