Biblica® नेपाली समकालीन सर्वसुलभ संस्करण
इजकिएल 27
टायरको निम्ति विलाप
याहवेहको यो वचन मकहाँ आयो: “हे मानिसको छोरा, टायरको विषयमा एउटा विलाप गीत गा; समुद्रको प्रवेशद्वारमा रहेको, धेरै किनारहरूमा रहेका टायरका व्यापारी मानिसहरूलाई भन्, ‘प्रभु याहवेह यसो भन्नुहुन्छ:
“ ‘हे टायर, तँ भन्छस्,
“म सुन्दरतामा सिद्ध छु।”
तेरा सिमानाहरू समुद्रको बीचमा फैलिएको थियो;
तेरा निर्माणकर्ताहरूले तेरो सुन्दरतालाई सिद्ध पारिदिए।
तिनीहरूले तेरा काठका फल्याकहरू
सेनीरका1 सल्लाका रूखहरूबाट बनाए;
तेरा निम्ति मस्तुल2 बनाउनलाई
लेबनानबाट देवदारु ल्याए।
तिनीहरूले तेरा पतवारहरू
बाशानका फलाँटका रुखहरूबाट बनाए;
तिनीहरूले तेरो जहाजको तला साइप्रसका किनारका सिसौका
काठहरूले बनाए, र त्यसलाई हस्तीदन्तले सिँगारे।
तेरो जहाजको पाल इजिप्टको मिहिन बुट्टेदार सुतीको कपडाबाट बनिएको थियो,
र त्यसले तेरो झण्डाको काम पनि गर्थ्यो;
तेरो चँदुवा निलो र बैजनी कपडाको
साइप्रसको एलीशाह सहरका किनारबाट ल्याइएको थियो।
सीदोन र अर्वदका मानिसहरू तेरा नाविक थिए;
हे टायर, तेरा निपुण मानिसहरू जहाजमै चढेर बसेका चालकहरू थिए।
जहाजमा टालटुल गर्ने कामको निम्ति
गबालका अनुभवी र सिपालु कारिगरहरू जहाजमै थिए।
समुद्रका सबै जहाजहरू र तिनीहरूका नाविकहरू
तेरा मालसामानहरू व्यापार गर्न तँकहाँ आउँथे।
“ ‘परसीयाका मानिसहरू, लूद र पूतका मानिसहरू
तेरो सेनामा सेवा गर्ने सिपाहीहरू थिए।
तिनीहरूले आफ्ना ढाल र टोपहरू
तेरा पर्खालहरूमा झुण्ड्याएर तेरो गौरव बढाए।
अर्वद र हेलेकका मानिसहरू
तेरा पर्खालका चारैतिर पहरेदार थिए;
गमादका मानिसहरू
तेरा धरहराहरूमा थिए।
तिनीहरूले आफ्ना ढालहरू तेरा पर्खालका चारैतिर झुण्ड्याउँथे;
तेरो सुन्दरता पूर्ण बनाउँथे।
“ ‘तेरा मालसामानहरूको धेरै धनसम्पत्ति भएको कारण तर्शीशले तँसँग व्यापार गर्थ्यो; तिनीहरूले तेरा व्यापारका सरसमानहरूसँग चाँदी, फलाम, टिन र सिसा साटासाट गरे।
“ ‘ग्रीस, तूबल र मेशेकले तँसित व्यापार गर्थे; तिनीहरूले तेरा मालसामानहरूसित कमाराहरू र काँसाका सामग्रीहरूसँग साटासाट गर्थे।
“ ‘बेथ-तोगर्माका मानिसहरूले रथका घोडाहरू, लडाइँका घोडाहरू र खच्चरहरू तेरा व्यापारका मालसामानहरूसित साटासाट गर्थे।
“ ‘रोडसका3 मानिसहरूले तँसित व्यापार गरे; अनि समुद्र किनारका धेरै देशहरू तेरा ग्राहकहरू थिए; तिनीहरूले तँलाई हस्तीदन्त र आब्नुस काठ दामको रूपमा तिरे।
“ ‘तेरा धेरै उत्पादित कुराहरूको कारण अरामले तँसित व्यापार गर्यो; तिनीहरूले नीलमणि, बैजनी वस्त्र, बुट्टेदार चीजहरू, मलमल सुती कपडा, मुगा र लालमणि तेरा व्यापारका मालसामानहरूसित साटासाट गरे।
“ ‘यहूदा र इस्राएलले तँसित व्यापार गरे; तिनीहरूले तेरा मालसामानहरूसित मिन्नीतका गहुँ र नेभारा,4 मह, जैतुन तेल र सुगन्धित लेप साटासाट गरे।
“ ‘तेरा धेरै उत्पादित कुराहरू र मालसामानहरूको धेरै धनसम्पत्ति भएको कारण दमस्कसले तँसित व्यापार गर्यो। तिनीहरूले हेल्बोनबाट ल्याएको मद्य र जहरबाट ल्याएको सेतो ऊन दिए। दानवंशीहरू र उजालका ग्रीकहरूले तँसित व्यापार गरे: तिनीहरूले तेरा सामानहरूसित फलाम, तेजपात र बोझो साटे।
“ ‘ददानले तँसित जिनको व्यापार गर्यो।
“ ‘अरब र केदारका सबै राजकुमारहरू तेरा ग्राहकहरू थिए; तिनीहरूले तँसित थुमाहरू, साँढे भेडाहरू र बाख्राहरूको व्यापार गरे।
“ ‘शेबा र रामाहका व्यापारीहरूले तँसित व्यापार गरे; तिनीहरूले सबैभन्दा उत्तम किसिमका मसलाहरू, बहुमूल्य पत्थरहरू र सुनहरू तेरा मालसामानहरूसित साटासाट गरे।
“ ‘हारान, कन्ने, अदन र शेबाका व्यापारीहरू, अश्शूर र किल्मदले तँसित व्यापार गरे। तिनीहरूले तेरा बजारमा सुन्दर वस्त्रहरू, निलो धागोले बनाएका लुगा, बुट्टेदार कपडाहरू र बटारिएका र कसिएका डोरीहरूसँग बनिएका रङ्गी-बिरङ्गी गलैँचाहरूको व्यापार गरे।
“ ‘तर्शीशका जहाजहरूले
तेरा सामानहरू बोकेर व्यापार गर्छन्।
तँ समुद्रको बीचमा यात्रा गर्दा
तेरो जहाज मालसामानले भरिएको हुन्छ।
तेरा नाविकहरूले तँलाई
बीच समुद्रमा लैजान्छन्,
तर पूर्वीय बतासले तँलाई समुद्रको
बीचमा टुक्रा-टुक्रा पारिदिनेछ।
तेरो धनसम्पत्ति, व्यापारका मालसामानहरू,
तेरा नाविकहरू, चालकहरू र टालटुल गर्ने मानिसहरू,
तेरा व्यापारीहरू र तेरा सबै सिपाहीहरू;
अनि तेरो सर्वनाशको दिन
जहाजमा भएका सबै जना
समुद्रको बीचमा डुबिजानेछन्।
तेरा नाविकहरूले चीत्कार गर्दा
समुद्र किनारका ठाउँहरू काम्नेछन्।
पतवार खियाउनेहरू सबैले
तिनीहरूका जहाजहरू त्यागिदिनेछन्;
सबै नाविकहरू र चालकहरू
समुद्रको किनारमा उभिनेछन्।
तिनीहरूले आफ्ना सोर उचाल्नेछन्,
र तेरा निम्ति धुरुधुरु रुनेछन्;
तिनीहरूले आफ्ना शिरमाथि धुलो छर्नेछन्
र खरानीमा लडीबुडी गर्नेछन्।
तिनीहरूले तेरो कारण आफ्ना शिर खौरनेछन्
र भाङ्ग्रा लगाउनेछन्।
तेरा निम्ति तिनीहरू आत्मामा विचलित भएर
शोकमा परी धुरुधुरु रुनेछन्।
तिनीहरूले तेरो निम्ति विलाप गरिरहँदा,
तिनीहरूले तेरो बारेमा यसो भन्दै एउटा विलाप गीत गाउनेछन्:
“समुद्रले घेरिएको टायरलाई जस्तै
कसैलाई कहिल्यै चुप गराइएको छ?”
तेरो व्यापारिक मालसामानहरू समुद्रपार भएर जाँदा,
तैँले धेरै जातिहरूलाई सन्तुष्ट पारिस्;
तेरो ठूलो धनसम्पत्ति र तेरा मालसामानहरूले
पृथ्वीका राजाहरूलाई तैँले धनी तुल्याइस्।
अहिले तँ पानीको गहिराइमा
समुद्रद्वारा चकनाचुर पारिएको छस्;
तेरा मालसामानहरू र तेरा सबै साथीहरू
तँसितै तल समुद्रको गहिराइमा नष्ट भएका छन्।
समुद्रको किनारमा बस्नेहरू सबै
तँलाई देखेर भयभीत भएका छन्;
तिनीहरूका राजाहरू त्रासले थरथर काम्छन्,
र तिनीहरूका अनुहारहरूमा डर छाएको छ।
जाति-जातिहरूका व्यापारीहरूले तँलाई खिसी गर्छन्;
तँ डरलाग्दो अन्त्यमा आइपुगेको छस्;
अनि तँ अब सदाको निम्ति नष्ट हुनेछस्।’ ”
Source notes (4)
- Footnote हेर्मोन पर्वत
- Footnote जुन जहाज वा डुङ्गामा समात्नको लागि राखिएको ठाडो पोल हो।
- Footnote मूल भाषामा ददान
- Footnote मूल भाषामा यसको अर्थ अनिश्चित छ।
Biblica® नेपाली समकालीन सर्वसुलभ संस्करण. Copyright © 1998, 2006, 2021, 2024 Biblica, Inc. Licensed under CC BY-SA 4.0. ” Notice of copyright must appear on the title or copyright page of the work as follows: [Technology consultant will insert copyright and trademark statements from above. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.