Biblica® नेपाली समकालीन सर्वसुलभ संस्करण
आमोस 9
इस्राएल ध्वस्त पारिनेछ
मैले प्रभुलाई वेदीको छेउमा उभिरहनुभएको देखेँ; अनि उहाँले भन्नुभयो:
“खम्बाका टुप्पाहरूमा हिर्का,
ताकि सँघारहरू हल्लिऊन्।
सबै मानिसहरूका टाउकोमाथि ती ढालिऊन्;
बाँकी बचेकाहरूलाई म तरवारले मार्नेछु।
एकै जना पनि भाग्न पाउनेछैन;
एउटै पनि उम्कन पाउनेछैन।
तिनीहरू पातालको गहिराइसम्म गए तापनि
मेरो हातले तिनीहरूलाई त्यहाँबाट निकाल्नेछ।
तिनीहरू माथि स्वर्गमा उक्ले तापनि
म तिनीहरूलाई तल झार्नेछु।
तिनीहरू कर्मेलको टाकुरामा लुके तापनि
त्यहाँ म तिनीहरूलाई खोज्नेछु र पक्रिनेछु।
तिनीहरू मेरो दृष्टिबाट समुद्रको पीँधमा लुके तापनि
त्यहाँ म तिनीहरूलाई डस्न सर्पहरूलाई आज्ञा दिनेछु।
तिनीहरूका शत्रुहरूले तिनीहरूलाई निर्वासनमा लगे तापनि
त्यहाँ म तिनीहरूलाई मार्न तरवारलाई आज्ञा दिनेछु।
“म मेरो नजर तिनीहरूमाथि राख्नेछु,
भलाइको निम्ति होइन, तर खराबीको निम्ति।”
प्रभु, सेनाहरूका याहवेह,
उहाँ जसले पृथ्वीलाई छुनुहुन्छ, र त्यो पग्लन्छ;
अनि त्यहाँ बस्नेहरू सबै विलाप गर्छन्;
सारा देश नील नदीझैँ माथि उठ्नेछ,
त्यसपछि इजिप्ट नदीझैँ डुब्नेछ;
उहाँले आफ्नो भव्य दरबार आकाशमा बनाउनुहुन्छ,
र यसको जग पृथ्वीमा बसाल्नुहुन्छ;
उहाँ जसले समुद्रको पानीलाई बोलाउनुहुन्छ,
र ती पानीलाई जमिनको सतहमाथि खन्याउनुहुन्छ,
उहाँको नाम याहवेह हो।
“के तिमी इस्राएलीहरू मेरा निम्ति
कूशका सन्तानजस्ता छैनौ र?”
याहवेहले घोषणा गर्नुहुन्छ।
“के मैले इस्राएललाई इजिप्टबाट,
पलिश्तीहरूलाई कप्तोरबाट,
र अरामीहरूलाई कीरबाट निकालेर ल्याएको होइन?
“निश्चय नै प्रभु याहवेहको दृष्टि
यो दुष्ट राज्यमाथि छ।
म यसलाई पृथ्वीको
सतहबाट ध्वस्त गर्नेछु।
तापनि म याकोबको घरानालाई
सम्पूर्ण रूपले नाश गर्नेछैनँ,”
याहवेह घोषणा गर्नुहुन्छ।
“किनकि म आज्ञा दिनेछु,
र इस्राएलको घरानालाई
सबै राष्ट्रहरूका बीचमा यसरी हल्लाउनेछु,
जसरी चाल्नीमा अन्नलाई चालिन्छ;
तर एउटा ढुङ्गाको टुक्रा पनि भुइँमा खस्नेछैन।
मेरा मानिसहरूका बीचमा भएका
सबै पापीहरू तरवारले मारिनेछन्;
तिनीहरू सबै जना, जसले यसो भन्छन्,
‘विपत्ति हामी नजिक आउनेछैन, न त विपत्तिले हामीलाई छुने नै छ।’
इस्राएलको पुनर्स्थापन
“त्यस दिन,
“म दावीदको भत्केको पाललाई फेरि स्थापित गर्नेछु,
अर्थात् म यसका भत्केका पर्खालहरू मर्मत गर्नेछु;
अनि यसका भग्नावशेषहरूलाई फेरि निर्माण गर्नेछु,
अर्थात् योजस्तो पहिले थियो, त्यस्तै फेरि निर्माण गर्नेछु,
ताकि तिनीहरूले एदोमका बाँकी बचेकाहरूलाई
र मेरो नाम लिने सबै राष्ट्रहरूमाथि अधिकार गर्न सकून्,”
याहवेह घोषणा गर्नुहुन्छ, जसले यी कुराहरू गर्न सक्नुहुन्छ।
याहवेह घोषणा गर्नुहुन्छ, ती दिनहरू आउँदैछन्,
“जब जोत्नेले कटनी गर्नेलाई उछिन्नेछ,
र बिउ छर्नेले दाख पेल्नेलाई उछिन्नेछ।
नयाँ दाखमद्य पर्वतहरूबाट चुहुनेछन्,
र सबै डाँडाहरूबाट ती बग्नेछन्।
म मेरो जाति इस्राएललाई निर्वासनबाट फर्काएर ल्याउनेछु।
“तिनीहरूले भत्केका सहरहरू फेरि पुनर्निर्माण गर्नेछन्,
र ती सहरहरूमा बसोबास गर्नेछन्।
तिनीहरूले दाखबारीहरू लगाउनेछन् र तिनीहरूका दाखमद्य पिउनेछन्;
तिनीहरूले बगैँचाहरू बनाउनेछन् र त्यहाँका फलहरू खानेछन्।
म इस्राएललाई तिनीहरूको आफ्नै देशमा बसाल्नेछु,
मैले तिनीहरूलाई दिएको
देशबाट फेरि कहिल्यै पनि नउखेलिने गरी बसाल्नेछु,”
याहवेह तिमीहरूका परमेश्वर यसो भन्नुहुन्छ।
Biblica® नेपाली समकालीन सर्वसुलभ संस्करण. Copyright © 1998, 2006, 2021, 2024 Biblica, Inc. Licensed under CC BY-SA 4.0. ” Notice of copyright must appear on the title or copyright page of the work as follows: [Technology consultant will insert copyright and trademark statements from above. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.