TRADUCTION BILBE EN KINYANGA
Yohana 11:25
Verse 25 is marked below, with the whole chapter around it. Read from the start
Erikwa ra Rasaro
Kwarikanga mwea uma erina rae nge Rasaro. Rasaro ngo, wabesenga mukoni. Wabesenga urikanga ku Betania hima na babitu bae Maria na Marita. Maria uno, mwisi wabo emukoni Rasaro nge wasingonga Nyere Kuritu emarashi mu bisando n'ikono byo n'ebuteo bwae. Nampo, Maria na Marita barera emwasi kuri Yesu mbu: «eNyere Kuritu, mira wabe Rasaro usambange.» Yesu wakianga wamarukira emwasi ngo, weba mbu: «Ebukoni bwa Rasaro ntibwimushura, ina bwishea ebusime bwa Ongo, kongo Musike wa Ongo watatwa.»
Yesu wabesenga washima Maria bana Marita hima na Rasaro. Yesu wakianga wamarukira mbu Rasaro usambange, warika tu matu abi ehabesenga we. Kuruma nampo, were ebanafunsi bae mbu: «Tukuruke ku Yundea.»
Ebanafunsi bae bamusako mbu: «eMuhani, ntinenki kweta matumingi ebakwakare b'eBayuta basondayo ikurekera makoi n'ikushura. Mbeni ǒngo usondange tu ienda ko?» Yesu wasako mbu: «Erotu ruri na ntambi ikumi nasibi. Kuba emwea wendange na kukiri kwacha watasitaranga, bushwa mbu usungange echaka ch'echuo kino. Ina emwea wamenda mutu, usitaranga, bushwa mbu usira chaka kumunda nae.» Yesu wakianga wamakinda ieba ebinwa mbyo, weba tu mbu: «Mira witu Rasaro urere, ina n'enda kamusimo.»
Nampo, ebanafunsi bae bamusako mbu: «eNyere Kuritu, kuba urere, waserama.» Yesu wabesenga webange mbu Rasaro wamakwa, ina ebanafunsi bae bahaka mbu webange bushwa n'erienda toro. Nampo, Yesu were ke bo shu-shu mbu: «Rasaro wamakwa. Ina nashima bushwa mbu Rasaro wamakwa ntinisira ko kongo munisimira. Ngie twendi kuri we.»
Nampo Tomasi ingu wabikirwa mbu «Iyasa», were ebanafunsi babine mbu: «Nabate twendi ho kakwire hima nae.»
Yesu uri na maa y'erifura ebakwi
Yesu wakianga wameya ku Yundea, murubungu rwa ku Betania, wakumana Rasaro ntwamahea matu anye mu risinda. Ituka murubungu rwa ku Betania na ku Yerusaremu, habesenga buna birometere bishatu. Bayuta bingi babesenga bameya hari Marita bana Maria mu masiri bushwa n'erikwa ra Rasaro musike wabo.
Marita wakianga warukira mbu Yesu weyange, wenda kamuranga mu munse, ina Maria wasia mu numba. Marita were Yesu mbu: «eNyere Kuritu, umabesengi hano, musike witu watamukwange. Ina nosi mbu ieya nenompena, kirakikai nchi chamukonga ǒngo Ongo, wasekuninka cho.»
Yesu wamwire mbu: «Musike winu wasefuka.»
Marita wasako mbu: «Nosi mbu wasefukayo n'ebakwi erotu rwa hende.»
Yesu wamwire mbu: «Ani ngerifuka r'ekaramo, bushwa mbu ewanisimira, watangakwi nakiro wakwa. Ngebumbo hotu, kinsi ngu warika kumunda nani n'inisimira, watakwiyo karankuso. Mbeni usimira ebinwa mbyo?»
Wamusako mbu: «Nanki eNyere Kuritu, nasimira mbu ǒngo nge Kirisitu, Musike wa Ongo, ingu wahwanga ieya mu chuo.»
Yesu wafura Rasaro
Marita wakianga wameba ebinwa mbyo, wenda kabikira Maria mwisi wabo n'imwire kwahehe mbu: «eMuhani wameya na wakubikira.» Maria wakianga wamarukira mbo, wasimana tete, wenda kuri Yesu. Yesu wabesenga ntinensi wakime murubungu ndo, wabesenga ukiri mpi hakumusia Marita. eBayuta mbi babesenga mu numba hima na Maria mu masiri, barekia basunga Maria wasimana tete n'ituka, bamumisa. Bahakanga mbu wenda karire hisinda.
Maria wakianga wameya mpi hari Yesu n'imusunga, wakire mu bisando byae nieba mbu: «eNyere Kuritu, umabesengi hano kongo musike witu nt'wakukwa.»
Yesu warekia wamusunga urengi hima n'eBayuta mbi bakweya nae, warukira bwae mu mutima, n'ikwa bonso. Nampo, washisha bo mbu: «Mbeni kuni nge kwakumutaa banu?»
Bamusako mbu: «eNyere Kuritu, iya kakae.»
Yesu ware. Nampo Bayuta bima beba mbu: «Eo, mukai imbu bwabesenga bwamushima we!»
Ina bima mubo beba mbu: «Emwea uno ngwakuramyanga ekihumihumi ncho, bushwanki ntwakweba mbu Rasaro kiro wakwa?»
Ngebumbo Yesu warukira bwae bwasuma mu mutima wae, wenda hisinda. Erisinda ndo babesenga babumbe ro ikoi rikiri. Yesu weba mbu: «Mukutu erikoi rino!»
Marita mwisyabo Rasaro ngu wakukwa, wamwire mbu: «eNyere Kuritu, ngie ununkange, bushwa mbu kwameta matu anye watawa!» Yesu wamwire mbu: «Mbeni ntínakukwire mbu umasimira ukusunga ebusime bwa Ongo?» Nampo bakuto erikoi ndo. Yesu wakae ekwiyo, weba mbu: «Tita, nashima bushwa mbu umarukira emahemo ani. Na nosi mbu ǒngo unirukirange kirotu. Ina n'ebange buno bushwa n'ekikembe ch'ebea bano, kongo basimira mbu ǒngo ng'ukunituma.» Wakianga wameba ebinwa mbyo, wabikira mu murenge mukiri, weba mbu: «Rasaro, saa.» Nampo, Rasaro ngu akese wamakwa, wasaa. Emindi n'emine yae yabesenga yondondwa na kitambara, n'embaso yae yabesenga babumbeyo na nchangi. Yesu were bo mbu: «Mumuboru, mumureki wendi.»
Enama y'erishura Yesu
(Mat 26.1-5; Mar 14.1-2; Ruk 22.1-2)
Bayuta bingi munkati nambi biyanga kuri Maria, na basunganga ebinwa mbi byaronjanga Yesu, bamusimira. Ina bampe munkati nabo, benda kuri eBafarisayo n'iere bo ebinwa mbi byakuronja Yesu. Nampo ebakwakare b'ebakuhani n'eBafarisayo babikira erushu rwabo rukiri n'ieba mbu: «Mbeni turonje buni bushwa n'emwea uno euronjange bishisharo bingi? Kuba twamusierere ikora buno, ebea bati basemusimira, n'eBaroma baseya kabisha-bisha eNumba ya Ongo n'ebea bitu!»
Ngebumbo, uma munkati nabo, erina rae ngi Kayafa, iwe ngwabesenga kuhani mukiri mu matu ngo, weba mbu: «Ntibanu mosi kikai! Ntibanu mosi mbu rakomenwa mwea uma wakwe bushwa n'ebea bampe kukia echuo kiti kishirire?» Iwe ntwakweba ebinwa mbyo itukana n'emyanikiri yae kisine. Ina bushwa mbu iwe ngwabesenga kuhani mukwakare mu mwaka ngo. Watendurenga mbu Yesu wasekwa bushwa n'ebea bati. Na ntíbushwa ho n'ebea bano, ina bushwa n'erikumanyanya ebana ba Ongo mbi baresansabana mu chuo, kongo barika mu bunakima.
Itukire erotu ndo, basonda buni nge bwamushura bo Yesu. Bushwa nancho, Yesu wareke kwishea kuri eBayuta. Kuruma nampo, wenda n'ebanafunsi bae mu chuo nchi kiri kwihi n'ebweru, murubungu ndu rwabikirwa mbu Efuraimu. Nabo barika nko.
Erotu rukiri rw'ekibimbi ch'ePasaka y'eBayuta rwarekia ngie ruri kwihi, nampo bea bingi batuka mu sambungu, n'ienda ku Yerusaremu kongo b'ishuurura kubosondori n'ePasaka. Basonda Yesu, bashishana mu Numba ya Ongo mbu: «Mbeni banu mwanikirange buni? Waseya mu kibimbi abe anga?» Ebakwakare b'ebakuhani n'eBafarisayo babesenga bamakuto momba mbu kinsi mwea ngu osi ehari Yesu, wárishe mwasi kongo bamumina.
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.