Noiri
योहान 5
कुंडीइ जागेहे नेराय
याअ फासाड़ी ईसु यहुदीइ एका तिवारोअ काजे येरुसालेम गोयू. येरुसालेमोमेहें मेडाअ दरवाजाआ जागे एक कुंडी होये, जियीही इब्री बाशामेहें बेथसैदा कोतेहे; तियाआ पास ओटा होये. जिहीं आंद्ले, पांगले आन लखवाअ बिमार आन एहेला खुब मांदवाड़्या माहुंउं गर्दी पोड़ीत रोतीते. काहाके ठरवीइल्यी वेलेपोअ देवोअ देवदुत कुंडीमेहें उतरीत कोइत पाईं आलव्या कोअताते. पाईं आलताज वाआ जो कोडो पेल उतरीइतोतो, तो हुदरीत जातोतो. भले तियाआ कोड्लीज बी बिमारी काहा नाहां रोती. तिहीं एक माहुंउं ओतो, जो आड़ोतीस वोरह्ये बिमारीम ओतो. ईसु तियाहा लोटीत रोल्यो पालित कोइत आन ओं जाईंत कोइत के तो जाअखीलाहा दिहीर्योअ यी दशामेहें पोड़ीत रोयोहो, तियाहा फुशो, “केहें ताआ हुदरीइलोअ इश्शा होये?”
तिये बिमारी माहें, तियाहा उत्तर आप्यो, “प्रभु, माआ जागे कोडो माहुंउं कायनाहां जो पाईं आलवाय तेहेलाम माहूं कुंडीमेहें उतारीत सेके; पोन माहूं पोत्ता-पोत्ता बिहीरो मारोत पेल उतरीत पोडेहे.”
ईसु तियाहा कोयो, “उठ आन ताआ खाट्लो लेत सालू वोल.” तों माहुंउं ताअहांज हाजो ओत गोयो, आन तियाआ खाट्लो विसीत सालो वोल्यो.
ओं तेदिहीं ओवो जेदिहीं आरामोअ दिही ओतू. यापोअ यहुदी आधिकार्यों तियापोअ जियाहा नेराय जोड़्यीते, तियाहा कोअलाअ सुरु कोअयो, “आज आरामोअ दिही होये, आन आमाआं कायदाअ पुरमाणे खाट्लो उसलीइलोअ ओं विरुद्दाम होये.”
तिये तियांहां उत्तर आप्यो, “जिये माहूं हुदार्यू, तियेज माहूं कोयो, ‘ताआ खाट्लो विस, आन सालू वोल.’”
तियां तियाहा फुशो, “तो कोडू माटी होये, जिये ताहूं कोयो, ‘आथरुउ विस, आन सालू वोल?’”
पोन जो हुदरीत गोयुतो, तियाहा ईसु कोडू होय तो ने ओलखाअयू, काहाके तियी जागे जाअखीलिही गर्दी ओती, आन ईसु तिहीं रोत ठावकुज जातु रोयुतो.
यीं गोठीइ फासाड़ी तो ईसुहू मंदिरोमेहें मिल्यू. ईसु तियाहा कोयो, “पाल, तू हुदरीत गोयुहू: फाशुउ पाप मा कोअही, एहेलोह ने ओवुहूं जोवे, के यापरोत जाअखी पाअयी अड़सन तापोअ आवित पोड़े.”
तिये माहें जात कोइत यहुदी आधिकार्योहों कोत देदो के ईसु माहूं हुदार्युतो.
बेटाह्हा वाअहीं जिवन
यी गोठी वाअहीं यहुदी ईसुहू तारास देअलोअ सुरु कोअयो, काहाके तो एहेलेहे कामे आरामोअ दिही कोअतुतो. ईसु तियांहां कोयो, “माआ आब्हू कायम काम कोअया कोअहे, आन आंय बी काम कोअया कोअहो.”
तिहीं वाअहीं यहुदी फाश्याआ बी वादार तियाहा माईंत टाकीइलाआ कोशित कोआ वोल्या, काहाके तो निस्तु आरामोअ दिहोअ नियम एतुज ने तोडतुतो, पोन देवोहो माआं आब्हू कोत कोइत सोताहा देवोअ सारकुहू गोणतुतो.
बेटाह्हाआ आधिकार
यापोअ रोत ईसु तियांहां कोयो, “आंय तुमुहूं खोरीज कोहो, बेटुह्हू सोताहाज किज नाहां कोइत सेकतु, फक्त जों आब्हाहा कोअत्लाहा देखेहे तोंज कोअहे; काहाके जियां जियां कामोंहों आब्हू कोअहे तियां कामोंहों बेटुह्हू बी कोअहे. काहाके आब्हू बेटाह्हा पोअ मेर कोअहे आन जों जों काम तो सोताहा कोअहे, तों आखो तियाहा देखाड़ेहे; आन तो यांप रोत बी वोडे कामे तियाहा देखाड़े, काहाके तुमू बोगलाअहूं जोवे. आब्हू जियांहां मोल्याम रोत उठाड़ेहे आन तियांहां जिवन आपेहे, तेहेंज कोइत बेटुह्हू बी जियांहां जिवाड़ुहूं होदेहे तियांहां जिवाड़ेहे. आब्हू कोडाअ न्याय ने कोअत्लू, पोन न्याय कोइलाआ आधिकार बेटाह्हाहा आपी देदुहू, के आखे माअहें जेहें कोइत आब्हाअ मानपान कोअतेहे तेहेंज कोइत बेटाह्हाअ बी मानपान कोअहूं जोवे. जो बेटाह्हाअ मानपान नाहां कोअतो, तो आब्हाअ जिये तियाहा मोकल्युहू, मानपान नाहां कोअतो.
“आंय तुमुहूं खोरीज कोहो, जो माआं शब्द उनाइत कोइत माहूं मोकलीइनारा पोअ विश्वास कोअहे, हादाजल्म्योंअ जिवन तियाआ होय; आन न्यायोअ डोंड तियापोअ ने आवे, पोन याअ बोदले तों मोतोम रोत उनकीत जिवनोम जातो रोयो. आंय तुमुहूं खोरीज कोहो ते वेल आवेहे, पोन आवतीज लागीही, जियीमेहें मोल्ये देवोअ बेटाह्हाअ आवाज उनाये, आन जें उनाय तें जिवे. काहाके जेहें कोइत आब्हू जिवनोअ उकलू होय, तेहेंज कोइत तियाआ बेटाह्हाहा बी जिवनोअ उकलू बोणावयुहू; फाशुउ तियाहा न्याय कोइलाआ बी आधिकार आप्युहू, याअकाजे के तो माहुंउं बेटुह्हू होये. या वाअहीं मा बोगलाअहा; काहाके ते वेल आवेहे के जेत्ते बी माहणोम होय, तें तियाआ आवाज उनाइत कोइत निहींत आवे. जियां हाजे कामे कोअयेहे तें जिवनोअ पुनरुत्थानोअ काजे आन जियां खाराब कामे कोअयेहे, तें डोंडोअ पुनरुत्थानोअ काजे जिवीत उठे.
ईसुउ बाप्तिम साक्शी
“आंय माआं माआंज किज नाहां कोइत सेकतु; जेहलुहू उनाअहो, तेहलुहू न्याय कोअहो; आन माआं न्याय खोरु होय, काहाके आंय माआं इश्शा नाहां, पोन माहूं मोकलीइनाराअ इश्शा होदोहो.
“जर आंय माआं सोताआ साक्शी आपो, ताहां माआं साक्शी खोरी नाहां. एक बिहीरु होय जो माआं साक्शी आपेहे, आन माहूं मुंदू होय के माआं जे साक्शी तो आपेहे, ते खोरी होये. तुमू योहानोअ जागे खबर्या मोकल्या आन तिये सत्याआ साक्शी आप्यी. पोन माआं बाप्तिमेहें माहुंउं साक्शी नाहां जोवती; तेबी आंय ए गोठी याअकाजे कोहो के तुमाआं तारण ओवुहूं जोवे. योहान ते पेटाअत्लू आन सोमकीइत्लू दिवू ओतू, आन तुमुहूं थोड़ीक वाआ जाआं तियाआ उजालाम मोज्या लेअलोअ हाजो लागो. पोन मापोअ जे साक्शी होय ते योहानोअ साक्शी रोत वोडी होये; काहाके जो काम आब्हे माहूं पुरो कोअहूं जोवे काजे होप्योहो, मोन्ज्ये ओंज काम जो आंय कोअहो, ओंज काम माआं साक्शीदार होये के आब्हे माहूं मोकल्युहू. आन आब्हू जिये माहूं मोकल्युहू, तियेज माआं साक्शी आप्यीही. तुमू नाहां केदिहीं तियाआ आवाज उनाअये, आन नाहां तियाआ रुप देख्यू; आन नाहां तुमू सोताआ मोनोम तियाआ संदेश स्विकारते, काहाके तुमू मोकलीइनारा पोअ विश्वास नाहां कोअते. तुमू वसनोअ लेख्याहा वासतेहें, काहाके तुमाआं विसार होय के तुमुहूं तियां वाअहीं हादाजल्म्योंअ जिवन जोड़े; पोन ओं वसनोअ लेख्योज माआं साक्शी आपेहे; तेबी तुमू जिवन मिलवीलाअ काजे माआं जागे आविइलाअ नाहां कोअते.
“माहूं मोनव्योअ वाअहीं कोअल्यू मानपान नाहां जोवतू. काहाके माहूं मुंदू होय के तुमामेहें देवोअ मेर कायनाहां. आंय माआं आब्हाअ आधिकारो वाअहीं आवयुहू, तेबी तुमू माहूं स्विकार नाहां कोअते; जर बिहीरो एखो सोताआज नावसे आवे, ताहां तियाहा स्विकार कोइत लेहा. तुमू ते एकान बिहीरा पोअ रोत मानपान होदतेहे, पोन तुमू जो एकुज देव होये तियाअहें रोत मानपान नाहां होदते, ताहां मापोअ की कोइत विश्वास कोइत सेकतेहे? ओं मा समजाहा के आंय आब्हाअ सामने तुमा पोअ आरोप लागाड़ीहीं; तुमा पोअ आरोप लागाड़नारु तोम मोशे होये, जिया पोअ तुमू आशा मिक्यीही. काहाके जर तुमू मोशेए विश्वास कोअते, ताहां माआं बी विश्वास कोअते, काहाके तिये माआं बाप्तिमेहें लेख्योहो. जाहां तुमू जो तिये लेख्योहो तियाज मेहें विश्वास नाहां कोअते, ताहां माआं गोठीपोअ की कोइत विश्वास कोअहा?”
Noiri. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.