TRADUCTION BILBE EN KINYANGA
Matthew 25
Mushinga w'ebitasa ikumi
«eBwami bwa mu mbingu busesusanyiwayo n'emushinga w'ebitasa ikumi mbi byarianga ematara abo n'ienda karindire emuheruchi. Basanu munkati nabo babesenga birunge n'ebampe basanu babesenga bari na bwenge. Ebirunge mbyo batingenga ho ematara abo, ina ntíbatingenga bitorori. Ebari n'ebwenge, ibo barianga ematara abo n'iria bitorori. Bushwa n'erɨsɨa r'emuheruchi, ebitasa biti mbyo byabucha ihunira n'ienda toro.
«Munkati n'ebutu, murenge warukirwa mbu: ‹Mukai! Emuheruchi weya! Mwendi kamukoke!› Nampo, ebitasa ikumi mbyo byasumuka ebiti n'itunganya ematara abo. Ebirunge mbyo byere babine mbi bari n'ebwenge mbu: ‹Mutuninke mu bitorori byinu, bushwa mbu ematara itu arimange.›
«Ina mbi bari n'ebwenge nabo mbu: ‹Karankuso! Ebitorori bino biri nitu, nti byarumira kuri bate na kuri banu. Mwendi kuri ebanonki kongo mwichure byinu.› Ebirunge mbyo byakianga byendange kachura ebitorori, hiha-hiha emuheruchi nae weya. Ebitasa bisanu mbi byabesenga tayari, bakime nae mu kibimbi ch'eriherucha. Kuruma nampo, erubi rwarindikwa.
«Ebitasa birunge nabyo byeya. Babucha ieba mu murenge mukiri mbu: ‹eNyere Kuritu! Nyere Kuritu! Turunduri!› Ina emuheruchi wasako bo mbu: ‹Nibwirengi muriira mbu ani ntinibosi!›»
Nampo ke, Yesu weba tu mbu: «Kai, mwendi mukeresha, bushwa mbu ntí banu mwosi erotu n'esantambi s'erikuruka rani.
Mushinga w'ebakori bashatu
(Ruk 19.11-27)
«eBwami bwa mu mbingu busesusanyiwa na mushinga wa mwea uma ngu wahunanga ienda uendo. Emwea ngo wabikira ebakori bae n'ibanyie bo ebehe byae mbu bakoreshe byo. Waninka mukori uma taranta1 isanu, na umpe taranta sibi2, n'eumpe taranta nima. Emwea ngo waronjanga mbo itukana n'ebwamukocha kira mukori. Kuruma nampo wenda.
«Hiha-hiha, emukori ngu waninkwanga etaranta isanu wenda kanonka nato, sabuta simpe isanu. Ingu waninkwanga etaranta sibi, nae wenda kanonka nato. Sabuta simpe sibi. Ina ngu waninkwanga etaranta nima, iwe wenda katima kiribu mu roto n'ibisa mo etaranta ya nyere kurwae.
«Kuruma na matu mingi, nyere kurwabo ngo wakuruka. Wabikira ebakori bae mbo kongo bamwire mbu bwakukoreshanga bo ebehe byae.
«Emukori ngu waninkwanga etaranta isanu weya na simpe isanu nsi sakushee we. Weba mbu: ‹Enyere kuritu, unisierenga taranta isanu. Kae, samabuta simpe isanu.›
«Nyere kurwae wamwire mbu: ‹Umashamucha! Ǒngo mukori wakonda na winyihirwa. Kai, bushwa mbu ukubesenga mwea winyihirwa mu behe bikeke, nasekuninka isimanire behe bingi. Bushwa nancho, iya kamoa hima nani!›
«Emukori ngu waninkwanga etaranta sibi, nae weya. Weba mbu: ‹Enyere kuritu! Unisierenga taranta sibi, kae, samabuta simpe sibi.›
«Nyere kurwabo wamwire mbu: ‹Umashamucha! Ǒngo mukori wakonda na winyihirwa! Bushwa mbu ukubesenga mwea winyihirwa muriranga behe bikeke, nasekuninka isimanire behe bingi. Bushwa nancho, iya kamoa hima nani!›
«Kuruma nampo, emukori ngu waninkwanga etaranta nima, nae weya. Weba mbu: ‹Enyere kuritu, nakusiba mbu ǒngo wabume wasuma. Ǒngo ukaonga entibyekanga ǒngo, n'isonja mbi ntibyansansabanya ǒngo. Bushwa nancho, nakusubaha, nenda kabisa etaranta yabe kumunda n'eroto. Kae, etaranta yabe nge ino.›
«Nyere kurwae wamusako mbu: ‹Ǒngo mukori wema, na mutetera! Ukusibanga mbu nikaonga entibyakweka ani, na nisonjanga mbi nti byakunsansa ani! Mbeni bushwa nki nti ukunibikenga ebehe byani ekubanki kongo, murikuruka rani, namuringengi byo mo nambi byakubuta byo? Mumubake etaranta nima njo, na muninke yo ingu uri n'etaranta ikumi. Bushwa mbu kinsi ngu uri na kikai nge useninkwa, nampo ntwabese na bingi. Ina ngu usira kikai, wasebakwa n'ekikeke nchi kiri nae. N'emukori ngu usira mufa, mumutae ekumbuka mu mwirimya. Na mu mwirimya ngo, ebea baserire n'inuba nguru.›
Erubansa rwa hende
«Entambi ani eMwana w'emwea naseyayo mu busime bwani hima n'ebamaraika bati, narikayo mu rutebe rwani rw'ebusime. Ebea bati basekumananayo mu makako ani, nani nasebanyayo bo mu bikembe bibí, ebukianga emusumba wabanya esamburi n'esampene. Naseriayo esamburi uharo r'wekwabume kwani n'esampene uharo rwani rw'ekurembe.
«Nampo, ani mwami nereyo mbi ebari mu ruharo rwani rw'ekwabume mbu: ‹Mwiye, banu mbi murikasanirwa na Tita, mukimi mu bwami mbu ebwabubikenga ani itukire eribumbwa r'echuo. Bushwa mbu nakwanga rwaka, munininka bio, nakwanga mbusha, munininka byiomo, nabesenga mweni, munikoke. Ngebumbo, nakianga narukwa nchangi munininka yo, na nakianga nisambange mweya kanitangura, narekia niri mu mwiyororo, mwiya kanitangura.›
«Nampo ebea baombokara mu makako a Ongo basenisakoyo mbu: ‹eNyere Kuritu, mbeni inye otu nge rwakusunganga bate nt'ukwa rwaka na twakuninka bio, abe ini ntambi ubesenga na mbusha twakomosha? Na ini ntambi ubesenga mweni, twakukoke? Abe ini ntambi urukwanga nchangi twakuninka yo? Twakusunganga runi otu nt'usamba, abe mu mwiyororo na tweya kakutangura?›
«Ani eMwami nasesako bo mbu: ‹Nibwirengi muriira mbu ebiti mbyo, ebyabeseyo bikorengi banu uma ngu mukeke mu banakitu bano, musibanga mbu ani nge mukunikore byo.›
«Nampo ebari mu ruharo rwani rw'ekurembe, ibo nerebo mbu: ‹Mutuke kwihi nani banu mbi muriherwa na Ongo! Mwendi mu kasha k'ematu ati, ekabikwanga bushwa na Mushumbu n'ebamaraika bae! Bushwa mbu nabesenga nakwa rwaka, ntimunininkanga bio, nabesenga niri na mbusha, ntimunininkanga byiomo, Nabesenga mweni, ntimurinikoke, narukwanga nchangi, ntimurinininka yo. Na narekia ani mukoni, na narekia niri mu mwiyororo, ntimweyanga kanitangura.›
«Nabo basenisako mbu: ‹eNyere Kuritu, ini ntambi twakusunganga tukwa rwaka, abe nt'ukwa mbusha, abe nti ǒngo mweni, abe nt'urukwa nchangi, abe nti ǒngo mukoni, abe nti ǒngo uri mu mwiyororo na tutakusaki?›
«Nani nasesako bo mbu: ‹Nibwirengi muriira mbu, ebiti mbyo, entambi murukwanga ikore byo uma munkati nambi basungwange mbu bakeke, ani nge ntimukunikorenga byo.›
«Kuruma nampo ebea mbo basenda mu hukumu y'ematu ati. Ina mbi ebaombokara ibo basekimeyo mu karamo k'ematu ati3.»
Source notes (3)
- Footnote
- Footnote eBayuta babesenga bakoreshangǎ behe byabikirwa mbu taranta. Etaranta nima yabesenga ichuranga nkambu isanu
- Footnote Soma Ndan 12.2.
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.