याकोब 1

1देव आन प्रभु ईसु ख्रिस्ताआ सेवक याकोबोअहें रोत देवोअ माअहुंहूं जें आखी दुन्याम वेरात कोइत रोतेहें, तियां आखाहा सलाम!

विश्वास आन ओकल

2माआं पाव्हीइला, जाहां तुमाआं वाटे पोअ आखी बातीइ परिक्शा आवे, ताहां तियींहीं खुब खुसीइ गोठ होमजा. 3याअकाजे तुमुहूं मुंदू होय के एहलिही परिक्शाम तुमाआं विश्वास फारकीइला वाअहीं धिर उत्पन्न ओवेहे. 4पोन धिरोहो तियाआ काम पुरो कोअहूं द्या, काहाके तुमू पुरे आन पाक्के ओत जाअहूं जोवे, आन तुमामेहें कोड्लीज गोठीइ कमी ने पोड़ुहूं जोवे. 5पोन जर एखाहा बुद्दीइ कमी ओय, ताहां तों देवोहो प्रार्थना कोअहूं जोवे, काहाके देव आखाहा खुसी वाअहीं आपेहे, आन तों तुमुहूं जोड़ीत जाय. 6पोन विश्वासो वाअहीं प्रार्थना कोअहूं जोवे, आन किज सौंसू ने कोअहूं जोवे, काहाके सौंसू कोअनारो दोर्‍याआ सेलकाआ होस होय, जे हावा वाअहीं वोहेहे आन उसलेहे. 7एहेलोह माहुंउं एहें ने समजुहूं जोवे, के माहूं प्रभु पोअ रोत काविंहीं जोड़े. 8तों माहुंउं बेन मोन्यो होय, आन तियाआ गोठीम फलक्यो होय.

गरीब आन कुन्बी

9गरीब विश्वासी पाव्हीइले देवे आपल्या तियांआं उसा जागा पोअ वोडाय कोअहूं जोवे. 10आन मालदार तियाआ निसी दशा पोअ वोडाय कोअहूं जोवे; काहाके तों खोड़ोअ फुलोअ होस आरवात जाय. 11काहाके दिही उगताज बोराबर जाअखो तोपो वोलेहे आन खोड़ोहो उगवी देहे, आन तियाआ फुल ओदरीत पोड़ेहे आन तियाआ होबा सेलात जाहे. एहेंज कोइत मालदार बी तियांआं काम कोअते कोअते आरवात जाय.

लालस आन परिक्शा

12हाजो होय तों माहुंउं जो परिक्शामेहें टिकीत रोहे, काहाके, जो परिक्शामेहें खोरो उतरे, तियाहा जिवनोअ टोपू जोड़े, जियाआ आथवसन प्रभु तियाआ मेर कोअनाराहां आप्योहो. 13जर एखु एहलिही परिक्शाम पोड़तोय, ताहां तों एहें ने कोअहूं जोवे के, “माआं परिक्शा देवोअहें रोत होय,” काहाके देवोहो कोडो बी परिक्शाम नाहां टाकीत सेकतो, आन तो बी कोडाहा परिक्शाम नाहां टाकतु. 14पोन माअहुंउं सोताआ लालसोम पोड़ीत कोइत पुलवात जात्लो आन परिक्शाम पोड़त्लो. 15तिहीं रोत लालस गाभण ओत कोइत पापोहो जल्म आपेहे आन पाप जेहलाम वोडू ओत जाहे, ताहां मोतोहो उत्पन्न कोअहे.

16ए माआं मेराला पाव्हीइला तुमू ठोगाअहा मा. 17काहाके हारेक हाजो वरदान आन हाजो दान उसेज रोत होय, आन उजवोड़ोअ आब्हाअ जागेज रोत जोड़ेहे, जिहींम किज बोदलात नाहां सेकतो, आन ने अदला बोदली वाअहीं तियापोअ सावलू पोड़तू. 18आपू तियाआ कोलीइ वस्तुमेएं पेहला फलोअ होस ठरुहूं जोवे कोत तिये सोताआ इश्शा वाईं तियाआ सत्य वसनोवाईं जल्म आप्योहो.

खरी भक्ती

19माआं मेराला पाव्हीइला, तुमू ए गोठ वारुहूं समजीत ल्या के, हारेक माहुंउं उनाइलाम उतवाल्यो, गोगीइलाम बागे खोताइलाम धिमो जोवे. 20काहाके, मोनवीइ खोते वाईं देवोहो गोमे तेहलोह हाजो काम नाहां ओवतो. 21तिहीं वाईं आखी घाण गोठीम रोत सोताआ पुरी सुटका कोइत ल्या, जिहीं वाईं तुमाआं आत्माआं तारण ओत सेके एहलिही देवोअ गोठी तुमाआं मोनोम पेएयिही तियिहीं तुमू नम्रता वाईं स्विकारा.

22निस्ते वसन उनाअनारे एतेज मा, पोन तियाआ परमाणे सालनारे बोणा, नेत तेहें ने कोअहा ताहां तुमू सोताहा फोगे बोणतेहे. 23काहाके जों कोडो वसन उनाइत लेहे, पोन तियाआ परमाणे नाहां सालतो, तों आऱ्ह्याम पालनारा एखा माहुंउं होस होय. 24जों सोताआ सोब पालित लेहेन निहींत जाहे, पोन सेलवाआ तों केहलोहो ओतो तोंज विहीरात जाहे. 25पोन जों माहुंउं सुटका आपनारा हारापुरा नियमोअ पालन कोअहे, आन वसन उनात कोइत विहीरात नाहां जातो, पोन तियाआ परमाणे सालेहे, तों माहुंउं जों बी काम आथे तोए तिहींम तियाहा आशिर्वाद जोड़े.

26जर एखु सोताहा धर्मी समजेहे, पोन सोताआ जिब ताबाम नाहां मिकतो, ताहां तों सोताहा फोगो बोणेहे. तेहलोह माहुंउं सोताहा धर्मी समजेहे तों की कामोअ? 27विखावालां आन रोंडाअलाआं कालजी लेनारो आन दुन्याआ बिगिड़ल्या वातावरणोम सोताहा दुर रोहे, एहलोहो माहुंउं देव आब्हाआ सामने सोको आन निर्दुस ठरेहे.