Biblica® नेपाली समकालीन सर्वसुलभ संस्करण
भजनसंग्रह 72
सोलोमनको भजन।
हे परमेश्वर, राजालाई तपाईंको न्याय,
र राजाका छोरालाई तपाईंको धार्मिकता दिनुहोस्।
राजाले तपाईंका मानिसहरूलाई धार्मिकतासाथ
र तपाईंका पीडित जनहरूलाई धार्मिकतासाथ न्याय गरून्।
पर्वतहरूले मानिसहरूका लागि समृद्धि ल्याऊन्;
पहाडहरूले धार्मिकताका फल ल्याऊन्।
उहाँले पीडितलाई मानिसहरूबीच रक्षा गरून्,
र अभावमा हुनेहरूका सन्तानहरूलाई बचाऊन्;
उहाँले अत्याचारीहरूलाई नाश गरून्।
जबसम्म सूर्य रहन्छ, र जबसम्म चन्द्रमा रहन्छ,
सबै पुस्ताका मानिसहरूले राजाको भय मानून्।
तिनी काटिएको घाँसको चउरमाथि बर्सने पानीजस्तै,
र जमिनलाई भिजाउन सिँचाइ गरिने झरीहरूझैँ होऊन्।
राजाको शासनकालमा धर्मीहरूको उन्नति होस्,
र चन्द्रमा रहुन्जेल देशमा प्रसस्तता होस्।
राजाले एक समुद्रदेखि अर्को समुद्रसम्म, यूफ्रेटिस नदीदेखि
पृथ्वीको अन्तिम छेउ-छाउसम्म शासन गरून्।
राजाको सामु मरुभूमिमा बस्नेहरूले दण्डवत् गरून्,
र उनका शत्रुहरूले धुलो चाटून्।
तर्शीश र टाढा सामुद्रिक किनारका राजाहरूले
उनलाई सलामी1 ल्याऊन्;
शेबा र सेबाका राजाहरूले
उनलाई भेटी चढाऊन्।
सबै राजाहरू उनको अगाडि निहुरिऊन्;
र सबै राष्ट्रहरूले उनको सेवा गरून्।
किनकि उनले अभावमा हुनेहरूलाई उद्धार गर्छन्, जसले उहाँलाई पुकार गर्छन्;
पीडितहरू जसको सहायता गर्ने कोही छैन।
दुर्बल र अभावमा भएकाहरूलाई उनले दया देखाउनेछन्,
र अभावमा हुनेहरूको प्राण मृत्युदेखि बचाउनेछन्।
उनले तिनीहरूलाई हिंसा र अत्याचारबाट छुटाउनेछन्;
किनकि उनको दृष्टिमा तिनीहरूको रगत बहुमूल्य छ।
तिनी दीर्घायु होऊन्!
तिनलाई शेबाको सुन भेटीस्वरूप दिइयोस्।
तिनको निम्ति मानिसहरूले सधैँ प्रार्थना गरून्,
र दिनभरि नै तिनलाई आशिष् देऊन्।
देशभरि नै प्रशस्त अन्न होस्;
पर्वतका टाकुराहरू समेतलाई प्रभावित पारून्।
तिनको बाली लेबनानझैँ फस्टाओस्;
र सहरका मानिसहरू जमिनको घाँसझैँ फस्टाऊन्।
तिनको नाम सदासर्वदा रहिरहोस्;
सूर्य रहुन्जेलसम्म तिनको नाम रहिरहोस्।
तब तिनीद्वारा सबै राष्ट्रहरूले आशिष् पाउनेछन्;
र तिनलाई धन्यका भन्नेछन्।
इस्राएलका परमेश्वर, याहवेह परमेश्वरलाई प्रशंसा होस्!
उहाँले मात्र अचम्मका काम गर्नुहुन्छ।
उहाँको महिमायोग्य नामको सदासर्वदा प्रशंसा होस्;
उहाँको महिमाले सारा पृथ्वी भरियोस्।
आमेन! आमेन!
यिशैका छोरा दावीदका प्रार्थनाहरू यहीँ समाप्त हुन्छ।
Source notes (1)
- Footnote राजाहरूले शासन गर्ने समयमा ठूला राजा वा सम्राटलाई साना राजाले सम्मान स्वरूप उपहार वा सलामी दिनुपर्थ्यो
Biblica® नेपाली समकालीन सर्वसुलभ संस्करण. Copyright © 1998, 2006, 2021, 2024 Biblica, Inc. Licensed under CC BY-SA 4.0. ” Notice of copyright must appear on the title or copyright page of the work as follows: [Technology consultant will insert copyright and trademark statements from above. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.