Noiri
उत्प 8
रेलेए पाईं आटाइलो
पोन देवे नोहाआ आन जेते जोंगल्ये जनवारे आन कोर्येए जनवारे तियाअरी जाहाजेम ओते, तियां आखाआ ओर मिक्यी: आन देवे धरतीपोअ वारो वादाड़्यो; आन पाईं आटाओ वोल्यो; आन उंडा दोर्याआ उकला आन जुगोअ खिड़कीइ बाअणे बोंद ओत गोये; आन तियाप रोत जो पाईं पोड़तोतो, तों बी आलहाइत गोयो; आन एक होव पोन्नास दिहोअ फासाड़ी पाईं धरतीपोअ रोत सोरोसोरो आटाओ वोल्यो. हांतवा मोयनाआ होत्तरवे दिही, जाहाज अरारात नावोअ डोगोपोअ आलाइत गोयी. आन पाईं दाहवा मोयनाम जाआं आटाअतो रोयो, आन दाहवा मोयनाआं पेल्लेए दिही डोगोअ टुश्या देखाअया.
फाश्योअ एहेलोहो ओवो के सालीही दिहोअ फासाड़ी नोहे तियाआ बोणावल्यी जाहाजेए खिड़की उगाड़ीत कोइत, एक कागड़ू उडाड़ी देदू: जाअहूं जाआं पाईं धरतीपोअ रोत उगाइत नाहां गोयो, ताअहूं जाआं कागड़ू एहें तेहें इंडतू रोयू. फाशोअ तिये धरतीपोअ रोत पाईं आटाइत गोयोहो के नाहां तों पालीइलोअ काजे तियाआ जागे रोत एकी पेरवीही बी उडाड़ी देदी. तियी पेरवीही गुडा मिकीइलाअ काजे किज आधार ने जोड़्यू, ताहां ते तियाआ जागे जाहाजीम वोलीत आयी: काहाके पुरी धरतीपोअ पाईंन पाईंज ओतो. ताहां नोहे आथ टाकीत कोइत तियीही तियाआ जागे जाहाजीम लेत लेदी. ताहां फाशुउ हांत दिही जाआं रुकाइत कोइत, तिये तियीज पेरवीही जाहाजेम रोत फाशीइ उडाड़ी देदी; आन पेरवी हांजेए वेले तियाआ जागे आयी, ताहां की देख्यो के तियीइ सासड़ीमेहें जेयतुनोअ एक कोवलो पान होय; तियावाअहीं नोहे जाइंत लेदो के पाईं धरतीपोअ रोत आटाइत गोयोहो. ताहरुउ तो हांत दिही जाआं रुकाइत कोइत तियीज पेरवीही उडाड़ी देदी; आन ते तियाआ जागे फाशीइ केदिहींज वोलीत कोइत ने आयी.
जेहलाम नोहाआ वय सोव होव एक वोरह्योअ ओतो, आन पेल्लाआ मोयनाआं पेल्लेए दिही पाईं धरतीपोअ रोत आटाइत गोयो. तेहेलाम नोहे जाहाजीइ बाअणो उगाड़ीत कोइत की देख्यो के धरती उगाइत गोयीही. आन दुसरा मोयनाआ सात्ताविसवे दिही धरती पुरीज उगाइत गोयी.
ताहां देवे नोहाहा कोयो, “तू ताआ पोर्या, लाडी, आन वोवड़ीह्ही नेहें जाहाजेम रोत निहीत आवा. सिड़े, आखी जातीइ होरतींडनारे जिवतोर जें धरतीपोअ फिरतींडतेहे– जेत्ते बी जिवनारे जिवतोर ताआ जागे होय, तियां आखाहा ताअरीज काडीत लेताव के धरतीपोअ तियांप रोत जाअखीलेहे बासे उबजुहूं जोवे; आन ते फुलेन-फले आन धरतीपोअ पसरीत जाअहूं जोवे.” ताहां नोहू, आन तियाआ पोर्या, आन तियाआ लाडी, आन वोवड़ीह्ही निहीत आये: आन आखे जनवारे, होरतींडनारे जिवतोर, आन सिड़े, आन जेत्ते जिवतोर धरतीपोअ सालते फिरतेहे, आखे राज्या राज्यामेहें कोइत जाहाजेम रोत निहीत आवये.
नोहाआ गाराहा
ताहां नोहे यहोवा देवोअ काजे एक देवान्यो बोणायो; आन आखा सोका जनवारोअ आन आखा सोका सिड़ामेर्येए थोड़ थोड़े लेत कोइत देवान्यापोअ गाराहा कोअये. यापोअ यहोवा देवे खुसी आपनारी गोंद मिलवीत कोइत विसार कोअयू, “माअहुंउं वास्ताय आंय फाश्युउ केदिहींज धरतीही हाराप ने आपो. माअहुंउं मोनोमेहें हानोज रोत जों किबी उब्जेहे तों खाराबुज रोहे; तेबी जेहें कोइत आंय आखा जिवोहो ओमे माअयाहा, तेहें कोइत तियांहां फाश्युउ केदिहींज ने माओ. ओमे रोत जाअहूं जाआं धरती टिकीत रोये, ताअहूं जाआं पेइलोन वाडीइलोअ वेल, हेलोन उनो, उनालून हियालू, दिहीन रात, कायम ओवयाज कोए.”
Noiri. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.