Noiri
प्रगटी 14
मेडू आन तियाआ माअहें
आंय फाशोअ देख्यो, मेडू सियोन डोगोपोअ उबू रोत रोयुहू, तियाअरी एक लाख शोवरेशाड़ीस हाजार माअहें होय, जियांआं निंडाअ पोअ तियाआ नाव आन तियाआ आब्हाअ नाव लेख्योहो.1 आंय जाअखीलीही जोरे वोहनारा खाडीइ पाअयोंअ आन जाअखीलीही जोरे गाजीइलाअ आवाज होरगामेहें उनाअयू, आन जो आवाज आंय उनाअयू तो तंबिवरो वाजाड़नाराआ आवाजोअ होसे ओतू. तें माअहें राजगादीइ सामने, शार जनवारोअ आन डायहांआं सामने एक नोवो गित गावतेते. तियां एक लाख शोवरेशाड़ीस हाजार माअहुंउं सिवाय, जे धरती पोअ वेसाते लेदेते, बिहीरो कोडोज तो गित नाहां सिकाइत सेको. एं माअहें बोईंइरी नाहां सुके, एं कुवांरे होय; जिहीं काबी मेडू जाहे, तें तियाअरी सालतेहे; देवोअ आन मेडाअ काजे पेल्लाआ फलोअ होस तियांहां वेसाते लेदेहे. तियांआं सोब खोटो नाहां गोग्यी, ते निर्दुस होय.
तीन देवदुत
फाशुउ आंय एका देवदुतोहो जुगोम रोत उतरीइत्लाहा देख्यू, आन तियापोअ धरतीपोअ रोनारा हारेक देस, कुल, जाती-जातीइ बाशा गोगनाराआ आन माअहुंउं काजे तियापोअ एक हादाजलम्यीइ हाजी बातमी ओती. तिये वोडा आवाजोमेहें कोयो, “देवोहो बिवा, आन तियाआ महिमा कोआ, काहाके न्यायनिवाड़ाआ दिही आहने आवीत लागुहू; जिये होरगो, धरती, दोर्या आन पाअयोंअ उकला बोणावया, तियाआ आराधना कोआ.”
तियाआ फाटी एक बिहीरु देवदुत आवयू आन कोनु वोल्यू, “तो आरवाइत गोयोहो, आन बाबेल वोडो होयर आरवाइत गोयोहो, तिये आखा देसोहो तियाआ सिनालोअ जास्ती माणू दाराक्शाआ रोह पिवाड़्युतो.”
फाशुउ तियाआ फाटी एक तिसरु देवदुत आयु आन तो वोडा आवाजोम कोनु वोल्यू, “जर एखू जनवारोअ नेताहां तियाआ मुर्तीइ भक्ती कोए आन तियाआ निंडाअ पोअ नेत आथोपोअ तियाआ निशाणी लागाड़े, ताहां तियाहा देवोअ खोतेए दाराक्शाआ रोहो पिवाड़ाय, तो कोरु रोहो, तियाआ खोतेए गिलासोमेहें ओल्युहू. आन तो पवित्र देवदुतोअ आन मेडाअ हुंबर आगीइ आन गंधकोअ पिड़ामेहें पोड़े. जे माअहें जनवारोअ नेत तियाआ मुर्तीइ आराधना आन तियाआ नावोअ निशाणी लागाड़तेहे, तियांआं पिड़ाआ तुमाणू कायम उसे उड्तू रोय; आन तियांहां रातेन दिही जोलोम होक ने आवे.”
ओमे पवित्र माअहुंउं धिरोअ वेल होय, जे देवोअ आदेशोअ पालन कोअतेहे आन ईसु मेहें विश्वासोम मजबुत रोतेहे.
आंय होरगामेहें कोडाहा माहूं एहें कोत्लाहा उनाअयू, “लेख: धन्य होय तें मोअनारे, जें ओमे रोत देवोमेहें विश्वास मिकीत मोअतेहे!” आत्मा कोहे, “होव! काहाके तियांहां कामोम रोत आराम जोड़ुहूं जोवे, तियांआं कामे तियांअरी जातेहे.”
धरतीइ वाडीइलोअ दिही
आंय पाल्यो के माहूं एक पांडो वादलो देखाअहे, तिया पोअ माहुंउं बेटुह्हू जेहें कोडो तेबी बोहीत रोयोहो,2 आन तियाआ मुन्कापोअ होनाआ टोपू होय आन तियाआ आथोमेहें एक वाडालू दात्लू होय. फाशुउ एक बिहीरु देवदुत मंदिरोमेहें रोत निहित, आन वोडा आवाजोमेहें आअड़ीत कोइत वादला पोअ बोहनाराहा कोहे, “ताआ दात्ला वाअहीं वाड, काहाके वाडीइलोअ वेल आवीत लागीही, आन धरतीइ कामाय पाकीत गोयीही.” वादला पोअ बोहनारे तियाआ दात्ला वाअहीं धरती पोअ वाडीइलोअ सुरवात कोअयी, आन आखी कामाय वाडाइत गोयी.
ताहरुउ एक देवदुत होरगाआ मंदिरोमेहें रोत निहयू, तियापोअ बी एक वाडालू दात्लू ओतू.
जियाहा आगीपोअ आधिकार ओतू एहेलुहू एक देवदुत देवान्यामेहें रोत निहयू; तिये जियापोअ वाडालू दात्लू ओतू तियाहा तिये जोरे आवाजोमेहें कोयो के तू ताआ वाडाली तारे वालू दात्लू सालाड़ीत धरतीइ दाराक्शाआ गुमसू तोड़ीत ले; तियांआं दाराक्शे पाकले होय. ताहां तिये देवदुते तियाआ दात्लू धरतीपोअ सालाड़्यू आन दाराक्शाआ गुमसा तोड़ीत देवोअ खोतेए दाराक्शाआ कुंडामेहें टाक्या. होयरोअ बारथे दाराक्शाआ कुंडामेहें गुमसा पेएसी देदा; तियांमेहें रोत जों रक्त वोहयो तों कोड़ाआ लगामोअ जागे जाआं पोतो, मोन्ज्ये एक होव कोस एतीही सेटे वोहीत गोयो.3
Source notes (3)
- Cross-reference यहे 9:4; प्रगटी 7:3
- Cross-reference दानि 7:13
- Cross-reference यश 63:3
Noiri. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.