Biblica® नेपाली समकालीन सर्वसुलभ संस्करण
यशैया 32
धार्मिकताको राज्य
हेर, एउटा राजाले धार्मिकतामा राज्य गर्नुहुनेछ;
अनि शासकहरूले न्यायपूर्वक शासन गर्नेछन्।
हरेक मानिस बतासबाट जोगिने आश्रय
र आँधीबाट जोगिने शरणस्थानझैँ,
मरुभूमिमा पानीको खोलाझैँ,
र तिर्खाएको जमिनमा एउटा ठूलो चट्टानको छायाझैँ हुनेछ।
तब देख्नेहरूका आँखा फेरि बन्द गरिनेछैन;
अनि सुन्नेहरूका कानले सुन्नेछन्।
अविवेकीको मनले समझशक्तिसाथ बुझ्नेछ;
अनि भकभकाउने जिब्रोले स्पष्ट र सफासँग बोल्नेछ।
मूर्खलाई फेरि भद्र भनिनेछैन,
न त बदमासलाई उच्च आदर दिइनेछ।
किनकि मूर्खले अज्ञानताको कुरा गर्छ,
त्यसको मन दुष्ट कुराहरूमा लागिरहन्छ;
त्यसले भक्तिहीनताका कामहरू गर्छ;
अनि याहवेहको विषयमा गलत कुरा फैलाउँछ;
भोकोलाई त्यसले भोकै छोड्छ,
र तिर्खाएकोलाई त्यसले पानी दिँदैन।
बदमासका काम गर्ने तरिकाहरू दुष्ट हुन्छन्,
र खाँचोमा परेकाहरूको बिन्ती न्यायोचित भए तापनि
गरिबहरूलाई झूटले नाश गर्नलाई
त्यसले दुष्ट योजनाहरू बनाउँछ।
तर भलादमीले भलो युक्ति रच्दछ;
अनि भलो कामहरूद्वारा नै त्यो खडा रहन्छ।
यरूशलेमका स्त्रीहरू
हे ढुक्कसित बस्ने स्त्रीहरू हो,
उठ र मेरो कुरा सुन;
आफूलाई सुरक्षित ठान्ने छोरीहरू हो,
मैले भन्नुपर्ने कुरा सुन!
एक वर्षभन्दा केही बढी समयमा
तिमीहरू सुरक्षित ठान्नेहरू काँप्नेछौ;
अङ्गुरको फसलै हुनेछैन,
र फलको कटनी हुनेछैन।
हे ढुक्क बस्ने स्त्रीहरू हो, थरथर होओ;
आफूलाई सुरक्षित ठान्ने हे छोरीहरू हो, थरथर काम!
आफ्ना राम्रा लुगा फुकाल,
र आफ्ना कम्मरमा भाङ्ग्रा लगाओ।
असल खेतहरूका निम्ति,
फलदायक दाखको निम्ति आफ्ना छाती पिट;
अनि मेरो जातिका देशको निम्ति,
काँडा र सिउँडीले ढाकेको देशका निम्ति—
हो, सबै आनन्द मनाउने घरहरूका निम्ति,
र यो आनन्दको सहरको निम्ति बिलौना गर।
किल्ला त्यागिनेछ,
हल्लाको सहर शून्य हुनेछ;
किल्ला र रक्षा-धरहरा सदाका निम्ति बेकामका रहनेछन्;
जङ्गली गधाको निम्ति हर्ष र गाईबस्तुका निम्ति चरन हुनेछन्;
जबसम्म माथिबाट हामीमा आत्मा खन्याइदैन,
र मरुभूमि मलिलो खेत हुँदैन,
र मलिलो खेत जङ्गलझैँ देखिँदैन;
याहवेहको न्यायले त्यस मरुभूमिमा वास गर्नेछ।
अनि मलिलो खेतमा उहाँको धार्मिकता रहनेछ।
धार्मिकताको फल शान्ति हुनेछ;
अनि धार्मिकताको प्रभाव सदाको निम्ति चैन र भरोसा हुनेछ।
मेरा मानिसहरू शान्तिपूर्ण वासस्थानहरूमा,
सुरक्षित घरहरूमा र
शान्त विश्राम स्थलहरूमा बस्नेछन्।
असिनाले जङ्गललाई पूरै ढाके तापनि
सहर पूर्ण रूपले समतल भए तापनि
तिमीहरू आफ्ना बिउहरू प्रत्येक खोलाको किनारमा छर्दै,
अनि आफ्ना गाईबस्तु र गधाहरूलाई ढुक्कै चर्नका निम्ति दिन पाउँदा
तिमीहरू कति धन्यका हुनेछौ।
Biblica® नेपाली समकालीन सर्वसुलभ संस्करण. Copyright © 1998, 2006, 2021, 2024 Biblica, Inc. Licensed under CC BY-SA 4.0. ” Notice of copyright must appear on the title or copyright page of the work as follows: [Technology consultant will insert copyright and trademark statements from above. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.