Ruka
Luke
Introduction from this edition
eInjiri imbu bwakianga
Ruka
waandika yo
Ntangiro
eInjiri imbu bwakianga Ruka waandika yo, iyo kitabo kima mu bitabo binye byaroso munkati n'eRirai Rishasha imbi byatura ebuingo bwa Yesu n'ebinwa biti mbi byakoranga we. Mu bitabo binye mbyo, kira kima chabikirwa mbu «Injiri», ngerieba mbu «Mwasi Wakonda». Ebitabo mbyo byaandikwanga kuruma n'erikwa ra Yesu.
Matayo, Mariko, Ruka na Yohana nge baandikanga ebitabo mbyo. Ruka ntw'aandikanga ho bushwa n'ebuingo bwa Yesu n'ebinwa mbi byakoranga we, ina waandikanga hotu ekitabo ch'emeta abi inchi chabikirwa mbu «Mikorere y'esantumwa». Ekitabo ncho chatura ebinwa mbi byakoranga ebanafunsi ba Yesu kuruma n'erikwa n'erifuka, n'erikuruka ra Yesu mu mbingu.
Kusira mwea wosi shu ematu ngi aandikwanga eInjiri ino ya Ruka, abe impi haandikirenga we yo. Ina basomi bingi basimirana mbu yaandikwanga buna mu mwaka we 70 kuruma n'eributwa ra Yesu Kirisitu.
Ruka nge mwandiki w'eInjiri ino, wabesenga hotu munganga (Bakorosai 4.14). Eburenga bwerieba rae emwebe kumunda n'ekitabo kino bwashea mbu Ruka wabesenga wasoma masomo a kwiyo nguru.
Ruka wahunanga iandika shu-shu ebinwa bushwa n'ebuingo bwa Yesu n'ebinwa mbi byakoranga we n'ieba mbu bwetanga byo kongo bampe bakasanirwa murisoma byo (Ruka 1.1-3). Ruka ntíwabesenga Muyuta, ina waandikanga imbu bwamukia entí Muyuta wamukochǎ irukira. Ekinwa ncho chasungwa shu-shu mu ntambi nji iturange we ekutime y'eBayuta (Ruka 1.8).
eInjiri imbu bwakianga Ruka waandika yo, iyo kitabo chasusana n'ebitabo bya Matayo na Mariko imbu bukiange ebitabo bino byatura ebinwa mu inse sasusana, nakiro mbu byarengana kakeke.
Mu bitabo bino binye, ekitabo cha Ruka chisine ngi chatura nguru emyasi y'eributwa ra Yohana Murubiki. Ruka wisimike nguru mu binwa mbi byakae emusasiro (Ruka 3.3; 11.4; 17.3-4; 23.34) nambi byeba bushwa n'emahemo (Ruka 3.21; 5.16; 6.12; 11.1-12; 22.32).
Emutondeko w'ebinwa
1. Entangiro n'echasingwa eInjiri ino yaandikwa… 1.1-4
2. Emyasi y'eributwa ra Yesu n'ematayarisho emurimo wae… 1.5—4.13
3. Emahano a Yesu n'ebishisharo byae… 4.14—21.38
4. Erikwa, erifuka n'erikuruka ra Yesu mu mbingu… 22.1—24.53
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.