Noiri
प्रगटी 5
पुस्तक आन मेडू
जो राजगादीपोअ बोहीत ओतु, तियाआ हाजाड़्या आथोमेहें एक पुस्तक देख्यो जो मायते आन बारथे लेखल्यो ओतो, आन तों पुस्तक हांत सिक्का मारीत कोइत बोंद कोअयोतो. आन आंय एका सेक्तीमान देवदुतोहो देख्यू, जो वोडा आवाजोमेहें आअड़ीतुतो, “या पुस्तकोहो उगाड़ीइलोअ आन या सिक्काआ तोड़ीइलाअ लायक कोडो होय?” पोन होरगाम, धरतीपोअ, धरतीइ निसे कोडोज एहेलोहो माहुंउं नाहां सापड़्यो, जो पुस्तक उगाड़ीइलोअ नेते वासीइलाम सेक्तीमान ओय. ताहरुउ आंय जाअखीलुहू रोड़ू वोल्यू. काहाके तिया पुस्तकोहो उगाड़ीइलाअ नेताहां वासीइलाआ लायक कोडोन्ने सापड़्यो. ताहरोअ तियां डायहां मेर्युउ एक जोओं माहूं कोयो, “मा रोड़ही; पाल, तो यहुदाआ पारवाड़ीइ सिहूंवाग होय, जो दाविदोअ बिज होय, तो जिकुहू; तियाहा काजे तो पुस्तक आन तियाआ सिक्का उगाड़ीइलाअ लायक होय.”
ताहरुउ राजगादीइ जागे शार जनवारोअ आन तियां डायहांअ विसमेहें आंय एक गाराहा कोअल्यू मेडू उबोइत रोल्यू देख्यू. तियाआ हांत हिंगे आन हांत डोआ ओता; ए देवोअ हांत आत्मा होय, जियींहीं देवे पुरी धरतीपोअ मोकल्यीही. ताहां मेडू आहने आवीत कोइत राजगादीपोअ बोहनाराअ हाजाड़्या आथोम रोत पुस्तक लेदो. जेहेलाम तिये मेडे पुस्तक लेत लेदो, तेहेलाम तें शारु जनवारे आन शोवीस डायहां मेडाअ पागे पोड़्या. तियां आखा डायहांआं आथोम तंबिवरे ओते, आन आगरबत्ती वाअहीं पोआअला वाटका ओता,जे पवित्र माहुंउं प्रार्थना होय. ते ओं नोवो गित गावा वोल्या:
“तू या पुस्तकोहो लेएलाआ आन तियाआ
सिक्का उगाड़ीइलाअ लायक होय.
काहाके तुमे गाराहा ओवीत कोइत सोताआ रक्तावाअहीं हारेक कुल, पारवाड़ी आन राज्या राज्यामेहें बाशा गोगनारा,
आक्खामेहें रोत देवोअ काजे माअहुंहूं वेसाते लेदेहे,
आन तियांहां आपाआ देवोअ काजे एक राज्य
आन पुंजारु बोणावयाहा:1 आन ते धरतीपोअ राज कोअताहा.”
फाशोअ आंय पाल्यो, ते राजगादी, जनवारोअ आन डायहांअ मेरेमेरे जाअखीलाहा देवदुतोअ आवाज उनाअयु, आन तियांआं गणती लाखोअ आन करोड़ोअ ओती. ते वोडा आवाजोमेहें ओं गित गावताते,
“जो गाराहा ओवल्यू तोज
सेक्ती, धन, बुध्दी, ताकत,
मानपान, महिमा आन स्तुतीइ लायक होय!”
फाशोअ आंय होरगामेहें, धरतीपोअ, धरतीइ निसे आन दोर्यामेर्याआ हारेक जिवोहो एहें कोत्लाहा उनाअयु,
“जो राजगादीपोअ बोठुहू तियाहा
आन मेडाहा वोडाय आन मानपान, महिमा
आन सेक्ती हादाजलम रोअहूं जोवे!”
आन तियां शारु जनवारो कोयो, “आमेन!” आन डायहां पागे पोड़ीत वोंद्यो.
Source notes (1)
- Cross-reference निर्ग 19:6; प्रगटी 1:6
Noiri. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.