ओबाद्या 1

एदोमोहों डोंड

1ओबाद्याहा ओवलो दर्शन. एदोमोअ1 बाप्तिम यहोवा एहें कोहे: आमू यहोवाअहें रोत खोबर उनाअयाहा, आन एका खोबऱ्याहा देसो देसोमेहें ओं कोय तेहें काजे मोकल्युहू: 2“उठा! आपू तियाअरी लोड़ाय कोअहूं!” आंय ताहूं आखा देसो रोत हानो बोणावी देहीं, तु जास् सोगद्यू गोणाअही. 3ए खोड़काआ कापड़ाटामेहें वोहती कोइत रोनारा, ए उसा जागामेहें रोनारा, ताआ वोडाय ताहूं दोगू देदुहू; तु मोनाआ मोनोमेहें कोहे, “कोडो माहूं पुयींपोअ उतारे?” 4पोन तु मोरागाआ होस उसे उड्तू ओय, एतोज नाहां पोन ताराआ विसमेहें ताआ पांजरु बोणावयू ओय, तेबी आंय ताहूं तिहीं रोत निसे ओदारीत पाड़ीहीं, यहोवा देवोअ ओंज वसन होय.

5जर बांड आन लुटनारा राती ताआ जागे आया, ताहां तियांहां जोवे तेतोहोज ने लेत जाय के? केतिही वोडी दुखोअ गोठ होय! के तु जुदू बोरबाद ओवनारुहू! जर दाराक्शाआ तोड़नारे ताआ जागे आये, ताहां तें हेरवाआ जोगेहे ने सोड़ीत जाय के? 6पोन एसावोअ मालधन की कोइत होदीत काड्यो, तियाआ निका‍ड़ल्यो मालधन की कोइत लुटात गोयो!

7जेते जोएं ताअरी शप्पत खादी, तियां आखा ताहूं हाद्दीइ जागे जाआं ठेपली देदुहू, जें माअहें ताआ हेंगात ओते, तें माअहें ताहूं दोगु देत कोइत ताहूं आधिकारोम मिके; आन जें माअहें ताआ रोटू खातेहे, तें ताआ काजे फांदू लागाड़तेहे आन कोतेहे, “याहा वाहीं ओकल कायनाहां.” 8यहोवा देवोअ ओंज वसन होय, केहें आंय तेहेलाम एदोम होयरोम रोत बुद्दी आन एसावोअ डोगोपोअ रोत समजदार माट्योहों ने आरवो के? 9ए तेमान2, ताआ बाहदिर माट्योंअ मोन कासो ओत जाय, आन एसावोअ डोगोपोऱ्याआ हारेक माटी मोइत आरवात जाय.

एदोमोहों डोंड जोड़ीइलोअ कारण

10ए एसाव, तु ताआ पाही याकोबोहो तारास कोआड़ल्यो कोत लाजे वाअहीं टापात जाही; आन तु हादाजलम्युउं आरवात जाही. 11जेदिहीं पारके माअहें तियाआ मालधन बुउसीत लेत गोये, आन पारका माअहूं इस्राएल होयरोअ गेटोम रोत फोहीत येरुसालेमोहों वाटा पाड़ीइलोअ काजे सिट्टी फोड़कावयी, तेदिहीं तियांमेएं तु बी एक ओतू. 12पोन तु ताआ पायहोअ ओड़सनीइ दिहोम आन तियाआ आफोतेए दिही पालीत खुस ओवीइलोअ आन यहुद्याआं आरवाइलोअ दिही पालीत कोइत खुस ओवीइलोअ आन तियांआं ओड़सनीइ दिही वोडाऱ्योज गोगीइलोअ बोराबर ने ओतो. 13माआ माअहुंउं ओड़सनीइ दिही तियांआं गेटोम ने फोहुंहूं जोवतोतो, आन तियांआं आफोतेए दिही तियांआं खाराब दशा ने पालता रोअहूं जोवतोतो, आन तियांआं ओड़सनीइ दिही तियांआं मालधनोहों आथ ने लागाड़ुहूं जोवतोतो. 14जे नाहीत जाताते तियांहां माइलोअ काजे तु सोवकड़ीपोअ ने निकात उबो रोअलो ओतो, आन जे ओड़सनेए दिही वासाअयाते तियांहां तु तोइत बी ने आपीइलो ओतो.

देव देसो देसोंअ न्याय कोए

15काहाके आखा देसोंपोअ यहोवा देवोअ दिही आविइलोअ आहने होय. जेहेलोहो तुमे कोअयोहो, तेहेंज कोइत ताहूं बी कोए, ताआ वेवारो वोलीत कोइत ताआज बोसी आलाय. 16जेहें कोइत तु माआ सोका डोगोपोअ3 पिदो, तेहेंज कोइत आखा देसोवाले कायम पिते रोय. एतोज नाहां पोन तें हुड़कावी-हुड़कावीइ पिये, आन तें पेल केदिहीं ओतेक नोते एहलेहे आरवात जाय.

इस्राएलोअ जिक

17पोन तेहेलाम बाकी वासात रोल्ये माअहें सियोन डोगोपोअ रोय, आन तो सोकू जागू ठोरे; आन याकोबोअ घराणो तियाआ खाजगी भागोअ आधिकारी ओवे. 18ताहां याकोबोअ घराणो आग आन योसेफोअ घराणो आरो बोणे, आन एसावोअ घराणो खुटड़े बोणे; आन ते तियांमेहें आग पेटाड़ीत तियांहां आरवीत टाकी देय, आन एसावोअ घराणाआ कोडोज ने वासाय; काहाके यहोवाज एहें कोयोहो.

19देहामा देसोअ माअहें एसावोअ डोगोअ आधिकारी बोणीत जाय, आन निसेए देसोअ माअहें पलिश्तीइ आधिकारी ओवे; आन यहुदी, एफ्राईम आन शोमरोनोअ मुलखोहो ताबाम कोइत लेय, आन बिन्यामीन गिलादोअ आधिकारी बोणे. 20इस्राएलोअ तियी टोलीम रोत जे माअहें बांदाखानीम जात कोइत कनानीइ विसमेहें सारपोतोअ जागे जाआं रोतेहे, आन येरुसालेमवाला मेऱ्येए जें माअहें गुलामीम जात कोइत सेपारादोमेहें होय, तें आखे देहामा देसोमेऱ्याआ होयरोंअ आधिकारी बोणीत जाय. 21जिकनारे माअहें एसावोअ डोगोअ न्याय कोइलाआ कोअते सियोन डोगोपोअ सोढ़ीत आवे, आन राज्य यहोवा देवोओज बोणीत जाय.