इस्राएलोअरी देवोअ राड़
“इस्राएलोअ माअहोंअ विरुद्दाम यहोवा देव की कोहे तों उनाआ!
“उठा, डोगोअ सामने यहोवा देवोअरी गोठी कोआ, आन टेंबा बी ताआ उनाअहूं जोवे.
“ओ डोगोअ, यहोवा देवोअ गोठ उनाआ, आन ए धरतीइ मजबुत पाया, तुमू बी उनाआ; काहाके यहोवा देव तियाआ खाजगी माअहूं पोअ दोस लागाड़ेहे, आन तो इस्राएलोअरी गोठी कोअहे.
“ए माआं माअहों, आंय तुमाआं की बिगाड़ल्यो? माहूं कोवा के की गोठी वाअहीं आंय तुमुहूं तारास देदू? आंय तुमुहूं मिसर देसोम रोत बारथे काड्ये; आंय तुमुहूं गुलामीम रोत काड्ये आन तुमुहूं लेत सालीइलोअ काजे आंय मोशेहे, आरोनोहो, आन मिरयामोहो मोकल्ये.1 ओ माआं माअहों, ओर कोआ, मोवाबवालू राजा बालाके तुमाआं विरुद्दाम केहेलिही गोठी बोणावयीते, आन बोरोअ पोऱ्यु बालामे तियाहा की सल्लु आप्यु तों ओर कोआ, ताहां शित्तीमोम रोत गिलगालोअ जागे जाआं ओवल्यी गोठीही, मोन्ज्ये यहोवा देवोअ हाजे कामे सोमजीत सेकहा.”2
देवोहो की जोवे
“आंय कोड्ली वस्तु आथोम लेत कोइत यहोवा देवोअ सामने जांव आन वोडी राजगादीपोअ बोहनारा देवोअ सामने आराधना कोओ? केहें आंय तियाआ सामने आगीइ गाराहा कोइलोअ काजे एका वोरह्योअ गिद्लो लेत जांव के? केहें यहोवा देव हाजार मेडावाअहीं आन जेयतुन तेलोअ लाख खाड्यीइ भेटेवाअहीं खुस ओवेहे के? केहें माआं गुनाआं माफीइ काजे डाया पोऱ्याआ गाराहा आपुहूं पोड़े के? माआं जिवे कोअल्या पापोअ बोदले माआं उब्जाड़ल्या एखाहा आपो के? ओ मोनवी, यहोवा देवे ताहूं कोयोहो के हाजो की होय; आन तो तापोअ रोत की आहरु कोअहे. ओंज ना के तु न्यायोवाअहीं काम कोअहूं जोवे, आन दया-माया वाअहीं मेर कोअहूं जोवे, आन नम्रतावाअहीं ताआ देवोअ वाटेम सालुहूं जोवे?”
यहोवा देवोअ आवाज येरुसालेम होयरोहो हाद कोअहे, बुद्दीमान माहुंउं यहोवा देवोअ नावोहो बित सालेहे, “तियाहा तुमू कोत डोंडोअ गोठीपोअ दिहान द्या, जियापोअ मालमिलकत आपीइलोअ आधिकार होय. ओमे जाआं पाप्योअ कोअमेहें लबाड़ी वाअहीं कामावल्यी मिलकत आन हानो मापलो सुकीइ कायनाहां के? केहें आंय ठोगोअ ताराजू मिकनाराहा, आन सोताआ थेयलीमेहें ठोगोअ वोजनोअ दोगड़ा मिकनाराहा विण डोंड आप्येज सोड़ी देंव? ताआ कुन्बी माअहें दोमतेहे आन ताआ रोनारे ठोगतेहे आन तियांआं जिब दोगु देनारी गोठी सोकतीही. तियाहा काजे आंय तुमुहूं मारु देएलाआ कोअते सुरवात कोअयीही, आन आंय ताआ पापोअ वाखरी ताहूं उजाड़ी देहीं. तु रोटू खाही पोन ने ताराअही, ताआ पोटू कायम ठाल्लुज रोये; तु पोशा मेलवीही ते खोरु, पोन वासाड़ीत ने सेकही, जों किबी तु वासाड़ही, तियाहा आंय तापोअ तारवाआ सालाड़नाराहा आपी देहीं. तु ओअही पोन वाडीत ने सेकही; तु जेयतुनोअ तेल पाड़ही, पोन तियाहा मुंडोअरी ने हारीत सेकही; तु दाराक्शाआ रोहो पाड़ही, पोन ने पित सेकही. काहाके ते ओम्रीइ रितीपोअ, आन आहाबोअ घराणाआ आखा कामोअ पुरमाणे सालतेहे; आन तुमू तियांआं कामोअ पुरमाणे सालतेहे; तियाहा काजे आंय ताहूं उजाड़ी देहीं, आन या गावोंअ रोनारे माअहें तुमाआ टिंगल कोए.”3
Source notes (3)
- Cross-reference निर्ग 4:10-16; 12:50,51; 15:20
- Cross-reference गणती 22:2—24:25; यहो 3:1—4:19
- Cross-reference 1 राजां 16:23-34; 21:25
Noiri. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.