Biblica® नेपाली समकालीन सर्वसुलभ संस्करण
भजनसंग्रह 35
दावीदको भजन।
हे याहवेह, मलाई विरोध गर्नेहरूको विरोध गरिदिनुहोस्;
मसँग युद्ध गर्नेहरूका विरुद्धमा युद्ध गरिदिनुहोस्।
ढाल लिनुहोस् र कवच पहिरनुहोस्;
उठ्नुहोस् र मेरो सहायताको निम्ति खडा हुनुहोस्।
मलाई खेद्नेहरूका विरुद्धमा
तपाईंको भाला र बर्छा उठाउनुहोस्।
मलाई भन्नुहोस्,
“म तेरो मुक्ति हुँ।”
मेरो प्राण लिन खोज्नेहरू
अपमानित होऊन् र शर्ममा परून्;
मेरा विरुद्धमा हानि रच्नेहरू
पछाडि फर्कून् र शर्ममा परून्।
याहवेहका स्वर्गदूतले तिनीहरूलाई टाढा लखेटून्;
तिनीहरू बतासले उडाएका भुसजस्ता होऊन्।
याहवेहका स्वर्गदूतले तिनीहरूलाई लखेटिरहून्;
तिनीहरूको बाटो अँध्यारो र चिप्लो होस्।
किनकि कारणविना तिनीहरूले मलाई फसाउनलाई पासो बिछाए;
र कारणविना मलाई फसाउनलाई तिनीहरूले खाडल खने,
अचानक तिनीहरूमाथि विनाश आइपरोस्;
तिनीहरूले लुकाएर थापेको पासोमा तिनीहरू आफैँ परून्,
तिनीहरूले खनेका खाडलमा आफैँ परेर नष्ट होऊन्।
तब मेरो प्राणचाहिँ याहवेहमा आनन्दित हुनेछ,
र उहाँको मुक्तिमा हर्षित हुनेछ।
मेरो पूरा बलले भन्नेछु,
“हे याहवेह, तपाईंजस्तो को छ र?
तपाईंले दुर्बलहरूलाई तिनीहरूभन्दा शक्तिशालीहरूबाट बचाउनुहुन्छ,
अनि दुर्बल र खाँचोमा परेकाहरूलाई लुटेराहरूबाट बचाउनुहुन्छ।”
निर्दयी साक्षीहरू अगि आउँछन्;
तिनीहरूले मैले जान्दै नजानेका कुराहरू मलाई सोध्छन्।
तिनीहरूले मलाई भलाइको बदलामा खराबी गर्छन्,
तपाईंले मेरो प्राणलाई आफन्त गुमाएझैँ शोकमा डुबाउनुभएको छ।
तापनि जब तिनीहरू बिरामी भए, मैले भाङ्ग्राको वस्त्र लगाएँ;
र उपवास बसेर आफूलाई दुःखित बनाएँ,
जब मेरा प्रार्थना उत्तरविना नै फर्केर आयो,
मेरा मित्र वा भाइको निम्ति शोक गरेझैँ,
म तिनीहरूको निम्ति शोक गर्दै हिँडेँ।
आफ्नी आमाको निम्ति विलाप गरेझैँ
मैले शोकमा शिर झुकाएँ।
तर जब मैले ठेस खाएँ, तिनीहरू मेरो विरुद्धमा एकमत भएर हाँसो गरे;
मैले थाहै नपाई आक्रमणकारीहरू मेरो विरुद्धमा जम्मा भए।
तिनीहरूले नथाकी लगातार मेरो निन्दा गरे।
भक्तिहीनलेझैँ तिनीहरूले क्रूरतासाथ निन्दा गरे;
तिनीहरूले ममाथि दाह्रा किटे।
हे प्रभु, कहिलेसम्म तपाईं हेरिरहनुहुन्छ?
तिनीहरूका आक्रमणबाट,
र ती सिंहहरूबाट मलाई छुटाउनुहोस्।
म तपाईंलाई ठूलो महासभामा धन्यवाद चढाउनेछु;
विशाल जनसमूहमा म तपाईंको प्रशंसा गर्नेछु।
मेरा शत्रुहरू कारणविना
मेरो विरुद्धमा रमाउन नपाऊन्;
मलाई घृणा गर्नेहरूले कारणविना
एकनासै मेरो खिल्ली गर्न नपाऊन्1।
तिनीहरू त शान्तिको कुरै गर्दैनन्;
तर देशमा शान्तिसँग बस्ने
मानिसहरूका विरुद्धमा झूटो आरोपहरू रच्दछन्।
तिनीहरूले ठूलो मुख बाएर मेरो विरुद्धमा भन्छन्, “ओहो! ओहो!
हामीले आफ्नै आँखाले यो देख्न पायौँ।”
हे याहवेह, तपाईंले यो देख्नुभएको छ; अब चुप लागेर नबस्नुहोस्।
हे प्रभु, मदेखि टाढा नहुनुहोस्!
हे प्रभु, मेरा परमेश्वर, उठ्नुहोस्; र मेरो रक्षाको निम्ति जाग्नुहोस्!
मेरो निम्ति लडिदिनुहोस्।
हे याहवेह, मेरा परमेश्वर, तपाईंको धार्मिकतामा मलाई निर्दोष ठहराउनुहोस्;
तिनीहरू ममाथि रमाउन नपाऊन्।
तिनीहरूले आफ्ना मनमा भन्न नपाऊन् कि, “आहा! हामीले चिताएजस्तै पुग्यो!”
अथवा भन्न नपाऊन्, “हामीले त्यसलाई निलिदियौँ।”
मेरो विपतको समयमा मेरो हाँसो उडाउनेहरू
सबै लाजमा र अन्योलमा परून्;
मभन्दा ठूलो हुँ भनी घमण्डले धाक दिनेहरू
सबै शर्म र अपमानले ढाकिऊन्।
म निर्दोष साबित भएको कामना राख्नेहरू
आनन्दले जयजयकार गरून् र हर्षित होऊन्;
तिनीहरूले निरन्तर यसो भनिरहून् कि, “याहवेह उच्च पारिनुभएको होस्,
उहाँ, जो आफ्नो सेवकको भलाइमा प्रसन्न हुनुहुन्छ।”
मेरो जिब्रोले तपाईंको धार्मिकताको घोषणा गर्नेछ,
र तपाईंको प्रशंसा दिनभरि गरिरहनेछ।
Source notes (1)
- Footnote मूल भाषामा आँखा झिम्काउनु
Biblica® नेपाली समकालीन सर्वसुलभ संस्करण. Copyright © 1998, 2006, 2021, 2024 Biblica, Inc. Licensed under CC BY-SA 4.0. ” Notice of copyright must appear on the title or copyright page of the work as follows: [Technology consultant will insert copyright and trademark statements from above. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.