Biblica® नेपाली समकालीन सर्वसुलभ संस्करण
होशे 7
“जब म इस्राएललाई निको पार्नेछु,
एफ्राइमको पाप उदाङ्गो हुन्छ;
र सामरियाका अपराधहरू प्रकट हुन्छन्।
तिनीहरूले छलपूर्ण व्यवहार गर्छन्;
चोरहरू घर फोरेर घरभित्र पस्छन्,
डाँकुहरूले सडकहरूमा लुटपाट गर्छन्;
तर तिनीहरूले यो बुझ्दैनन्,
म तिनीहरूका सबै दुष्ट कामहरूको स्मरण गर्छु।
तिनीहरूका पापहरूले तिनीहरूलाई ढाकेका छन्;
तिनीहरू सधैँ मेरो सामु छन्।
“तिनीहरूले राजालाई आफ्ना दुष्टताले
र शासकहरूलाई झूटले खुशी तुल्याउँछन्।
तिनीहरू जलिरहेका भट्टीजस्तै
सबै व्यभिचारीहरू छन्,
जसको आगो पकाउनेले पिठो मुछेदेखि रोटी नपाकुन्जेल
त्यसले दाउरा नचलाए तापनि सल्किरहन्छ।
हाम्रा राजाको चाडको दिनमा
शासकहरू मद्य पिएर चुर हुन्छन्,
र तिनले गिल्ला गर्नेहरूसँग पनि हात मिलाउँछन्।
तिनीहरूको हृदय भट्टीजस्तै छ;
तिनीहरूले त्यसलाई षड्यन्त्रका साथ भेट्छन्।
तिनीहरूको क्रोध रातभरि जलिरहन्छ;
बिहान त्यो दन्किरहेको आगोजस्तै हुन्छ।
तिनीहरू सबै आगोको भट्टीजस्तै ताता छन्;
तिनीहरूले आफ्ना शासकहरूलाई भस्म पार्छन्।
तिनीहरूका सबै राजाहरू मारिन्छन्,
तर तिनीहरू कसैले पनि मलाई पुकार्दैनन्।
“एफ्राइम अन्य राष्ट्रहरूसँग घुलमिल हुन्छ;
एफ्राइम एकापट्टि मात्र पोलेको रोटीजस्तै हो।
विदेशीहरूले त्यसको शक्ति नाश पारेका छन्,
तर पनि त्यसले त्यो जान्दैन।
त्यसका केश फूलेका छन्,
तर पनि त्यसले त्यो जान्दैन।
इस्राएलको अहङ्कारले उहाँको विरुद्धमा गवाही दिन्छ,
तर यी सबै कुराहरू भए तापनि
त्यो याहवेह आफ्ना परमेश्वरकहाँ फर्कंदैन,
न त उहाँको खोजी गर्छ।
“एफ्राइम ढुकुरजस्तो छ,
सजिलै बहकाउन सकिने मूर्ख,
त्यसले कहिले इजिप्टलाई पुकार्छ भने,
कहिले त्यो अश्शूरतिर फर्कन्छ।
जब तिनीहरू जान्छन्, म तिनीहरूमाथि मेरो जाल फिँजाउनेछु;
म तिनीहरूलाई आकाशका पक्षीहरूलाई जस्तै तल झार्नेछु।
जब तिनीहरू एक ठाउँमा सँगै भेला भएको सुन्छु,
तब म तिनीहरूलाई पक्रनेछु।
धिक्कार तिनीहरूलाई!
किनकि तिनीहरू मदेखि तर्किगएका छन्!
तिनीहरू नष्ट होऊन्;
किनकि तिनीहरूले मेरो विरुद्धमा विद्रोह गरेका छन्!
म तिनीहरूलाई छुटकारा दिने उत्कट इच्छा राख्दछु,
तर तिनीहरू मेरो विरुद्धमा झूट बोल्छन्।
तिनीहरू आफ्ना हृदयदेखि मलाई पुकार गर्दैनन्,
तर तिनीहरू आफ्ना ओछ्यानमा विलाप गर्छन्।
तिनीहरू अन्न र नयाँ दाखमद्यका
निम्ति आफैँलाई घाइते पार्छन्, तिनीहरूका देवताहरूसँग पुकार गर्छन्,
तर मदेखि भने तिनीहरू तर्किएर जान्छन्।
मैले तिनीहरूलाई तालिम दिएँ र तिनीहरूका पाखुरा बलियो बनाएँ,
तर तिनीहरू मेरो विरुद्धमा दुष्ट युक्ति रच्दछन्।
तिनीहरू सर्वोच्चकहाँ फर्कंदैनन्;
तिनीहरू व्यर्थैको बाङ्गो धनुजस्तै छन्।
तिनीहरूका अगुवाहरू तिनीहरूका अहङ्कारी
कुराहरूको कारण तरवारद्वारा नष्ट हुनेछन्।
यसको कारण तिनीहरू
इजिप्ट देशमा हाँसोको पात्र बन्नेछन्।
Biblica® नेपाली समकालीन सर्वसुलभ संस्करण. Copyright © 1998, 2006, 2021, 2024 Biblica, Inc. Licensed under CC BY-SA 4.0. ” Notice of copyright must appear on the title or copyright page of the work as follows: [Technology consultant will insert copyright and trademark statements from above. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.