V'alawi

Magambo ga V'alawi

Mihayo zya mbele

Ki'tabu cha Magambo ga V'alawi ki'kumingile nhama i'zyo v'apiwa V'aizilaeli na Mulungu ku'v'i'ti'la ku'mwa Mose. Nhama zyeni'zi zili'lagi'la ki'fumi'zye cha vitaambo na kalu'mbi'lo. Hangi' nhama zyeni'zi zili'lagi'la ki'v'ezezye na ki'ti'le cha kwisenga mugati' na Ihema Isondo. V'alawi v'ali' v'antu' av'o v'av'age igongo isogolwa lyamwa Mulungu i'lo li'li' na muli'mo gwa ku'londola mili'mo zya ki'hozya na muli'mo gwa wangali'zi wa ihema. Ku'londana na mahembeko, v'asomi v'a Bibiliya v'ali'sani'zya ku'v'a ki'tabu cha Magambo ga V'alawi, haki'mo na vitabu vingi' vine vya Tolati (Mbu'ki', Ku'fuma, Lu'v'alo, Mwizu' gwa Nhama), vyatonwa na mufumbu'zi Mose. Nhana yeni'yi' yi'li'hwekeziwa hangi' na wu'tone wa ki'tabu cheni'ki'li', ku'nguno ki'tabu cha V'alawi ki'lamulile ku' ku'yomba ati', “Gu'ku' Mulungu wamwitanaga Mose, na ku'yomba nawe ku'fuma mu Ihema lya Ku'sangi'zya,” (V'alawi 1:1). V'angi' v'ali'sani'zya ku'v'a hamo ki'tabu cheni'chi' chatonwa ku'fuma ku' wu'kumingwe wa wu'tonwe hekeheke wa kale ku' itungo lya myaka 500 na 600 K.K. (Aho akaali' ku'v'yalwa Kilisito), aho V'aizilaeli v'av'age ku' wu'samiwa ku' Babuloni.

Ha nnandyo ya ki'tabu cha V'alawi, ku'li'soma i'vyo yi'li' ku'nguno ya mikoli hekeheke zya kalu'mbi'lo na vitaambo i'vyo Mulungu ndi' walagi'li'zya vifumiwe na v'ahozya. Vili'ho vitaambo vingi' vyafumiv'agwe ku'nguno ya ndi'pi zya wu'kenagu'zi wa v'antu'. Vitaambo vingi' vyafumiv'agwe ku'londana na wu'togwe wav'o ku'mwa Gu'ku' Mulungu, Mulungu wav'o. Ki'la itungo, lyav'age igambo lya kapanga muno ku' muntu' u'yo ali'fumya kalu'mbi'lo kasoga ku'londana na i'vyo akowolile, ako kagelani'lile na kali' wu'du'hu' wu'lema ninga hado. Yi'li' nhana ku'v'a ki'v'ezezye cheni'chi' chalagi'lage wu'sondo na nhana yamwa Mulungu. Ku' lwandi' lwa ku' mpelo lwa ki'tabu cheni'chi', ki'li'welezezya V'aizilaeli haki'mo na v'ahozya i'vyo v'asigali'lage na wu'soso ninga kwisosohya aho yav'age u'lu' higela mav'i. Muhayo muhanya gwa ki'tabu cheni'chi' yi'li' i'vi Mulungu ali' musondo na ku'zilonda nhama i'zyo zili' mu ki'tabu cheni'chi', V'aizilaeli v'ali' v'alakowole kwikala mugati' na wu'v'aho wa Mulungu.

Mihayo ku' wu'guhi'

1. Ifungu lya 1 mpaka lya 7 li'li'fumya milagi' na ki'fumi'zye cha vitaambo na kalu'mbi'lo hekeheke.

2. Ifungu lya 8 mpaka lya 10 li'li'welezezya Aloni na v'ana v'akwe i'vyo v'asogolwa na ku'v'eziwa v'ahozya.

3. Ifungu lya 11 mpaka 16 li'li'welezezya milagi' i'zyo zili' ku'nguno ya viliwa i'vyo vili' visoso na i'vyo vili' zoma, haki'mo na malwile.

4. Ifungu lya 17 mpaka lya 27 li'li'fumbu'la milagi' zingi' i'zyo zili' ku'nguno ya magambo ga nhama zya ki'lyi'le, myanya, nsembo nsoga, na myaka zya lu'siku' lwa ki'suuho u'lo lu'li' Sabato.