Noiri
लुक 7
ईसुउ एका आधिकार्योअ सेवकोहो हुदारीइलो
(मत्तय 8:5-13)
जाहां ईसु ए आखी गोठी माअहुंहूं कोत सुक्यू, ताहां कफर्णहुम गाँवोम आयू. तिहीं एका रोमन आधिकाऱ्योअ एक सेवक ओतू जो तियाहा गोमतुतो, तो जाअखुज मांदवाड़्यु ओतू आन मोअनारुज ओतू. ताहां तिये आधिकार्ये ईसुउ बाप्तिमेहें उनाइत कोइत यहुदी माअहोंअ थोड़ाक डायहांहां तियाआ जागे ओं फुसीइलोअ काजे मोकल्या के माआं जागे आवित कोइत माआं पावरोहो हुदार. ते ईसुउ जागे आवया, आन तियाहा खुब रावणी कोइत कोना वोल्या, तो याअ कोअते लायक होय, के तु तियाआ मदत कोए, काहाके तो आपाआ माअहुंहूं मेर कोअत्लू, आन तिये आपाआ काजे एक यहुदी आराधनालय बोणावयोहो.
ईसु तियांअरी गोयू, पोन जाहां तो कोओअ आहनेज ओतू, ताहां आधिकार्ये तियाआ थोड़ाक दोस्त्योहों कोत मोकल्यो के, ए प्रभु, तकलीत मा कोअही, काहाके तु माआं कोअ आवे एतीही माआं लायकी कायनाहां. तियाहाज काजे आंय सोताहा बी ताआ जागे आविलोअ लायक ने जाअयों, पोने शब्द एतुज कोत दे, ताहां माआं पावर हुदरीत जाय.
“आंय बी बिहीरा आधिकार्योअ निसे काम कोअनारु माटी होय, आन माआं निसे बी थोड़ाक सिपायी होय; आन आंय जिया कोडाहा कोत्लु, ‘जा,’ ताहां तो जात्लू, बिहीराहा कोत्लु, ‘आव,’ ताहां तो आवत्लु; आन जाहां आंय माआं पावरोहो कोत्लु, ‘ओं कोअ,’ ताहां तो तेहेंज कोअत्लू.”
ओं उनाइत कोइत ईसु बोगलात गोयू, आन तिये फासाड़ी वोलीत तियाआ फासाड़ी आवनारी गोरदीही कोयो, “आंय तुमुहूं कोत देहो के, एहेलुहू विश्वास माहूं इस्राएलोम बी नाहां जोड़्यू.”
आन तिये आधिकार्ये कोत मोकलीइल्या मेर्याआ माटी, जेहेलाम कोअ आवित पाल्यो, ते तो पावर हुदरीत रोल्यू देख्यू.
एकी रोंडोअ बायीइ पोर्याहा जिवन दान
थोड़ाक दिहोअ फासाड़ी ईसु नाईन नावोअ होयरोम गोयू. तियाआ सेला आन वोडी गर्दी तियाअरी ओती. जाहां तो होयरोअ हाद्दीइ जागे पोतू, ताहां पाला, माअहें एका मोल्या माहुंहूं लेत जाया कोअतेते; जो आयहीइ एखलू पोर्यू ओतू, आन ते बाय रोंडाअली ओती; आन होयरोअ जाअखीलेहे माअहें तियीइरी ओते. तियाहा पालित कोइत प्रभुहू किइमाय आयी, आन तियीही कोयो, “मा रोडीही.” ताहां तो आहने जात कोइत तिया तोड़ोहो आथ लागाड़्यु, आन सिड़ी उसलीइनारे उबे रोत गोये. ताहां ईसु कोयो, “ए जुवान, आंय ताहूं कोहो, उठ!”
ताहां तो मोल्यो माहुंउं उठीत बोठो, आन गोगो वोल्यो. तिये तियाहा वापिस तियाआ आयहीही आपी देदू.
यी गोठी वाअहीं आखे बित गोये, आन तें देवोअ महिमा कोअते जात कोने वोल्ये, “आपाआ विसमेहें एक वोडु भविश्यवक्ता प्रगट ओवुहू, आन कोने वोल्ये देव तियाआ माअहुंहूं मदत कोइलोअ काजे आवित लागुहू.”
आन तियाआ बाप्तिमेर्यीइ ए गोठ आखा यहुदीया आन आसे पासेए बादा देसोम पसरीत गोयी.
बाप्तिस्मा कोअनारा योहानोअ खबर्या
(मत्तय 11:2-19)
योहानोहो तियाआ सेला यीं बादी गोठीइ खबर आप्यी, ताहां योहाने तियाआ सेलांमेहें रोत बेन जोओंहों हाद्या.
तियांहां प्रभुउ जागे ओं फुसीइलोअ कोअते मोकल्या, “केहें जो आवनारु होय, तो तुज होय के, के आमू फाश्याआ बिहीरा एखाआ वाट जोवो?” ताहराआ तियां ईसुउ जागे आवित कोइत कोयो, “बाप्तिस्मा कोअनारे योहाने आमुहूं ताआ जागे ओं फुसे तेहें काजे मोकल्याहा के, ‘जो आवनारु होय, तो तुज होय के, फाशाआ बिहीरा एखाआ वाट जोवो?’”
तियीज घेड़ी तिये वारुज जोओंहों मांदवाड़ीम, दुखोम रोत हुदार्ये आन पुतोअ आत्माम रोत सुटका आप्यी; आन वारुज आंद्लाहां डोआ आप्या; आन तिये तियांहां कोयो, “जो किबी तुमू देख्यो आन उनाअयाहा, जात कोइत योहानोहो कोत द्या; के आंद्ले देखतेहें, लेंगड़े सालते-फिरतेहें, वोडा दुखोवाले सोके कोआतेहें, बोयरे उनाअतेहें, मोल्ये जिवते ओवतेहे, आन गोरब्योअ काजे हाजी बातमीइ परसार ओवेहे. धन्य होय तों माहुंउं, जो माआं बाप्तिम बेन भरिवसा ने कोअतोये.”
जाहां योहानोअ मोकल्यीइल्या माटी जाता रोया, ताहां ईसु योहानोअ बाप्तिमेहें गर्दीही कोनु वोल्यू, “तुमू रानम कि पाला गोयाते? वाराअरी आलनारा बुआंहां के? ताहां कि पाला गोयाते? मोवे आन हाजे साअके पेवीत रोनारा माहुंहूं के? जें माअहें बाहरीमेर्येए साअके पेवीत रोतेहे, आन मोज्यादान वालित रोतेहे, तें तोम राजमहालोम रोतेहे.” ताहराआ कोवा, कि पाला गोयाते? के एखा भविश्यवक्ताहा? होव! आंय तुमुहूं कोहो के, तुमू जियाहा देख्युहू तो एखा भविश्यवक्ता रोत वादार होय. ओ तोज होय जियाआ बाप्तिमेहें लेखाअयोहो: देवे कोयो, आंय ताआ आगाड़ी माआं खबर्याहा मोकलोहो,
तो ताआ रोत आगाड़ी वाट बोणावे.
आंय तुमुहूं कोहो के, “बोईंप रोत उब्ज्येहें तिहीं मेहें योहानो रोत वोडो कोडो कायनाहां: पोन तेबी देवोअ राजोमेएं हानाम रोत हानो बी तिया रोत वोडो होय.”
ताहां हारेक जोएं तेतोज नाहां, पोन नाकेदारों बी मानित लेदो के देवोअ वसन खोरो होय, आन योहानोअ बाप्तिस्मा लेत लेदो. पोन फरिसी आन कायदाअ मास्तरहों योहानोअ आथे बाप्तिस्मा ने लेत कोइत, तियांआं वोतीइ देवोअ योजनाहा टाली देदी.
“ताहां आंय या जमानाआं माअहुंहूं कोडाअ होस कोवें, के तें कोडाअ होस होये? तें तियां पोर्याअ होस होये, जें बाजारोम बोठेहे, आन एकान बिहीराहा बोंबलीत कोतेहे, ‘आमू तुमाआं कोअते वेहेवालोअ वाजे वाजाड़्ये आन तुमू ने नाश्या! आमू विखा कोअयो, पोन तुमू ने रोड्या!’ काहाके बाप्तिस्मा कोअनारु योहान ने रोटू खातु आयू, आन ने दाराक्शाआ रोह पीतु आयू, आन तुमू कोताहा, ‘तिया मेहें पुत होये!’ ताहरुउ माहुंउं बेटुह्हू खातु-पितुज आयुहू, आन तुमू कोताहा, ‘पाला, ओ ओड़ख्यू आन पिदाड़ माटी, नाकेदारोओं आन पाप्योंअ दोस्ती होय.’ पोन देवोअ बुद्दी, तियीइ माननारा वाअहीं खोरी ठरवाअयीही.”
ईसु शिमोन नावोअ फरिसीइ कोअ
ताहरोअ फरिसीमेर्येए एके जोएं ईसुहू रोटू खाअलोअ नेवतो आप्यो, ताहां तो तियाआ कोअ जात कोइत रोटू खानु बोठू. तिया होयरोमेएं पापी जिवन जिवनारी एक बोईं रोतीते. तियीही मुंदू पोड़्यु के ईसु एका फरिसीइहीं रोटू खानु बोठुहू, ताहरीइ ते एका संगमरमरोअ जेगोमेहें अत्तर पोइत लेत आयी, आन ईसुउ गुडाआ आहने, फासाड़ी उबी रोत, रोड़ती जात रोज्या वाअहीं तियाआ गुडाहा पिगवीत आन तियीइ मुंडोअ सिंग्यावाअहीं नुसी वोल्यी, आन तियाआ गुडाहा वारुज गुआँ देत कोइत तियां पोअ अत्तर ओली देदो. ओं पालित कोइत तो फरिसी मोनोम विसार कोउ वोल्यु, “जर ओ भविश्यवक्ता ओतू ताहां, ओलखीत लेतू के, तियाहा आथ लागाड़नारी बोयोंअ कोडी होय, आन केहेलिही बोयोंअ होय, काहाके ए तोम पापी बोयोंअ होये.”
ईसु तियाहा उत्तर आपीत कोयो, “ए शिमोन, ताहूं माआं एक गोठ कोअलोअ होये.” तिये कोयो,
“गुरु, माहूं को.”
“एका हावकारोअ बेन कर्जावाला ओता, एका पोअ पास होव होनाआ रुप्या आन एका पोअ पोन्नास हाजारोअ कर्ज ओतो. जाहां तियां पोअ कर्ज फेड़ कोइलाआ किज ने रोयो, ताहां तिये तियां बेनुहूं माफ कोइ देदा. तियाहा कोत तियां बेनुमेहें रोत कोडो जाअखो तिया पोअ मेर कोए?”
शिमोने उत्तर आप्यो, “माहूं लागेहे, जियाआ जाअखो कर्ज माफ कोअयो, तो.” ईसु कोयो,
“तुमे बोराबर कोयो,” आन तियी बायीइहें फिरीत कोइत तिये शिमोनोहो कोयो, “केहें तु यी बायीही देखेहे के? आंय ताआ कोअ आयू, पोन तुमे माहूं गुडा तुवीइलो काजे पाईं नाहां आप्यो, पोने यी तोम यीइ रोज्या वाअहीं माआं गुडा पिगव्या, आन यीइ सिंग्या वाअहीं माआं गुडा नुश्या. आंय आयू तेहेलाम तुमे माहूं गुऊँ नाहां देदू, पोन जोयोंअ आंय इंहीं आयुहू, तोयोंअ रोत ए माआं गुडाआ गुऊँ देअलोअ बोंद नाहां कोअयो. तुमे जेयतुनोअ तेल माआं मुंडीइरी ने हार्यो, पोने यी माआं गुडाहा अत्तर हार्योहो. तियाहा काजे आंय ताहूं कोहो के, यीइ पाप जाअखीलाहा ओता, ते माफ ओवा, काहाके तियी खुब मेर देखाड़्यीही, पोन जियाआ कमी पाप माफ ओवा, तो कमी मेर कोअत्लो.”
ताहां ईसु तियी बोईंही कोयो, “ताआ पापोअ माफी ओवी.”
ताहां जे तियाअरी रोटू खाने बोठेते, तें तियां तियांआं मोनोम विसार कोए वोल्ये, “ओ कोडू होये, जो पापोअ माफी बी कोअहे?”
पोन ईसु तियी बोईंही कोयो, “ताआ विश्वासे ताहूं वासाड़ीत लेदीही, होकेहे जा.”
Noiri. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.